ANNI KASTANA NGA IDDANAMA! Nipromesa na Namaratu nga iddanna ittam tu mannanayun nga inango, taw mismu ta davvun. Ngem aru i marigatan nga mangurug tatun. ‘Matay i ngamin,’ kudda. ‘Parte yatun na gagangay nga siklo na inango anna patay.’ Ta karuan gapa, posible i mattolay tu mannanayun ngem ari tu ta davvun. Kagiadda nga mattolay ka laman tu mannanayun kabalimmu matay anna umay ka ta langi. Anni makagim?

Nige mu tabbagan, innammu labbi i tabbag na Biblia taw ta tallu nga pakkiavu: Kunnasi ipasingan na kaparatu na tolay i kapiddu nakuan na pattolena? Anni i orihinal nga gakkag na Dios ta davvun anna ta totolay? Ngatta matay i tolay?

Ta ngamin nga matolay nga pinaratu na Dios ta davvun, talaga espesial i totolay. Ngatta? Kagian na Biblia nga i totolay laman i naparatu ta “imahe” na Dios. (Genesis 1:26, 27) Anni kebalinan natun? Neddan i totolay tu personalidad anna kualidad ira nga kaparehu na Dios, gittana aya anna hustisia.

Neddan paga i totolay tu abilidad nga mannono anna marrason, mammuan i mapia ta marake, anna mapeggan tu madukko nga relasion ta Dios. Yayya nga maappresia tam i gloria na uniberso anna i makapabbaw nga pinaratu ira, maski i art, musika, anna berso. I pinaka-importante, egga kapasidad na tolay nga maddayaw ta Namaratu. Danatun nga abilidad i mamadduma ta totolay ta tanakuan ira nga matolay nga pinaratu ta davvun.

Nonopan gafu: Iyawa kari na Dios ta totolay danatun nga makakkasta nga kualidad, anna i awan tu limitasionna nga potensial nga mapakasta danatun, nu mattolay ittam gammabba tu piga ragun laman? I kurug, niyawa na Dios ta totolay danaw nga nerumu-ruma nga kualidad anna abilidad tapenu magayayya ittam ta pattolay tu mannanayun taw mismu ta davvun.

Kunna karuan nga ari vuluvuga ginakkag na Dios nga mattolay tu mannanayun ta davvun i totolay. Pagabboda nga nadisenio i davvun nga temporario nga paddianan tapenu mapurueban i totolay nu sinni i mepangngo nga umay ta langi anna mattolay tu mannanayun kavulu i Dios. Ngem nu kurug yatun, ari kari tu gittana i Dios i makalliwa ta ngamin nga kinarake ta davvun? Mekontra yatun  ta personalidad na Dios. Kagian na Biblia meyannung sa: “Ta hustisia i ngamin nga dala-dalanna. Tadday nga Dios na kinamatalo nga ari vuluvuga nangipasingan tu kawan tu hustisia; fustu anna matunung yayya.”​—Deuteronomio 32:4.

Manawag nga kinagi na Biblia i orihinal nga gakkag na Dios ta davvun ta pakkagina nga: “I langi ay kua na Y_AFU laman, ngem niyawa na ta tolay i davvun.” (Salmo 115:16) Wan, pinaratu na Dios i davvun nga mabbalin tu makakkasta anna permanente nga paddianan na tolay. Pinannuna yaw ta ngamin nga mawag tam tapenu magayayya anna awan tu adde na pattoletam.​—Genesis 2:8, 9.

“I langi ay kua na Y_AFU laman, ngem niyawa na ta tolay i davvun.”—Salmo 115:16

Manawag gapa ta Biblia i gakkag na Dios ta tolay. Nibilinna ta ollu nga magatawa nga tolay nga ‘pannuadda i davvun anna imagurayadda, anna pappasakupadda i kada sigga-matolay nga pinaratu nga magguyu-guyu ta davvun.’ (Genesis 1:28) Pribilehioda nga tangngallan anna palawan i Paraiso ta interu davvun! I pattolay nakuan gafu da Adan anni Eva anna na mabbalin tu ánada ay mannanayun ta davvun, ari tu ta langi.

Ngatta gafu matay ittam? Ipasingan na Biblia nga tadday ta espiritu nga pinaratu na Dios, nga nabbalin tu Satanas nga Diablo, i namurueba nga manaral ta unnug na Dios ta Eden. Kunnasi?

Kinumbinsi ni Satanas i ollu nga magana tam, da Adan anni Eva, nga marrebelde gapa ta Dios. Turi ta kinagi ni Satanas nga egga iyeyetu na Dios nira​—i kepangngattan nga maddisidi ta baggida nu anni i fustu anna ugo​—pinilida si Satanas anna narrebelde ira ta Dios. Anni resultana? Ari nabbayag, natay ira, gittana kinagi na Dios. Nawawadda i tiansa nga mattolay tu mannanayun ta Paraiso nga davvun.​—Genesis 2:17; 3:1-6; 5:5.

Nakafekto ta ngamin nga totolay adde sangawe i parrebelde da Adan anni Eva. Kagian na Biblia: “Megafu ta tadday nga tolay [si Adan], egga ta utun na davvun i pattagaruli, ay i katagarulian na i nangirattal ta patay. Ay nawwara i patay ta ngamin nga totolay.” (Roma 5:12) Matay ittam megafu ta narensia tam i liwa anna patay ta orihinal nga magana tam, ari tu megafu ta dati nga nadestina anna ari malippawa nga ‘plano’ na Dios.

Ari nafugaddan na rebelyon ta Eden i orihinal nga gakkag na Dios ta tolay anna ta davvun. I perfekto nga aya anna hustisia na Dios i namaguyu sa nga magangngua tu dakkua tapenu mapalubbangan ittam ta narensia nga liwa anna patay. Niyesplika ni apostol Pablo: “I balo na pattagaruli ay patay; ngem i ari kapaga-pagan nga regalu na Dios ay i ngangangay nga pattolay gafu ta niketadday tam kani Cristo Jesus nga Yafu tam.” (Roma 6:23) Meddu nga niyawa na Dios i “tattadday nga Ana na [si Jesu-Cristo], tapenu ngamin i mangurug sa ay ari nga matay nu ari matolay ira adde ta ngangangay.” (Juan 3:16) Gukaban na sigga-paran nga pangisakrifisiona ta baggina nga tavvu, nitoli ni Jesus i ngamin nga nawawan ni Adan. a

Aranni ngana mesimmu i promesa na Dios nga paraiso nga davvun. Malawà mu yaw nga makakkasta nga mappange nu ipafutum i bilin ni Jesus: “Tullung kamu ta atazzi nga trangka, megafu ta dakal i trangka anna alawa i dalan nga mappange ta kadaral, anna aru i tuttullung tatun; ngem atazzi i trangka anna asilo i dalan nga mappange ta inango, ay pilippiga i makaleg tatun.” (Mateo 7:13, 14, NW) Wan, nakadepende nikaw i mappange mu. Anni gafu i kuammu?