Nu kayà mu i umay ta tadday nga lugar nga ariammu paga vuluvuga nangngayan, anni i mawag nga kuammu?

1. 1. Tuttulan i dalan nga kayà mu.

2. 2. Tuttulan i tanakuan, ta awayya na nga ammu da i dalan.

3. 3. Mangusa ka tu mapattalakkan nga giya kagitta na GPS, mapa, onu makkiavu ka ta mapattalakkan nga kofun nga ammu na i dalan.

Nu piliattam i ollu onu mekadua, egga i mangngayattam ngem awayya na nga ari tu ta kayà tam nga angngayan. Ngem nu piliattam i mekatallu, siguradu nga madde tam i destinasiottam.

Kagitta na pabbiahe i pattoletam—iddanamattam nga iyangay na ittam natun ta makapagayayya nga mappange. Nakadepende ta giya nga pattalakkattam nu maddesision ittam nu makadde ittam tatun onu ari.

Aru ta desisiottam ta pattoletam i baddi laman i efekto na nittam, ngem dakal i efekto na karuan. Ipasingan natun i kuru-kurugattam—i pagimamma tam ta mapia anna marake. Awayya na nga mabbayag i mapia onu marake nga efekto natun ira nga desision nittam anna ta iddeddukattam. Nelavu tatun ira nga desision i meyannung ta:

• Paki-sex anna pagatawa

• Pakkagi tu kurug, trabahu, anna kuartu

• Nu kunnasi mapadakal i ána

• Nu kunnasi tratuan i tanakuan

Kunnasim masiguradu nga marresulta tu makapagayayya nga mappange ta niko anna familiam i desision ira nga kuammu?

I pakkiavu nittam ngamin: Anni i makoffun niakan nga makangngua tu mapia ira nga desision?

Ipakanawag nittam naw nga magazina nu ngatta mapattalakkan nga giya i Biblia anna nu kunnasi na ittam moffunan naw.