Ta nappasa nga artikulo, nagigiammu tam i niyawa ni Jesus nga seniales. Yatun nga seniales ay masingan nga pamakurug nga nepataddag ngana ta langi i Pappatulan na Dios nga si Jesu-Cristo i Patul.

Kagian na Biblia nga ta pammaguray ni Jesus, papanawanna si Satanas anna i demoniona ira ta langi. Mainfluwensiadda ngana laman i davvun. Yaw i tadday ta rason nu ngatta narrarake i situasion namegafu ta dagun 1914.​—Nepakannammu 12:7, 9.

Maski ta marrarake nga situasion ta mundo, egga ira kiningngua ni Jesus, i Patul ta Pappatulan na Dios, tapenu duffunan i totolay ta interu mundo. Gafu ta panuddu tu Biblia ta interu mundo nga niprofesiya ni Jesus, aru i makagigiammu anna mangiyaplika ta prinsipio ira na Biblia ta inaggaw nga pattoleda. (Isaias 2:2-4) Minillion i nakagigiammu nu kunnasi mabbalin tu magayayya i familiada anna ari nga pabbalinan nga pinaka-importante ta pattoleda i trabahu onu material nga gannug. Matuttudduan ira nu kunnasi mapakasta i pattoleda sangawe anna mabbalin tu klase na tolay nga ikaya na Dios nga mabbalin tu sakup na Pappatulanna.

Maski nu mammaguray ngana si Jesus ta langi, totolay paga laman i mammaguray ta davvun. Ngem zinog na Dios si Jesus: “Pammagurayam-mu i kokontram.” (Salmo 110:2) Aranni ngana nga interamente nga daralan ni Jesus i ngamin nga kumokkontra anna banna-bannayanna i ngamin nga maya mattuppal ta Dios.

Tatun nga tiempo, magguyu i Pappatulan na Dios tapenu

• Daralan i falsu nga relihion. Mapawan i relihion ira nga namazziga ta totolay anna nangituddu tu kinaladdug meyannung ta Dios. Nigitta na Biblia i falsu nga relihion ta babay nga minakkigannug. Aru noka i makaddag ta kadaralna.​—Nepakannammu 17:15, 16.

• Alsan i pammaguray na totolay. Magguyu i Pappatulan na Dios tapenu pangultimuan i ngamin nga pammaguray na totolay.​—Nepakannammu 19:15, 17, 18.

• Daralan i marake nga totolay. Kunnasi gapa danuri pakakuadda i magangngua tu marake anna manakida nga mattuppal ta Dios? “Malsa noka ta davvun i marake ira.”​—Proverbio 2:22.

• Daralan si Satanas anna i demoniona ira. Ari ngana vuluvuga melogo ni Satanas anna na demoniona ira i totolay.​—Nepakannammu 20:3, 10.

Anni i efekto natun ta totolay nga mappasakup ta Pappatulan na Dios?

Mas paga anne ta makua na mammaguray nga totolay i kuan ni Jesus nga Patul ta langi. Makipammaguray nisa i 144,000 nga napili ta totolay. (Nepakannammu 5:9, 10; 14:1, 3) Siguraduanna nga mesimmu i uray na Dios taw ta davvun. Anni i kuan na Pappatulan na Dios para ta maddian ira ta davvun?

• Pawananna i taki anna patay. “Awan noka tu maski sinni nga mangikagi: ‘Mataki ngà,’” anna “awan ngana noka tu matay.”​—Isaias 33:24; Nepakannammu 21:4.

• Irattalna i kurug nga imammo anna seguridad. “Mannanayun nga memammo i ána mu ira,” anna “magitubang noka i kada tadday nira ta lirum na fun na ubasna anna ta lirum na kayu na igosna, anna awan noka tu mamaganassing nira.”​—Isaias 54:13; Mikias 4:4.

• Mangiyawa tu makapagayayya nga trabahu. “I trabahu na limi-lima na napilì ira ay pagayayyatadda tu mapia. Ari ira mabbannag para ta awan.”​—Isaias 65:22, 23.

• Solbanna i makadaral ira ta pallevu. “Magayayya noka i tana-tana anna i mamaga nga davvun, ay mappalupagia noka i disierto anna mallappaw nga kagitta na safron.”​—Isaias 35:1.

• Tudduanna i totolay ta mawag nga kuadda tapenu makapattolay tu mannanayun. “Yaw i inango nga adde ta ngangangay: i pakannammu da tu sikaw i tattadday nga kurug nga Dios, anna i pakannammu da gapa kani Jesu-Cristo nga zinog mu.”​—Juan 17:3.

Ikaya na Dios nga malawa mu yatun ira nga bendision. (Isaias 48:18) Ipakanawag na tumunug nga artikulo i makuam sangawe tapenu malawa mu yaw nga makakkasta nga mappange.