ARU nga relihion ta interu mundo—nelavu ngana i Romano Katoliko, aru nga simbahan na Orthodox, Budismo, anna tanakuan paga—i mangikiddaw tu celibacy ta lider anna kleroda. Ngem aru i makkagi nga yaw i gamu na nappasa ira nga iskandalo na klerigo ira ta napakaru nga relihion.

Mepangngo gafu nga meyavu, Ikiddaw kari na Biblia i celibacy para ta Cristiano ira nga ministro? Tapenu matabbag, innattam nu anni i naggafuan anna narresultanna anna nu anni i pagimamma na Dios tatun.

Mabibbig ta Encyclopædia Britannica nga i celibacy ay “i pabbalin tu ari natawan nga maruddu nga konektadu ta papel na relihioso nga ofisial onu deboto, yatutta, mebita gafu i seksual nga relasion.” Turi ta 2006, kinagi ni Pope Benedict XVI ta Konsilyo na Roma nga i fuersadu nga celibacy ay konektadu ta “tadday nga tradision nguri paga ta tiempo kabalin na pinattolay na Apostoles.”

Ngem ari tu relihioso nga kostumbre na ollu-siglo ira nga Cristiano i celibacy. Kakuruganna, nangiyawa tu pamappalan ta Cristiano ira si apostol Pablo, nga nattolay turi ollu siglo, meyannung ta totolay nga makkagi tu “mangilogo” ira nga paguvovug anna “igamma da i mangatawa.”—1 Timoteo 4:1-3.

Turi mekadua siglo, namegafu nga simillung ta simbahan ira na “Cristiano” ta Western i celibacy. Segun ta libru nga Celibacy and Religious Traditions, “mekunnay yatun ta bagu nga uso nga seksual nga pangifugag nga limittuag ta Imperio na Roma.”

Ta tumunug ira nga siglo, nipagaram na konsilyo ira na simbahan anna na kakkagiadda nga Yama ira na Simbahan i celibacy ta klero ira. Pagabboda nga makadaping anna ari metonos ta trabahu ira na klero i seksual nga pakibbiko. Ngem kagian na Encyclopædia Britannica nga “ta pangultimuan na meka-10 siglo, aru nga pari anna maski paga obispo i egga attawada.”

Nefuersa i celibacy ta klero ira ta tiempo na Konsilyo ira na Lateran turi 1123 anna 1139, nga nakua ta Roma, anna adde ta maddaggun yatun lagapa i posision na Romano Katoliko. Megafu tatun, nafugaddan na simbahan nga mapakarianan i pakapangngua anna kuartuda megafu ta pari ira nga natawan nga nangiparensia ta pakkukuada ira ta ánada.

I pagimamma na Dios ta celibacy ay manawag nga mabibbig ta Uvovugna, i Biblia. Mabbibbig taw i kinagi ni Jesus meyannung ira ta kaparehuna nga nattalupaddian nga awan tu atawada, “megafu ta passerbi da ta Pammagurayan na Dios.” (Mateo 19:12) Kunnatun gapa i kinagi ni apostol Pablo ta Cristiano ira nga nappili nga ari tu mangatawa nga kagittana “megafu ta evanghelio” na mapia nga dumug.—1 Corinto 7:37, 38; 9:23.

Ngem ari tu nikiddaw ni Jesus onu ni Pablo ta ministro ira i celibacy. Kinagi ni Jesus nga ‘neyawa’ nga regalu i pabbalin tu single anna ari tu ngamin nga tagatuttulna ay napeggan tu kunnatun. Turi ta nitura ni Pablo i meyannung ta “awan tu attawa da,” kinagina: “Awan tu makagì nira nga bilin na Yafu . . . kagiak-ku nikamu i egga ta nono ku.”—Mateo 19:11; 1 Corinto 7:25.

Fuera paga tatun, mabibbig ta Biblia i aru ira nga Cristiano nga ministro ta ollu-siglo nga egga atawada, kasali si apostol Pedro. (Mateo 8:14; Marcos 1:29-31; 1 Corinto 9:5) Kakuruganna, megafu ta grabe nga imoral nga seksual nga annangngua ta Roma tatun nga tiempo, nitura ni Pablo nga nu natawan i tadday nga Cristiano nga manangngal, mawag tu “tadday laman i atawa na” anna “minakkimoray anna minangngikakua i ána na ira.”—1 Timoteo 3:2, 4.

Yaw ira ay ari nga pagatawa nga awan tu seksual nga relasionna, megafu ta kinagi na Biblia nga “mepangngo tu kuan na lalaki i annungan na ta atawa na” anna i magatawa ay ari nga “makka-iti-itu” ta seksual nga relasiodda. (1 Corinto 7:3-5) Manawag nga ari ikiddaw na Dios i celibacy, onu mefuersa yaw ta Cristiano ira nga ministro.

Nu ari nga mefuersa i celibacy, ngatta gafu ta nipagaram ni Jesus anni Pablo i pabbalin tu single? Megafu ta dakal i oportunidad na awan tu atawana nga mallayyagayya tu mapia nga dumug ta tanakuan. Mas aru i makuada para ta baggida, megafu ta awan tu pakavurungadda nga kagittana natawan ira.—1 Corinto 7:32-35.

Innattam i ekspiriensa ni David, nga naddesision nga panawan i makasta nga trabahuna ta Mexico City anna magali ta probinsia ta Costa Rica tapenu tudduan i tanakuan ta Biblia. Nakoffun kari ta paddesision ni David i pabbalinna tu single? “Siguradu,” kunna. “Mariga i makibagay ta bagu nga kultura anna madduruma nga situasion na paddianan, ngem megafu ta baggì laman i ikavurungakku, mas mabi ngà nga nakibagay.”

Kunni Claudia nga single sister nga nagali ta lugar nga dakal i pakawagan tu evanghelisador: “Magayaya ngà masserbi ta Dios. Mapatuyag i pangurug anna i relasiokku ta Dios kada masingakku nu kunnasinà tangngallan.”

Ari tu mawag nga makadammo i pabbalin tu single. Kinagi paga ni Claudia: “Ari tu problema yatun natawan ka man onu single, magayaya ka nu iyawamu kani Jehova nga Dios i kapianammu.”—Salmo 119:1, 2.