Mapia Anna Marake: I Makoffun nga Giya
Makoffun i Biblia ta minillion nga totolay ta appa nga aspeto.
1. Pagatawa
Madduruma i pagimamma na totolay ta pagatawa anna nu kunnasi ira mabbalin tu magayayya.
I KAGIAN NA BIBLIA: “Mawag tu ayatan na lallaki i gi-attawad-da ta kunna pangaya da ta baggi da laggapa. Mawag gapa tu i babbay ay ikakua da i gi-attawad-da.”—Efeso 5:33.
I KEBALINAN NA: Naggafu ta Dios i unnug na pagatawa, yari tu ammu na nu kunnasi mabbalin tu magayayya i magatawa. (Marcos 10:6-9) Magayayya i magatawa nu ari laman ira nga maffokus ta mala da, nu ari, ta meyawa da tapenu mapaladda i pagatawa da. Mepasingan na atawa nga lalaki i pangaya na ta atawa na ta pattratu anna pangikavurung na nisa. Mepasingan gapa na atawa nga babay i respeto na ta atawa na ta paguvovug anna annangngua na.
I MAKOFFUN NGA GIYA NA BIBLIA: Natageno ni Quang anna Thi, nga taga-Vietnam, nga ari ngana ira magayayya ta pagatawa da. Marake i pattratu ni Quang ta atawa na. Kinagi na: “Awan tu pangikavurukku ta panageno ni Thi anna kanayukku yayya nga pasiranan.” Kayà ni Thi i maki-divorce. Kinagi na: “Ariakku ngana mapattalakkan onu merespeto i atawà.”
Nagigiammu ni Quang anna Thi i tuttuddu na Biblia anna nu kunnasi iyaplika i Efeso 5:33 ta pagatawa da. “Noffunan nà naw nga teksto tapenu masingan nga mawag ku i mabbalin tu masippo,” kinagi ni Quang, “anna ipatageno ku i pagiddu ku kani Thi anna meyawa ku i material, pisikal, anna emosional nga pakawagan na. Nu kuakku yatun, iddukan anna irespeto nà gapa.” Kinagi gapa ni Thi, “Nu iyaplikà i Efeso 5:33 anna ipasingakku i pangirespeto ta atawà, mas ipatageno na niakan i pangiddu anna proteksion na, anna memammo ngà gapa.”
Para ta aru paga nga informasion meyannung ta pagatawa, bibbigan i Malukag! Num. 2 2018, nga nateman tu “12 Sekreto na Magayayya nga Familia” ta jw.org.
2. Nu Kunnasi Tratuan i Tanakuan
Nu karuan, marake i pattratu na totolay ta tanakuan megafu ta rasa, nasionalidad, itchura, relihion, onu ta piliadda nga sekso nga pakirelasionan.
I KAGIAN NA BIBLIA: “Ikakua nu ngamin i totolay.”—1 Pedro 2:17.
I KEBALINAN NA: Ari nga suportan na Biblia i pangireruma ta rasa, pangikalussaw ta homoseksual ira, onu ta tanakuan i nasiodda. Ipagaram na lallagu nga irespeto tam i ngamin nga totolay maski anni paga i rasa, nasionalidad, onu estado da ta pattolay. (Kingngua 10:34) Maski nu ariattam umanugu ta kuru-kurugan onu kukukuan na tanakuan, mepasingattam lagapa i kinasippo anna pangirespeto ta nira.—Mateo 7:12.
I MAKOFFUN NGA GIYA NA BIBLIA: Nainfluwensian si Daniel nga imammatan i totolay ta Asia nga marake i efekto da ta nasion na. Ikalussaw na lallagu i maski sinni nga taga-Asia anna pasiranan na ira ta publiko. “Abbo ku nga suportakku laman i nasiokku,” kagian ni Daniel. “Para nio ari nga marake i nonopan anna kuakku ira.”
Nagigiammu gabbalaman ni Daniel i tuttuddu na Biblia. “Nanguli ngana i appana-panono ku,” kagian ni Daniel. “Mawag nga imammatakku i totolay kagitta na pagimamma na Dios—nga para-parefu ittam maski sitaw i naggafuattam.” Kinagi ni Daniel i matageno na nu egga i mammammu na nga tolay. “Kakku ngana nonopan nu sitaw i naggafuadda. Iddukakku i ngamin nga tolay anna aru i kofukku ta interu mundo.”
