Egga gapa i mappapange nga kappaganassing nga mesimmu ta mundo nga meyarig ta “bagiu.” Tinukoy yaw ni Jesus nga dakal onu ‘kanninipang nga ziga.’ (Mateo 24:21) Ari tam nga malisian yatun nga ziga. Ngem egga i makua tam tapenu maprotektattam i baggi tam. Anni yari?

Ta Sermon ta Vukig ni Jesu-Cristo, nibilinna: “Itulu-tuloynu gafu nga pagolluan i Pappatulan anna i kinatunung na Dios.” (Mateo 6:33, NW ) Kunnasi tam kuan yatun?

Pagolluan i Pappatulan na Dios. Kayàna kagian nga mawag tu mas importante i Pappatulan na Dios anne ta maski anni. (Mateo 6:25, 32, 33) Ngatta mawag tu kunnatun? Gafu ta ari talaga masolba na totolay i problema ira ta mundo. I Pappatulan na Dios laman i makasolba tatun ira.

Pagolluan i kinatunung na Dios. Mappursigi ittam nakuan nga mattolay segun ta dorob anna prinsipio ira na Dios. Ngatta? Gafu ta mattuppal ta peligro nu sittam lagapa i maddisidi nu anni i mapia onu marake. (Proverbio 16:25) Ngem nu tuttulattam i estandarte ira na Dios, mapagayayya tam i Dios anna makkasta i pattoletam.​—Isaias 48:17, 18.

Itulu-tuloy nga pagolluan i Pappatulan anna i kinatunung na Dios. Kinagi ni Jesus nga meyawawan i karuan ta abboda nga meyarayyu ira ta peligro nu aru i kuartuda. Ufutan gapa na karuan i oras anna sikadda ta panolba ta inaggaggaw nga  problemada adde ta awan ngana tu tiempoda para ta Pappatulan na Dios.​—Mateo 6:19-21, 25-32.

Ngem nipromesa ni Jesus nga meyawa i kawagan sangawe na ngamin nga massuporta ta Pappatulan na Dios anna malawada i mannanayun ira nga bendision ta mappange.​—Mateo 6:33.

Maski nu pinagollu na disipulos ira ni Jesus ta ollu nga siglo i Pappatulan anna i kinatunung na Dios, ari nga nawawan i daddam anna ziga tagga ta tiempoda. Ngem naprotektan ira. Kunnasi?

Sinuttulda i matunung ira nga estandarte na Dios, anna yatun i napprotekta nira ta ziga ira nga nappasan na totolay nga ari nagimporta ta bilin na Dios. I masikan nga pangurugda nga duttal i Pappatulan i nakaduffun nira nga marubang i kazigatan ira nga problema. Iniddan paga ira na Dios tu “ari nga maguku-gukug nga pakapangngua” tapenu makapagattam ira.​—2 Corinto 4:7-9.

Sinuppal na Cristiano ira ta ollu nga siglo i bilin ni Jesus nga pagolluan i Pappatulan. Nilayyagayyada i mapia nga dumug na Pappatulan ta lugarda. (Colosas 1:23) Egga kari i magaggangngua tatun ta maddaggun?

Egga! Ammu na Saksi ira ni Jehova nga balabaddi ngana laman i nabattang nga tiempo nige nga daralan na Pappatulan na Dios i maddaggun nga sistema. Yayya nga kukukuadda i ngamin tapenu matuppal i bilin ni Jesus: “Melayya-gayya noka ta tanga-ravvunan yaw nga Mapia nga Dumug na Pammaguray na Dios tapenu kannammuan na ngamin nga sinolay. Ta kabalin naw, duttal ngana i panuppalan.”​—Mateo 24:14.

Anni nakuan i efekto nikaw na mapia nga dumug? Pagarammaddaka nga parigan i ollu-siglo ira nga maddian ta siudad na Berea ta Macedonia. Ta pakaginnada kani apostol Pablo ta mapia nga dumug na Pappatulan, “kuruga nikakaya da i naggigginna ta uvovug na Dios.” ‘Ginigiammuda ta kagaggaw i Masanto nga Tura tapenu innadda nu kurug’ i naginnada, anna niyaplikada i nagigiammuda.​—Kingngua 17:11, 12.

Makuam gapa yatun. Ta pamagollum ta Pappatulan anna ta kinatunung na Dios, maprotektakka sangawe anna mapeggakka tu mannanayun nga imammo anna seguridad ta mappange.