MAPILIM KARI TALAGA I MAPPANGE MU? Kurugan na karuan nga dati ngana nakaplano onu nadestina i pattoleda, ari tu ira i nappili. Nu ariadda mala i ikayada, nonopadda ngana laman nga gagangay yatun. “Ari talaga tu para niakan!” kudda.

Madismaya gapa i tanakuan nu awan tu masingadda nga solusion taw nga marake anna awan tu hustisiana nga mundo nga paddianattam. Kuadda i ngamin tapenu mapakasta i pattoleda​—ngem egga lagapa i gerra, krimen, kalamidad, anna taki nga pakatotoli nga manaral ta planoda ira. ‘Ngatta problemakku paga?’ kudda ta baggida.

Kurug tu makafekto ta planom ira i mesissimmu ta pattolem. (Eclesiastes 9:11) Ngem nu meyannung ta mannanayun nga mappange mu, mapilim yatun. I kurug, ipasingan na Biblia nga nakadepende nikaw i mappange mu. Innan i kagianna.

Kinagi ni Moises, i lider na nasion na Israel gari, ta totolay nigeda tullung ta Nepromesa nga Davvun: “Nipay ku i inango anna patay ta arubammu, i bendision anna i pangibariaw; anna piliammu nakuan i inango tapenu mattolay ka, sikaw anna i gakam ira, gukaban na pangaya kani Jehova nga Dios mu, gukaban na pagginna ta ngaralna, anna gukaban na pattalupaddian ta nisa.”​—Deuteronomio 30:15, 19, 20.

“Nipay ku i inango anna patay ta arubammu, i bendision anna i pangibariaw; anna piliammu nakuan i inango.”​—Deuteronomio 30:19

Wan! Pinaliag na Dios i Israelita ira ta pakka-aripadda ta Ehipto anna nipena ta arubadda i iddanama na magayayya nga pattolay ta Nepromesa nga Davvun. Ngem ari tu automatiko nga mesimmu ngamin danatun. Tapenu mabendisionan ira, ‘piliadda nakuan i inango.’ Kunnasi? ‘Gukaban na pangaya ta Dios, pagginna ta ngaralna, anna pattalupaddian ta nisa.’

Kunnatun gapa sangawe i pappiliammu, anna nakadepende i mappange mu ta piliammu. Gukaban na pangaya ta Dios, pagginna ta ngaralna, anna pattalupaddian ta nisa, pili-piliammu gapa i inango​—mannanayun nga inango ta paraiso nga davvun. Ngem anni i nelagum ira tatun?

Aya i primeru nga kualidad na Dios. Nitura ni apostol Juan nga “i Dios ay aya.” (1 Juan 4:8) Yatun tu turi ta neyavu kani Jesus nu anni i kadakallan ta ngamin nga bilin, kunna: “Ayatam-mu i Yafu nga Dios mu ta interu nga futum, interu nga ikararuam anna ta interu nga nono mu.” (Mateo 22:37) Nebase nakuan ta aya i kurug nga relasion kani Jehova nga Dios, ari tu ta assing onu basta pattuppal ngana laman. Ngatta gafu piliattam nakuan nga ayatan yayya?

Kaparehu na pangaya ni Jehova ta totolay i pangaya na meddu ira nga magana ta ánada. Maski nu imperfekto i meddu ira nga magana, tudduan, pasikannan, suportan, anna disiplinadda i ánada ta ikayada nga magayayya anna makasta i pattuppaladda. Anni gafu i ekspektan na magana ira? Ikayada nga ayatan ira na ánada anna ipafutuda i tuttudduda para ta pammakapianadda. Ari kari nga rasonable gapa nga ekspektan na perfekto nga nelangitan nga Yama tam nga appresiattam i ngamin nga kingnguana para nittam?

Ta orihinal nga lengguahe na Biblia, nelagum ta uvovug nga “magginna” i “mattuppal.” Ari kari tu yaw i kayà tam kagian nu kagiattam ta abbing, “Magginna ka ta magana mu”? Kebalinan gafu na pagginna ta ngaral na Dios i paggigiammu anna pattuppal sa. Ariattam literal nga maginna i ngaralna, magginna ittam gafu sa nu bibbigan anna iyaplika tam i Uvovugna, i Biblia.​—1 Juan 5:3.

Tapenu ipasingan i balor na pagginna ta ngaral na Dios, kunni Jesus: “Ari laman tu pan i pakkatolay na tolay, ngem mawag na ngamin i uvovug nga maggafu ta Dios.” (Mateo 4:4) Nu kunnasi nga importante nittam i literal nga makan, mas ngana i pangà tu pakannammu meyannung ta Dios. Ngatta? Niyesplika na masirib nga si Patul Solomon: “Proteksion i sirib nu kunnasi nga proteksion i kuartu, ngem yaw i bentaha na pakannammu: Pattalupaddianan na sirib i inango na makakkua taw.” (Eclesiastes 7:12) Proteksion anna uffun nittam i pakannammu anna sirib maggafu ta Dios tapenu masirib nga makapappili anna malawà tam i mannanayun nga inango.

Nonopan i ilustrasion ni Jesus nga nikonsidera tam ta nappasa nga artikulo, nga kinagina: “Atazzi i trangka anna asilo i dalan nga mappange ta inango, ay pilippiga i makaleg tatun.” (Mateo 7:13, 14, NW) Ta pallakag tatun nga dalan, siguradu nga pammakapianattam nu egga eksperto nga mangigiya nittam anna mattalupaddiattam nga madukko nisa tapenu madde tam i destinasiottam​—mannanayun nga inango. Egga gafu makasta nga rasottam nga maddukko ta Dios. (Salmo 16:8) Kunnasi tam kuan yatun?

Kadaggaw, aru i mawag nga kuattam anna aru gapa i kayà tam kuan. Ufutan natun i oras tam yatun tu baddi onu awan ngana tu tiempo tam nga pannonopan i ikaya na Dios nga kuattam. Iperaddam gafu na Biblia: “Arian nu nga parigan i totolay nga awan tu uto; parigan nu danuri i nannono. Ta kegga paga na lugar nu, kuan nu ngamin i adde na awayya nu . . . ta kuruga marakay i tiempo.” (Efeso 5:15, 16) Maddukko ittam ta Dios nu i relasiottam sa i pinaka-importante ta pattoletam.​—Mateo 6:33.

Ariammu ngana moli i nappasam, ngem egga ira makuam tapenu makkasta i mappange mu anna na iddeddukammu ira. Kagian na Biblia nga iddeddu ittam na nelangitan nga Yama tam, si Jehova nga Dios, anna nitudduna nu anni i ikayana nga kuattam. Innan i kinagi ni profeta Mikias:

“Kinagina nikaw, O tolay, i mapia. Anna anni i ikikkiddaw nikaw ni Jehova? Mangipasingakka laman tu hustisia, tagibaloran i kinamatalo, anna lumakag tu mepangngo kavulu na Dios mu!”​—Mikias 6:8.

Akseptammu kari i imbitasion ni Jehova nga lumakag kavuluna tapenu malawà mu i mannanayun ira nga bendision nga nipreparana? Sikaw i mappili!