Nammuattam ta gafu i istoria na pangilogo na orakulo na Delphi kani Croesus, nga narresulta ta kaffuna ta patul na Persia. Ngem mabibbig ta Biblia i importante nga profesiya, kasali i patul na Persia, nga natuppal i kada detalyena.

Ma-200 dagun nigena​—nabayag nga tiempo nige nga neyana i patul​—kinagi na Hebreo nga profeta nga si Isaias i ngagan ni Ciro anna niyilustrana i panakupna ta makapangngua nga siudad na Babilonia.

Isaias 44:24, 27, 28: “Yaw i kinagi ni Jehova, . . . ‘i Tadday nga makkakkagi ta aralam nga dana-danum, “Mabbalikka tu allag, anna pamagakku i ngamin nga bannag mu”; i Tadday nga makkakkagi meyannung kani Ciro, “Yayya i pastor ku, anna interamente nga ituppalna i ngamin nga urè”; i Tadday nga makkakkagi meyannung ta Jerusalem, “Mepataddag uli yayya,” anna meyannung ta templo, “Mapadday i fundasiommu.”’”

Segun ta Griego nga historiador nga si Herodotus, nilisi na armada ni Ciro i danum na Bannag Eufrates, nga umagi ta siudad na Babilonia. Nakatallung ta siudad i suddalu ira ni Ciro megafu ta estratehiyana. Kabalinna nasakup i siudad, pinalawan ni Ciro i Judio ira nga naaripan ta Babilonia anna pinamavulunanna ira nga manoli anna ipataddag uli i Jerusalem, nga nadaral 70 dagun ngana i nappasa.

Isaias 45:1: “Yaw i kinagi ni Jehova ta sinullona, kani Ciro, nga agga-gafu ku i ziwanan nga limana tapenu mamatulu tu nasa-nasion ta arubanna, tapenu mangari tu armas na patul ira, tapenu vukatan ta arubanna i doble nga puerta, ta nu kunnuri ay ari meserra i trangka ira.”

Nakatallung i Persiano ira ta daka-dakal nga doble nga puerta ta pader na siudad nga agga-vuka. Nu ammu na Babilonio ira i plano ni Ciro, niserrada nakuan i ngamin nga trangka. Ngem gittana nesimmu, awan tu awa-awayya na siudad.

Tadday laman yaw ta aru nga importante nga profesiya ta Biblia nga eksakto nga natuppal. a Ari tu kagitta na prediksion ira na totolay, nga kagiadda nga naggafu ta falsu ira nga diosda, naggafu i profesiya ira na Biblia ta Tadday nga nakkagi: “Ta gafu ay kinagì ngana i mesimmu, anna ta nabayag ngana nga tiempo i ganna-gannug nga ari paga nakua.”​—Isaias 46:10.

 I kurug laman nga Dios, si Jehova, i makekagi tatun. I kebalinan na ngaganna ay “Mawayyana nga Pabbalinan.” Ipasingan natun i abilidadna nga ammuan anna maniobran i mappange ira nga mesimmu mekunnay ta urena. Ipasiguraduna nittam nga talaga tuppalanna i ngamin nga nipromesana.

Kayà mu kari mammuan i profesiya ira na Biblia meyannung ta kaggawattam? Ma-2,000 dagun ngana i nappasa, niprofesiya na Biblia nga duttal i “ziga-riga” ta “pangurianan ira nga aggaw.” Pangurianan nga aggaw na anni? Ari tu na davvun onu totolay, ngem na gulu, panattazzi, anna ziga nga mesissimmu ta totolay ta nabayag ngana nga tiempo. Innattam i piga nga profesiya nga seniales na “pangurianan ira nga aggaw.”

2 Timoteo 3:1-5: “Ta pangurianan ira nga aggaw . . . , ayatan na totolay i baggi da laman, anna kuartu laman i agga-nono da. Palagopog noka ira, minappakatannang, minangnguyu-uyaw, ari nga manguru-kurug ta magana da, ariad-da nga ammu i mabbala-balo, anna awan tu agganassing da ta Dios . . . , manattazzi paga noka ira, awan tu allo da ta ikattolay da, mamara-parake ira, ariad-da nga matangngallan i baggi anna nono da, kitapporay, anna ikalussaw da noka i mapia . . . , traidor paga noka ira, ariad-da nonopan i kuad-da, atatannang i paningannad-da ta baggi da, anna i ala-alerad-da noka i pappaga-pagayaya laman anne ta Dios. Appe tumuttul ira ta relihiot-tam ngem panakitad-da nga pangulian i kata-katolay da.”

Umanugu ka kari nga kunnatun i ugu-ugali na totolay sangawe? Masingammu kari nga napalevutattam tu totolay nga makasarili, minangngaya ta kuartu, anna minappakatannang? Naobserbam kari nga itagga lagapa na totolay i kayàda anna manakida tumuttul ta tanakuan? Magga nasifutammu nga aru i ari manguru-kurug ta maganada anna mas ayatadda i pappaga-pagayayya anne ta Dios. Marrarake i situasion kadaggaw.

Mateo 24:6, 7: “Maginna nu noka i guni na gerra ira. . . . Maggegerra noka i nasa-nasion, kunne na gapa ta pappatulan ira.”

Segun ta pattantia, maturu tu 100 million i natay ta gerra ira anna parralaban namegafu ta 1914. Mas dakal yaw anne ta interu populasion na aru nga nasion. Nonopan i lulua, daddam, anna ziga-riga megafu tatun. Napaggang kari ngana i nasa-nasion anna manakida ngana makiggerra?

Mateo 24:7: “Mabbisin i totolay.”

Kagian na World Food Programme: “Ta mundo nga makalanno i makan tapenu mapakan i ngamin, 815 million nga tolay​—tadday ta siam​—i makkatrug nga mabisin ta kada gabi. Fuera paga tatun​—tadday ta tallu​—i maka-ekspiriensa ta malnutrision.” Natantia nga kada ragun, tallu million nga abbing i matay ta bisin.

Lucas 21:11: “Egga noka i masikan ira nga lunig.”

Kada ragun, egga 50,000 nga masikan nga lunig nga matageno na tolay. Egga 100 nga lunig nga manaral ta building ira, anna tadday nga kuruga masikan nga lunig i mesimmu kada ragun. Ta tadday nga pattantia, 471,000 i natay ta lunig ta nallatanan na 1975 anna 2000.

Mateo 24:14: “Melayya-gayya noka ta tanga-ravvunan yaw nga Mapia nga Dumug na Pammaguray na Dios tapenu kannammuan na ngamin nga sinolay. Ta kabalin naw, duttal ngana i panuppalan.”

Mallayyagayya tu mapia nga dumug na Pappatulan na Dios ta interu mundo ta 240 nga davvun i Saksi ira ni Jehova nga mabbilang tu maturu walu million. Ilammuyagda i mapia nga dumug ta darakal nga siudad anna ta unu-unag ira nga bario, ta kakayuan, anna ta vuku-vukig. Neprofesiya nga nu nabaling ngana yaw nga trabahu segun ta ikaya na Dios, “duttal ngana i panuppalan.” Anni kayà kagian natun? Mangultimo ngana i pammaguray na tolay anna mamegafu i pammaguray na Pappatulan na Dios. Anni ira nga promesa i matuppal na Pappatulan na Dios? Ituloy mu i pabbibbig.