Melayyagayya i mapia nga dumug na Pappatulan na Dios ta interu mundo, gittana niprofesiya ni Jesus. (Mateo 24:14) Kagian nittam na libru na Biblia nga Daniel nga gobiernu na Dios yaw nga Pappatulan. Egga profesiya ta kapitulo 2 natun nga libru nga mangipasingan ta patturunug na makapangngua ira nga gobiernu, onu pappatulan, na tolay mamegafu ta Babilonia tagga adde ta kaggawattam. Kunnaw i niprofesiya na bersikulo 44 nga mesimmu:

“Mamataddag i Dios na langi tu pappatulan nga ari vuluvuga madaral. Ni tu meyawa yaw nga pappatulan ta tanakuan nga totolay. Daralan anna pangultimuanna ngamin danaw nga pappatulan, ay yaw laman i mannanayun noka.”

Kagian naw anna na karuan paga nga profesiya na Biblia nga talianan na Pappatulan na Dios i ngamin nga pammaguray na tolay anna mangirattal tu tuyag anna unnug ta davvun. Kunnasi i pattolay nga sakup na Pappatulan? Yaw i karuan ta makakkasta nga promesa nga aranni ngana matuppal.

• AWAN NGANA TU GERRA

  Salmo 46:9: “Pagimmangan [na Dios] i gerra ira ta tanga-ravvunan; i pana anna pika ira ay en-na kata-kattuan, anna i kalatag ira ay en-na nga tuggian!”

  Nonopan i paddia-paddian na mundo nu ngamin nga kuartu anna abilidad nga momosa sangawe ta pamadday tu armas ira ay mosa para ta pammakapianan na totolay imbes tu ta kapateda! Matuppal yatun nga promesa ta pammaguray na Pappatulan na Dios.

• AWAN NGANA TU TAKI

  Isaias 33:24: “Awan noka tu maski sinni nga mangikagi: ‘Mataki ngà.’”

  Nonopan i mundo nga awan tu mazziga megafu ta taki ta futu, cancer, malaria, onu tanakuan paga. Ari ngana mawag i hospital anna medisina. Perfekto nga gawa-gawayyan i mappange na totolay.

• ARI NGANA MAKKURANG I MAKAN

  Salmo 72:16: “Aru paray i magatab ta koman ira; matakkabban paray i kavukiran ta mula-mula.”

  Mavvunga i davvun tu makalanno nga makan, anna mapeggan i ngamin tatun. Awan ngana tu bisin anna malnutrision.

• AWAN NGANA TU PATTANGI, DADDAM, ANNA PATAY

  Nepakannammu 21:4: “Funatan [na Dios] ngamin i lulua da nga manuru, anna awan ngana noka tu matay, onu maraddam, onu tumangi-tangi, onu magattam ta taki. Ta napawan ngana ngamin i dana nga ganna-gannug.”

   Kayàna kagian, perfekto anna mannanayun nga pattolay ta paraiso nga davvun! Yatun i nipromesa na meddu nga Namaratu nittam, si Jehova nga Dios.

Mesimmu kari ngamin danaw? Maski umanugu i aru nga kakkasta i pattolay nga nepromesa anna nakagi ta Biblia, mariga nga alippawatan na magaru i pattolay tu mannanayun. Ari nga kattaka-taka yatun, ta awan paga tu tolay nga naka-ekspiriensa tu kunnatun nga pattolay tapenu iyistoriana.

Naaripan i totolay ta liwa anna patay anna attattammadda i taki, ziga, anna kapurueba ta nabayag ngana nga tiempo yari tu gittana normal onu gagangay ngana laman i kunnaw nga klase na pattolay. Ngem arayyu yatun ta ginakkag na Namaratu nittam, si Jehova nga Dios.

Tapenu mangurug ittam nga mesimmu i ngamin nga nipromesana, kinagi na Dios meyannung ta uvovugna: “Ari yaw manoli niakan nga awan tu resultana, nu ari siguradu nga ituppal naw i anni laman nga pagayatakku, anna siguradu nga mavviktoria yaw ta gannug nga pamaddobakku.”​—Isaias 55:11.

Natukoy si Jehova ta Biblia nga i Dios nga “ari vuluvuga nga malladdug.” (Tito 1:2) Megafu ta nipromesana ngamin danaw nga makakkasta nga gannug para ta mappange, masirib nu pannonopattam: Talaga kari posible ta totolay nga mattolay tu mannanayun ta nepromesa nga Paraiso ta davvun? Anni i mawag nga kuattam tapenu mabenefisiowan ta promesa na Dios? Ta tumunug ira nga pahina naw nga publikasion, egga ira makoffun nga informasion nga makatabbag tatun ira nga pakkiavu.