GITTA na ordinario laman i pattasa tu lapis nga barangay i formana ta lima ni Jordan. Ngem tadday yaw ta pinaka-importante nga gamitna. Kunni Jordan, “niyawa yaw niakan ni Russell nga tadday nga manakam nga kofun na familiami kustu abbing ngà paga.” Ta patay ni Russell, nammuan ni Jordan nga dakal i neyuffun ni Russell kani lolo anna ta maganana kada meparubang ira ta problema. “Megafu ta mas aru paga i nammuakku meyannung kani Russell,” kunni Jordan, “nabbalin tu mas nabalor niakan yaw nga baddi nga regalu.”

Kagitta na ipasingan na ekspiriensa ni Jordan, awayyana tu i tadday nga regalu ay baddi laman onu awan tu balorna ta mata na karuan. Ngem ta minangngappresia nga nangalawa, awayyana tu kuruga nabalor yaw, onu ari paga mapaga-pagan. Kinagi na Biblia i tadday nga regalu nga ari mapaga-pagan ta popular nga uvovug: “Kuruga iddukan na Dios i mundo. Yatun tu zinog na i tattadday nga Ana na, tapenu ngamin i mangurug sa ay ari nga matay nu ari matolay ira adde ta ngangangay.”—Juan 3:16.

Makeyawa i regalu tu mannanayun nga inango ta mangalawa taw! Egga kari paga i regalu nga mas mabalor anne taw? Maski nu arianna ammu na karuan i balor natun nga regalu, ibilang yaw na kurug ira nga Cristiano tu “kuruga mangina.” (Salmo 49:8; 1 Pedro 1:18, 19) Ngatta niyawa na Dios i inango na Anana bilang regalu para ta mundo?

Nipakanawag yaw ni apostol Pablo gukaban danaw nga uvovug: “Megafu ta tadday nga tolay, egga ta utun na davvun i pattagaruli, ay i katagarulian na i nangirattal ta patay. Ay nawwara i patay ta ngamin nga totolay.” (Roma 5:12) I ollu nga tolay, si Adan, ay nakaliwa ta sinadyana nga ari mattuppal ta Dios yari tu nalawana i sentensia na patay. Megafu kani Adan, i patay ay narensia na ngamin nga gaka-gakana—i mundo na totolay.

 “I balo na pattagaruli ay patay; ngem i ari kapaga-pagan nga regalu na Dios ay i ngangangay nga pattolay gafu ta niketadday tam kani Cristo Jesus nga Yafu tam.” (Roma 6:23) Para mapalubbangan i totolay ta sentensia na patay, zinog na Dios i Anana, si Jesu-Cristo, ta davvun tapenu isakrifisiona i perfekto nga inangona para ta mundo. Megafu tatun nga sakrifisio, nga magalan tu “tavvu,” mapeggan tu mannanayun nga inango danuri egga pangurugda kani Jesus.—Roma 3:24, NW.

Meyannung ta ngamin nga bendision nga iyawa na Dios ta maddayarayaw sa gukaban ni Jesu-Cristo, kinagi ni Pablo: “Mabbala-balo ittam ta Dios ta regalu na nga ari kapaga-pagan!” (2 Corinto 9:15) Wan, kuruga makapabbaw i tavvu yari tu ariattam talaga meyesplika yatun. Ta ngamin nga regalu na Dios ta totolay, ngatta espesial i tavvu? Kunnasi nga awan tu kagittana yaw nga regalu na Dios? * Kunnasi ka mappabalo tatun? Membita ka nga bibbigan i tabbag na Biblia tatun ira nga pakkiavu ta tumunug nga dua tu artikulo.