Mabibbig ta Biblia nga kinuestion na rebelyoso nga anghel nga nagalan tu Satanas nga Diablo i katunungan na Dios nga mammaguray. Gittana kakkagianna nga mas magayayya i totolay nu ari tu Dios i mangigiya anna mammaguray nira. Kaddaraddam ta pinarigan na ollu nga magana tam nga da Adan anni Eva si Satanas anna narrebelde ira ta Dios.​—Genesis 3:1-6; Nepakannammu 12:9.

Gafu ta pinammanakitan ni Adan anni Eva i pammaguray na Dios, nawawwadda i Paraiso nga paddianadda anna i iddanama nga mattolay tu mannanayun anna perfekto. (Genesis 3:17-19) Marake gapa i efekto na desisiodda ta nabbalin ira tu ánada. Kinagi na Biblia nga gafu ta nakaliwa si Adan, “egga ta utun na davvun i pattagaruli, ay i katagarulian na i nangirattal ta patay.” (Roma 5:12) Navvunga paga ta trahedia i tagaruli onu liwa: “Dinominan na tolay i kasittolena ta pakaperwisiuwanna.” (Eclesiastes 8:9) Nu pammagurayan gafu na totolay i kasittoleda, magga marake i resultana.

Si Nimrod i ollu nga tolay nga nammaguray nga nerekord ta Biblia. Narrebelde yayya ta pammaguray ni Jehova. Namegafu paga ta kaggawan ni Nimrod, abusuan ngana na makapangngua nga totolay i autoridadda. Ma-3,000 dagun ngana i nappasa, nitura ni Patul Solomon: “Nasingakku i lua na matattazzian, ngem awan tu mamanna-bannay nira. Makawayya i manattazzi nira.”​—Eclesiastes 4:1.

Kunnatun lagapa i problema adde sangawe. Ta 2009, kinagi na tadday nga publikasion na United Nations nga umara-aru i mangurug nga i marake nga pammaguray “i tadday ta kegafuan na ngamin nga kinarake ta mundo.”

Kawagan na totolay i mas mapia ira nga mammaguray anna i mas mapia nga klase na gobiernu. Yatun mismu i nipromesa na Namaratu nittam!

Nangipataddag i Dios tu Pappatulan, onu gobiernu, nga manali ta ngamin nga gobiernu na tolay, anna “yaw laman i mattalupaddian adde noka.” (Daniel 2:44) Yaw i Pappatulan nga ipappakimallo na minillion. (Mateo 6:9, 10) Ngem ari tu i Dios i mammaguray taw nga gobiernu. Pinilina lallagu nga mabbalin tu Mammaguray i tadday nga nattolay bi ta davvun. Sinni i pinili na Dios?