Kunni Jesus: “Maggegerra noka i nasa-nasion tuange gapa ta pappatulan ira. Egga noka i masikan ira nga lunig, bisin anna palakag nga tulu-tulagan ta madduma-ruma nga lugar.” (Lucas 21:10, 11) Kagitta na galli ira nga bumuu ta fingerprint, ngamin gapa danaw nga mesimmu ay manawag nga bumuu ta seniales. Kagitta na fingerprint nga pagisenialan ta tadday nga tolay, ngamin gapa danaw nga maggiriddang nga mesimmu ay pagisenialan nga “aranni ngana nga duttal i Pammaguray na Dios.” Nesimmu ngana kari danatun nga maggiriddang anna ta interu mundo? Innan i ebidensia ira.

1. GERRA IRA

Ta 1914, nabbatta i gerra nga nakafekto ta mas aru nga tolay anna lugar anne ta nappasa ira nga gerra! Maruddu nga ikonsidera na historiador ira nga dakal i efekto ta mundo na dagun 1914 gafu ta taw namegafu i World War I. Taw nga gerra, aru i nosa nga tangki nga pakiggerra, bomba nga medanna maggafu ta eroplano, machine gun, kappatay nga gas, anna karuan paga nga kappatay nga armas. Sinuntubag yaw na World War II, i gerra nu sitaw nosa i atomiko ira nga armas. Namegafu ta 1914, kana-kanayun ngana nga maggegerra i totolay ta nadduruma nga lugar. Minillion nga totolay i natay tatun ira nga gerra.

2. LUNIG IRA

Segun ta Britannica Academic, egga 100 nga masikan nga lunig nga “daka-dakal i perwisiuna” kada ragun. Kagian gapa na United States Geological Survey nga “segun ta rekord (namegafu ta 1900), ekspektattam i 16 nga masikan nga lunig kada ragun.” Kurugan na karuan nga minaru i bilang na lunig gafu ta mas makasta ngana i rimienta ira nga paddetek ta lunig ira. Ngem yaw i kurug—napakaru nga totolay i mazziga-riga anna matay gafu ta masikan ira nga lunig ta interu mundo.

 3. BISIN

Aru i mabbisin ta interu mundo gafu ta gerra, korapsion, problema ta ekonomia, marake nga panangngal ta agrikultura, onu kawan tu papplano para ta marake nga tiempo. Kagian na “2018 Year in Review” na World Food Programme: “Ta interu mundo, 821 million nga totolay i makkurang ta makan anna 124 million tatun i awan tu makadda.” Ma-3.1 million nga abbing i matay kada ragun gafu ta malnutrision. Ta 2011, yaw i makagafu ta ma-45 porsiento na abbing nga natay ta interu mundo.

4. TAKI ANNA EPIDEMIA IRA

Kagian na tadday nga publikasion na World Health Organization: “Aru ngana i grabe nga epidemia ta meka-21 nga siglo. Nanoli i dana ira nga taki gittana cholera, plague anna yellow fever anna egga limittuag ira nga bagu gittana SARS, pandemic influenza, MERS, Ebola anna Zika.” I COVID-19 pandemic i pinakabagu. Maski nu aru ngana i nagigiammu na sientista anna doktor ira meyannung ta taki ira, ariadda lagapa nakaleg tu uru para ta ngamin nga taki.

5. PALLAYYAGAYYA TA INTERU MUNDO

Kinagi ni Jesus i tadday paga nga parte na seniales: “Melayya-gayya noka ta tanga-ravvunan yaw nga Mapia nga Dumug na Pammaguray na Dios tapenu kannammuan na ngamin nga sinolay. Ta kabalin naw, duttal ngana i panuppalan.” (Mateo 24:14) Maski ta mararake nga situasion na mundo, maturu tu walu million ta ngamin nga nasion i mangilayyagayya ta mapia nga dumug na Pappatulan na Dios ta 240 nga nasion anna ta maturu 1,000 nga lengguahe. Ari paga yaw vuluvuga nga nesimmu ta nappasa.

Mesissimmu ngana ta maddaggun i niyawa ira ni Jesus nga seniales. Ngatta interesadu tam nakuan tatun nga kinakurug? Gafu ta kinagi ni Jesus: “Nu masingan nu tu mesimmu ngana danaw, ay ammu nu tu aranni ngana nga duttal i Pammaguray na Dios.”​—Lucas 21:31.

Ipalippawa nittam na niyawa ni Jesus nga seniales anna na kronolohia na Biblia nga nipataddag na Dios i Pappatulanna ta langi ta dagun 1914. a Tatun nga tiempo, kingnguana tu Patul i Anana nga si Jesu-Cristo. (Salmo 2:2, 4, 6-9) Aranni ngana nga mammaguray ta davvun i Pappatulan na Dios, anna alsanna i ngamin nga gobiernu na tolay anna kuanna tu paraiso i davvun tapenu paddianan na totolay tu mannanayun.

Ari mabbayag, matuppal ngana i modelo nga pakimallo nga nituddu ni Jesus: “Maparattal paray i Pammagurem. Makua i urem toye ta davvun ta kunne ta langi.” (Mateo 6:10) Ngem anni ngana i kukukuan na Pappatulan namegafu paga ta pammagurena tagga ta 1914? Anni i ekspektattam sonu pammagurayan ngana na Pappatulan i interu mundo?