TOPIKO NA VUNGUN | ALAWATAMMU KARI I KADAKALLAN NGA REGALU NA DIOS?
Kunnasi Ka Mappabalo ta Kadakallan nga Regalu na Dios?
“I aya ni Cristo i mammaguray nittam . . . Natay yaya megafu ta ngamin nga totolay, tapenu danuri i matolay ay ari ngana nga mattolay para ta baggi da laggapa, nu ari megafu laman kani Cristo nga natay.”
MAPAGUYU nakuan ittam nga mappabalo na tadday nga espesial nga regalu. Yatun i nipunto ni Jesus nga leksion kabalinna nga pinammapia i mafulu nga lalaki nga grabe i takida anna awan paga tu uruna ta tiempoda. Tadday ta mafulu i “nanoli . . . anna nakkukkulle nga naddayarayaw ta Dios.” Kunni Jesus: “Ari kari tu mafulu i nammapia? Sitaw i dian na siam?” (Lucas 17:
Awan tu kagittana nga regalu na tavvu. Yaw paga laman i kadakallan nga regalu nga neyawa. Kunnasi ka gafu nga mappabalo ta Dios ta kingnguana para nikaw?
-
Ammuammu i Nangiyawa. Ari tu automatiko nga mangiyawa tu mannanayun nga inango ta ngamin nga totolay i tavvu. Lallagu, kunnaw i kinagi ni Jesus ta pakimallona ta Dios: “Yaw i inango nga adde ta ngangangay: i pakannammu da tu sikaw i tattadday nga kurug nga Dios, anna i pakannammu da gapa kani Jesu-Cristo nga zinog mu.” (Juan 17:3) Nu egga nakkagi nikaw nga pinaliag naka na tadday tu tolay turi ta kabbimmu, ari ka kari maginteres nga ammuan i aru paga meyannung tatun nga tolay anna nu ngatta pinaliag naka? Ikaya ni Jehova nga Dios, nga nangiyawa ta makepaliag nga regalu nga tavvu, nga ammuammu yaya anna mapeggakka paga tu meggo nga relasion sa. Ipagaram na Biblia: “Umaranni kamu ta Dios, ay umaranni yaya nikamu.”
—Santiago 4:8. -
Mapeggan tu pangurug ta tavvu. “I sinni laman nga mangurug ta Ana na Dios ay egga sa i inango nga adde ta ngangangay.” (Juan 3:36) Anni i kayà kagian na mapeggan tu pangurug? Kayà na kagian nga egga kuammu; mawag nga egga kuammu tapenu mepasingammu i pangurug ta tavvu. (Santiago 2:
17) Anni i kuammu? Mabbalin laman tu kukuam i tadday nga regalu nu igawamu i limam anna alawatan yatun. Yari tu mawag nga gawatan anna alawatammu i tavvu. Kunnasi? Ammuan i ikaya na Dios para nikaw, anna kuammu yatun. * Makimallo ta Dios para ta kapakoma anna marenu nga konsensia. Sigga-matalo nga umaranni ta Dios nga siguradu nga meyawa na tavvu i mannanayun nga imammo, seguridad, anna makasta nga pattolay ta mappange para ira ta egga pangurugda ta tavvu! —Hebreo 11:1. -
Magatende ta Memorial na patay ni Jesus. Nigafu ni Jesus i kada ragun nga passelebra tapenu meperaddam nittam i probision na tavvu. Meyannung tatun nga okasion, kinagina: “Kuan nu yaw tu panaddamman nu niakan.” (Lucas 22:19) Daddamman na Saksi ira ni Jehova i patay ni Jesus sonu Martes, Abril 11, 2017, kabalin na pallammag na bilag. Kasali ta programa nga mattangoras i pangipakanawag ta importansia na patay ni Jesus anna nu kunnasi yatun mangiyawa tu bendision ira ta maddaggun anna ta mappange. Ta nappasa nga dagun, egga ma-20 million nga nagatende ta Memorial ta interu mundo. Magayaya kami nga imbitakka nga magatende bilang appabalo ta kadakallan nga regalu na Dios.
^ par. 7 I paggigiammu ta Uvovug na Dios, i Biblia, i kapianan nga kuan tapenu mammammu i Dios anna maparanni sa. Makkiavu ta tadday ta Saksi ira ni Jehova onu innan i website-mi nga www.pr418.com/ibg tapenu mammuan nu kunnasi kuan yatun.
Baka Kaya Mu Gapa i
MEYANNUNG NIKAMI
Memorial na Patay ni Jesus
Imbitan naka na Saksi ira ni Jehova nga magatende ta Memorial na patay ni Jesus sonu Abril 12, 2025.
MEMORIAL
Daddamman i Patay ni Jesus
Membita ka nga makipaggarammammung nikami taw nga importante nga okasion. Mammuammu nu kunnasi ka nga mabenefisiowan ta pattolay anna patay ni Jesus.
