NAKAEKSPIRIENSA ka ngana kari tu madaddammo nga panageno nga kayà mu ngana i matay? Matindiammu gafu i natageno ni Adriana. Nakatageno yayya tu sobra nga pavvuru-vurung, daddam, anna kawan tu iddanama. Egga clinical depression ni Adriana.

Ikonsidera gapa i taga-Japan nga si Kaoru nga nanangngaw ta mataki nga bako anna lakay ngana nga maganana. Kunna: “Tatun nga tiempo, nababbannag ngà ta pressure ta trabahu. Awan tu ganas ku kuman anna ari ngà makakatrug tu mapia. Nanono ku nga mawawan i problemà ira nu matay ngà ngana laman.”

Kagian ni Ojebode nga taga-Nigeria, “Kanayun ngà maraddam adde ta makatangi ngà, yayya nga binalakku i mappakamatay.” Pia ngana laman ta ari nappakamatay da Ojebode, Kaoru, anna Adriana. Ngem kada ragun, ginatu nga rivu i mappakamatay.

Lallaki i aru ta mappakamatay, anna maruddu nga mappasiran ira nga mappoffun. Kinagi ni Jesus nga kawagan na mataki ira i tadday nga manguru. (Lucas 5:31) Nu madeddepres ka gafu nga manono mu ngana i mappakamatay, ariammu nakuan mappasiran nga mappoffun. Nammapia anna nakapagattam i aru nga nadepres, megafu ta nappadoktor ira. Nakkasta i gawa-gawayyan da Ojebode, Kaoru, anna Adriana kabalidda nappadoktor.

Mangiyawa i doktor ira tu medisina onu uruadda i nadepres ira gukaban na pakiyuvovug nira. Mawag gapa na nadepres ira i pangalippawa, pappasensia, anna panangngaw na familia anna kokkofudda. Si Jehova nga Dios i kapianan nga kofun ta ngamin. Uffunanna ittam gukaban na Uvovugna, i Biblia.

Posible nga mawag na nadepres ira i apaddu nga papporu anna awayyana nga mawagda ulian i istilo na pattoleda. Ngem maski nu depres ka, magiddanama ka ta magayayya nga mappange, gitta ni Ojebode. Kinagina, “Iinnaggakku i ketuppal na Isaias 33:24 nga mangiprofesiya ta tiempo nga awan ngana tu makkagi nga ‘mataki ngà.’” Kagitta ni Ojebode, makapattalo ka ta promesa na Dios nga “bagu nga davvun” nga awan ngana noka tu “magattam ta taki.” (Nepakannammu 21:1, 4) Kayà kagian natun nga promesa nga mapawan ngana i mental anna emosional nga taki. Mawawan ngana i taki nga mataga-tageno mu. “[Ariammu] ngana manono . . . ni mepafutu paga danatun” nga taki nga mataga-tageno mu.​—Isaias 65:17.