Nabalor i karuan nga regalu ta niyawa yatun nittam na tadday nga egga ta autoridad onu na tadday nga talaga irespeto tam. Maappresia i karuan nga regalu maski nu mappo ta naggafu yatun ta meddu nga kafamilia onu ta mapattalakkan nga kofun. Kunnatun i regalu ni Russell kani Jordan, nga nakagi ta nappollu nga artikulo. Kunnasi yaw meyaplika ta regalu nga tavvu?

Ollu, kunna Biblia nga “nipasingan na Dios i pangaya na nittam ta pamaddob na ta tattadday nga Ana na toye ta utun na davvun tapenu mattolay ittam megafu sa.” (1 Juan 4:9) Yatun i mamakurug nga talaga nabalor yaw nga regalu. Awan tu maski sinni nga mas atannang i autoridadna ta Dios. ­Kinagi na Hebreo nga salmista meyannung sa: “Sikaw, nga mangngagan tu Jehova, sikaw laman i Katannangan ta interu nga davvun.” (Salmo 83:18, NW) Awan ngana tu mas atannang nga autoridad nga makeyawa nittam tu regalu.

Mekadua, i Dios i “Yama” tam. (Isaias 63:16) Kunnasi? Niddanna ittam tu inango. Tadday paga, matalo nga tattangngallanna ittam kagitta na panangngal na yama ta ánana. Inagalan na Dios i ilina ta nappasa tu Efraim tapus niyavuna: “I Efraim kari ay ari tu nabalor nga ana niakan, tadday nga meddu nga abbing? . . . I panagenoku ay napaguyu para sa. Anna siguradu nga ikalloku yaya.” (Jeremias 31:20) Kunnatun gapa i panageno na Dios ta maddayarayaw ira sa ta maddaggun. Ari laman yaya nga makapangngua-ta-ngamin nga Namaratu tam ngem matalo paga yaya nga Yama anna Kofun tam. Megafu tatun, ari kari tu espesial i maski anni nga regalu nga iyawana?

Nabalor i karuan nga regalu ta neyawa yatun megafu ta kurug nga aya, ari tu megafu ta obligasion. I kurug nga masippo nga minarregalu, awan tu ekspektanna nga katali na kinasippona.

Niyawa na Dios i Anana para nittam megafu ta iddukanna ittam. “Nipasingan na Dios i pangaya na nittam ta pamaddob na ta tattadday nga Ana na,” kunna Biblia. Ngatta kingnguana yatun? “Tapenu mattolay ittam megafu sa.” (1 Juan 4:9) Obligadu kari i Dios nga kuan yatun? Ari vuluvuga! Pangipasingan tu “inaggallallo na Dios” i tavvu nga pinagan ni Jesu-Cristo.—Roma 3:24.

Ngatta pangipasingan tu “inaggallallo” i regalu na Dios? Niyesplika na Biblia: “Nipasingan na Dios tu kuruga ayatan na ittam, ta minattagaruli ittam pagalaman turi ta natay si Cristo para nittam!” (Roma 5:8) I ari tu makasarili nga aya i namaguyu ta Dios nga egga kuanna para ta makafi, awan tu pakawayya, anna minattagaruli nga totolay. Ariattam pinabbannagan yatun nga aya, onu ariattam vuluvuga mapagan yaya. I regaluna i kadakallan nga pangipasingan tu aya ta interu historia.

Nabalor i karuan nga regalu ta dakal i nesakrifisio na nangiyawa. Nu sigga-paran nga iyawa nittam na tadday i gannug nga kuruga nabalor sa, talaga nga tagibalorattam i regalu megafu ta nesakrifisio.

Niyawa na Dios “i tattadday nga Ana na.” (Juan 3:16) Awan ngana tu tanakuan nga kuruga meddu sa nga meyawana nittam. Durante ta nabayag nga tiempo na pamaratu na Dios ta uniberso, kavuluna si Jesus anna nabbalin si Jesus tu tadday nga “kakayàna ta kagaggaw.” (Proverbio 8:30) Si Jesus i “meddu nga Ana” na Dios anna “i paningannan ta ari nga masingan nga Dios.” (Colosas 1:13-15) Awan ngana tu mas madukko paga nga relasion tatun.

Maski nu kunnatun, “arian na [Dios] nga niyetu i mismu nga Ana na.” (Roma 8:32) Niyawa ni Jehova nittam i kapianan sa. Awan ngana tu mas nabalor nga meregaluna.

Nabalor i karuan nga regalu ta neyawa natun i talaga nga kawagan, lalu nu mawag insigida. Angngariganna, talaga nga map­pabalo ka ta tadday nga boluntario nga nappaga ta pappa-urum turi ta nattaki ka tu grabe anna ariammu mapagan i gastu! ­Kuruga nabalor yatun nga regalu.

“Nu kunnasi na patay na ngamin nga totolay gafu kani Adan, kunnatun gapa i paginnolay na ngamin nga totolay gafu kani Cristo.” (1 Corinto 15:22) Bilang gaka-gaka ni Adan, ‘matay’ ittam ngamin, ariattam malillitan i efekto na taka-taki anna patay onu metoli i relasiottam ta Dios anna i marenu nga konsensia ta arubanna. Bilang tolay laman, ariattam ‘mapaginnolay’ i baggi tam onu maski sinni. Kagian na Biblia: “Ari nga matavvu na tolay i baggi na laggapa; arian na nga mapagan ta Dios i inango na . . . Ari vuluvuga makalanno i en-na nga pappaga.” (Salmo 49:7, 8) Talaga nga kawagattam i uffun megafu ta ariattam mapagan i balor na tavvu. Nu sittam laman, awan tu makua tam.

Megafu ta ayana, sigga-paran nga pinagan ni Jehova i “pappa-uru” nga kawagattam, tapenu ‘mapaginnolay i ngamin nga totolay’ gukaban ni Jesus. Kunnasi yatun nakua na tavvu? “I daga ni Jesus nga Ana na i mamakarenu nittam ta ngamin nga katagarulian.” Wan, i pangurug ta nevuvvu  nga daga ni Jesus i mangiyawa tu tiansa nga mapakoma anna mapeggan tu mannanayun nga inango. (1 Juan 1:7; 5:13) Anni gapa i makua na tavvu ta natay ira nga ideddukattam? “Nu kunnasi na dattal na patay gafu ta tadday nga tolay, kunnatun gapa tu egga i paginnolay gafu ta tadday nga tolay [Jesus].”—1 Corinto 15:21. *

Awan paga tu regalu nga naggafu ta mas atannang nga naggafuan onu neyawa megafu ta aya anne ta sakrifisio ni Jesus. Awan paga tu maski sinni nga nakeyawa tu mas dakal anne ta niyawa ni Jehova nga Dios. Anna awan tu regalu nga mas nakeyawa tu talaga nga kawagan anne ta tadday nga sakrifisio nga mamalubbang nittam ta liwa anna patay. Wan, awan vuluvuga tu regalu nga makapantay ta ari kapaga-pagan nga balor na tavvu.