Nanono mu kari ngana i mappange mu anna na familiam? Marriku kari onu mazziga i pattolenu, napannu tu aya onu daddam? Mattolay ka kari tu mabayag, onu mabi ka matay? Nononopan na totolay danatun nga pakkiavu ta rinivu nga dagun.

Giggigiammuan na eksperto ira sangawe i mesissimmu ta mundo anna kagiadda i prediksiodda ta mappange. Aru gapa ta prediksiodda i nesimmu, ngem naffaliu i karuan. Angngariganna, ta 1912, nipredikta ni Guglielmo Marconi, imbentor na tadday nga wireless telegraph nga: “Mamagimmang ta gerra i paddattal na wireless era.” Tadday nga ofisial ta Decca Record Company, nga nammanaki ta Beatles ta 1962, i mangurug nga mallaus i grupo ira nga mattugtug tu gitara.

Aru i maddepende ta kokkomforme ira nga gannug meyannung ta mappange. Mappegiya i karuan ta astrologo ira; kanayun nga mabibbig ta aru nga magazina anna diariu i horoscope ira. Mappalavvun i tanakuan onu umay ta psychic ira nga makkagi nga “mabibbigda” i mappange gukaban na baraha nga tarot, numero, onu palag na tadday.

Tapenu mammuadda i mappange, nakkonsulta i karuan tagga ta orakulo ira​—papari nga mangiyawa tu informasion maggafu ta dios nga irepresentada. Angngariganna, kagiadda nga nangiyawa tu mangina ira nga regalu si Patul Croesus na Lydia ta orakulo ta Delphi, Greece tapenu ammuan i resultana nu makillaban yayya kani Ciro na Persia. Kinagi na orakulo nga madaral ni Croesus i “dakal nga imperio” nu makiggerra yayya kani Ciro. Nakillaban si Croesus ta abbona tu mavviktoria yayya, ngem i mismu dakal nga imperiona i nadaral!

Awan tu kwenta na ari manawag nga prediksion na orakulo. Maski sinni i nangaffu ta gerra, fustu lagapa nga dakal nga imperio i nadaral. Nawawan ni Croesus i ngamin megafu ta ugo nga informasion. Mas makasta kari i nattuppalan danuri maddeddepende ta popular ira nga metodo sangawe na pallavvun ta mappange?