“MAKAPANAW i bus, ngem mabattang i Chinese nga lalaki!” Yatun i naginna ni Alexandra durante nga agga-itubang yaya ta bus, nga maginnennag nga makalampas ta border na dua nga nasion ta South America. Minulug tapenu innanna i mesissimmu anna nasinganna i tadday nga Chinese nga marigatan maguvovug tu Spanish durante nga ipakanawagna i problemana ta guardia ta border. Gafu ta nagatende si Alexandra ta tadday nga Chinese congregation na Saksi ira ni Jehova, nabboluntario yaya nga maginterpret.

Kinagi na lalaki nga legal yaya nga residente ngem nakoko i dokumento anna kuartuna. Ari nga nangurug i ofisial ta istoria ta gafu anna nassuspetsa paga lagu nga kasali si Alexandra ta human trafficking. Nangurug gabbalaman ta pakanawag, ngem mawag na kakkabbi nga pasaheru nga mappaga tu multa megafu ta awan i fustu nga dokumentona. Megafu ta awan tu kuartuna, pinekkawan yaya ni Alexandra tu $20. Talaga nga nappabalo i lalaki anna kinagina nga sobra paga ta $20 i iyawana sonu mappaga. Kinagi ni Alexandra nga ari yaya magaleg tu katalina; magayaya yaya nga manguffun ta natagenona nga yatun i fustu nga kuan. Niddanna i lalaki tu nebase-Biblia ira nga literatura anna pinagaram nga maki-Bible study ta Saksi ira.

Talaga nga makapagayaya ta futu nga ginnan i pabbalin tu minangngiyawa ta estrangheru ira, anna awan tu duda nga kukukuan gapa yatun na totolay ta naddumu-ruma nga relihion anna totolay nga awan tu relihiodda. Sigga-paran ka kari gapa nga iyawa i baggim para ta tanakuan? Makapa-interes yatun nga pakkiavu megafu ta kinagi ni Jesus: “Mas dakal i pagayaya ta pangiyawa anne ta pangalawa.” (Kingngua 20:35) Mekunnay gapa yatun ta siensia ta kagian na researcher ira nga makasta para nikaw i pangiyawa. Innattam nu kunnasi.

Ipasingan na ekspiriensa ira nga konektadu i pangiyawa ta pagayaya. Nitura ni apostol Pablo nga “ayatan na Dios i sigga-pagayaya nga mangiyawa.” Tuktukuyanna i Cristiano ira nga nangiyawa tu darakal nga donasion tapenu uffunan i mariga ira nga kapangngurugda. (2 Corinto 8:4; 9:7) Arianna kayà kagian ni Pablo nga nangiyawa ira megafu ta magayaya ira. I kurug—magayaya ira megafu ta nakeyawa ira.

Kakuruganna, segun ta tadday nga research, i pangiyawa “paguyuanna i parte na uto nga konektadu ta pagayaya, pakikavvulu, anna pattalo, nga egga ‘makapabannay’ nga efektona.” Kagian paga na tadday nga research, “mas makapagayaya ta tadday nu iyawana i kuartuna ta tanakuan anne ta gastuanna yatun para ta baggina.”

Natagenomu ngana kari nga awan tu aru nga makuam  megafu ta sirkumstansiam? Kakuruganna, awayya maekspiriensa na ngamin i pabbalin tu “sigga-pagayaya nga mangiyawa.” Nu fustu i motibo, ari mawag tu dakal i meyawa. Kunnaw i mensahe na tadday ta Saksi ira ni Jehova ta taga-publisa naw nga magazina kavulu i donasionna: “Ta nappasa ira nga dagun, baddi laman nga balor na kuartu i meyayawaku ta Kingdom Hall.” Ngem, kunna paga: “Mas daka-dakal paga i nitoli ni Jehova nga Dios niakan anne ta niyawaku. . . . Mabbalo ta posible para niakan nga iyawa yaw nga regalu—mabanna-bannayan ngà.”

Ari laman tu kuartu i awayya meyawa. Aru paga i awayya tam meyawa.

Kagian na Biblia: “I masippo nga tolay mabenefisiowanna i baggina, ngem i maporay nga tolay mangirattal tu gulu ta baggina.” (Proverbio 11:17) I masippo nga totolay ay minangngiyawa, sigga-paran nga mangiyawa ta baggida—orasda, sikadda, pangikavurudda, anna aru paga. Aru i meyuffun naw nira, tadday ngana tatun i makasta nga gawa-gawayyan.

Ipasingan na research ira nga ari kuruga mattaki onu madepres danuri kanayun manguffun ta tanakuan. Yari tu mas makasta i gawa-gawayyadda. Mapakasta paga na pangiyawa i gawa-gawayyan danuri egga grabe nga takida, gittana multiple sclerosis onu HIV. Nammuan paga nga ari kuruga madepres onu baddi i tiansa nga manoli ta pabbalin tu alkoholiko danuri dati alkoholiko nga kanayun nga manguffun ta tanakuan.