Para ta aru paga nga informasion, bibbigan i Malukag! Num. 3 2020, nga nateman tu “Masolusionan Kari i Pangi-reruma?” ta jw.org.
3. Kuartu
Mappursigi i aru nga totolay nga mappariku tapenu mabbalin tu magayayya anna makkasta i mappange da.
I KAGIAN NA BIBLIA: “Proteksion i sirib nu kunnasi nga proteksion i kuartu, ngem yaw i bentaha na pakannammu: Pattalupaddianan na sirib i inango na makakkua taw.”—Eclesiastes 7:12.
I KEBALINAN NA: Kawagattam i kuartu, ngem ari meyawa naw i pagayayya onu makasta nga mappange. (Proverbio 18:11; 23:4, 5) Nakadepende i kurug nga pagayayya anna makasta nga mappange ta pangiyaplika ta sirib maggafu ta Dios nga egga ta Biblia.—1 Timoteo 6:17-19.
I MAKOFFUN NGA GIYA NA BIBLIA: Nakafokus ta pappariku si Cardo nga taga-Indonesia. Kinagi na: “Egga niakan i gannug ira nga kayà na aru nga totolay. Makapat-travel ngà, makagatang tu mangina ira nga gamit, takay, anna balay ira.” Ngem ari nabbayag napawan na i kuartu na. “Inilloku dà, nala da i kuartu nga nabbannagakku ta aru nga dagun,” kinagi ni Cardo. “Inusà i interu pattolè ta pappariku, ngem nadismaya ngà laman megafu ta napawakku i ngamin anna kagitta na awan tu kwentà.”
Niyaplika ni Cardo i tabarang na Biblia meyannung ta kuartu. Ari ngana yayya nga nakafokus ta pappariku nu ari pinasimple na i pattolay na. Kinagi na: “I kapeggan tu makasta nga relasion ta Dios i kurug anna mannanayun tu kinariku. Makakatrug ngà ngana tu mapia kada gabi anna kurug tu magayayya ngà.”
Para ta aru paga nga informasion ta pagimamma na Biblia ta kuartu, bibbigan i artikulo nga “Meyawa Kari na Edukasion Anna na Kuartu i Makasta nga Mappange?” ta Passifusifutan Num. 3 2021, ta jw.org.
4. Paki-sex
Madduruma i opinion na totolay meyannung ta paki-sex.
I KAGIAN NA BIBLIA: “Arayyuan nu i seksual nga imoralidad. Mawag nga ammu na kada tadday nikamu nga kontrolan i mismu nga baggi na tapenu mabbalikkamu nga masanto onu marayaw, ariannu paparigan i nasion ira nga ari makannammu ta Dios, nga ariadda makontrol i pakkaraga da ta sekso megafu ta ari ira nga makontentu.”—1 Tesalonica 4:3-5, NW.
I KEBALINAN NA: Mangiyawa i Biblia tu limitasion ta seksual nga pakkaraga tam. Nelavu ta termino nga “seksual nga imoralidad” i pamabay onu paki-lalaki, prostitusion, paki-sex ta ari nga atawa, homoseksualidad, anna bestialidad. (1 Corinto 6:9, 10) Regalu nga naggafu ta Dios i paki-sex ngem para laman yatun ta lalaki anna babay nga kasal.—Proverbio 5:18, 19.
I MAKOFFUN NGA GIYA NA BIBLIA: Kinagi ni Kylie nga taga-Australia: “Megafu ta single ngà, abbo ku nga nu maki-sex ngà, makatageno ngà tu aya anna seguridad. Ngem ari tu kunnatun i nesimmu. Navurungan anna narraddam ngà.”
Nagigiammu anna niyaplika ni Kylie i tuttuddu na Biblia meyannung ta sex. “Nasingakku nga makoffun i estandarte ira na Dios tapenu ari ngà matakitan,” kinagi na. “Natageno ku ngana sangawe i seguridad anna aya megafu ta pagangnguà ta gannug ira nga kayà nga ipakua ni Jehova. Makoffun i pangiyaplikà ta giya na Biblia tapenu malisiakku i daddam!”
Para ta aru paga nga informasion, bibbigan i artikulo nga “Anni i Kagian na Biblia Meyannung ta Palive-in?” ta jw.org.
Uffunan ittam na Namaratu nittam tapenu mammuan nu anni i mapia anna marake. Maski nu mariga i panuttul ta moral ira nga giya na, aru i pammakapianattam tatun. Makapattalo ittam nga marresulta ta mannanayun nga pagayayya i panuttul tatun.