Nu ngatta kunnaw, kagiadda nga “awan ngana tu lugar na negatibo nga emosion megafu ta panageno nga pangikallo anna kinasippo.” Megafu ta pangiyawa, ari kuruga ma-stress anna ari umatannang i blood pressure. Anna nu minangnguffun ta tanakuan i totolay ira nga natayan tu atawa, mas mabi ira nga maka-recover ta depresion.

Awan tu duda tatun. Makasta para nikaw i pangiyawa.

Pinagaram ni Jesus i disipulosna: “Mangiyawa kamu, tapenu iddan nakamu gapa na Dios ta mawag nu. Hustu nga tappang i iyawa na nikamu, natattag, napannu-pannu anna nammu-mudul paga. Ta i gukug nga iyusa nu ta ikattolay nu ay yatun gabbalaman i paggukug na Dios nikamu.” (Lucas 6:38) Nu mangiyawa ka, dakal i tiansa nga mapaguyu i totolay nga mappabalo anna mabbalin gapa tu minangngiyawa. Pakastan paga na pangiyawa i kooperasion anna pakkofun.

Nammuan na researcher ira nga maggigiammu ta pakilallang na totolay nga “i totolay nga kanayun nga mangiyawa ta baggina para ta tanakuan ay mamagaram gapa ta tanakuan nga kuan yatun.” Kakuruganna, “mapaguyu ngana i totolay nga mabbalin tu minangngiyawa ta pabbibbig paga laman ta nerumu-ruma nga annangngua na kinasippo.” Segun paga ta tadday nga research, “awayya influwensian na tadday tu tolay i dose-dosena onu maski paga ginatu nga totolay, maski nu arianna paga nakilala.” Kayà na kagian, i mittan tu pabbalin nga  minangngiyawa ta tadday tu tolay, awayyana nga egga efektona ta tadday nga tolay adde ta interu komunidad. Kayàmu kari i maddian ta kunnatun nga lugar? Wan, dakal i benefisio nu aru nga totolay i minangngiyawa.

Tadday nga ekspiriensa ta Florida, U.S.A. i mangipasingan taw nga positibo nga resulta. Nabboluntario ta relief work kabalin na masikan nga bagiu i tadday nga grupo na Saksi ira ni Jehova. Durante nga i-innaggadda ta balay nga pakappian onu pinarukadda i gamit nga usadda, nasingadda i nadaral nga gibaw na karruba, anna nabboluntario ira nga pinarukan yatun. “Kanayun ngà nga mappabalo,” nitura na karruba ta hedkuarter na Saksi ira ni Jehova. “Tadday ta pinakamasippo nga nakilalà danaw nga totolay.” Napaguyu yaya na appabalona nga mad-donate tu dakal para mosa ta kagianna nga nerumu-ruma nga trabahu na Saksi ira.

Nammuan na research ta siensia nga “kagitta na egga i mamaguyu ta totolay nga manguffun ta tanakuan.” Segun tatun, i abbarabbing ay “minangnguffun ngana maski nigeda paga maka-uvovug.” Ngatta? Megafu ta kagian na Biblia nga naparatu i totolay “ta imahe na Dios,” yari tu egga makadios nga kualidadda.—Genesis 1:27.

Tadday ta makapabbaw nga kualidad na Namaratu tam, si Jehova nga Dios, ay minangngiyawa. Niddanna ittam tu inango anna ngamin nga mawag tam tapenu mabbalin ittam tu magayaya. (Kingngua 14:17; 17:26-28) Makilala tam i nelangitan nga Yama tam anna i meddu nga gakkagna para nittam gukaban na paggigiammu ta Uvovugna, i Biblia. Mabibbig gapa tatun nga libru i probision na Dios para ta magayaya nga mappange tam. * (1 Juan 4:9, 10) Megafu ta si Jehova nga Dios i paggafuan na pabbalin tu minangngiyawa anna naparatu ka ta imahena, siguradu nga i pabbalimmu tu minangngiyawa—bilang pamarig ta Dios—ay makasta para nikaw anna malamu i faborna.—Hebreo 13:16.

Manonomu kari si Alexandra, nga nakagi ta gafu na artikulo? Anni i nesimmu ta istoriana? Maski nu kinagi na kavuluna nga pasaheru nga kinakengana laman i kuartuna, kinontak na lalaki nga inuffunanna i kokkofunna ta siudad nga pagimmangan na bus, anna napaganna insigida i $20. Sinuppal na lalaki i kinagi ni Alexandra anna nappa-Bible study. Magayaya si Alexandra nga masimmuan uli yaya ta pappasa na tallu vulan ta Chinese-language nga kombension na Saksi ira ni Jehova ta Peru. Bilang pappabalo ta ngamin nga kingngua ni Alexandra para sa, pinakanna si Alexandra anna i kakavvuluna ta restaurant-na.

Dakal i pagayaya ta pangiyawa anna panguffun ta tanakuan. Mas ngana nu moffunammu i totolay nga makilala i Paggafuan na ngamin nga mapia nga regalu—si Jehova nga Dios! (Santiago 1:17) Magayaya ka kari ta benefisio ira na kunnatun nga pangiyawa?