• Pinili na Dios. “I patul ku nga pinili i nipè ta trono . . . Iyawa ku ngamin i nasion nikaw; kuam ngamin i egga ta utun na [davvun].”​—Salmo 2:6, 8.

• Mangirensia ta trono ni Patul David. “Neyana nittam i tadday nga abbing, neyawa nittam i tadday nga ana nga lalaki . . . Awan tu pagaddetan na pallawa na pammagurena anna na imammo, ta trono ni David anna ta pappatulanna tapenu mapatuyag yatun.”​—Isaias 9:6, 7.

• Meyana ta Betlehem. “O Betlehem . . . , maggafu nikaw i mabbalin tu mammaguray . . . Mabbalin ngana yayya tu marayaw ta interu davvun.”​—Mikias 5:2, 4.

• Pammanakitan anna patayan na totolay. “Nauyu-uyaw yayya, anna nikwenta tam nga awan tu sesserbina. . . . Naduddug yayya gafu ta liwa tam; naziga-riga yayya gafu ta pakkamaliattam ira.”​—Isaias 53:3, 5.

• Mapaginnolay anna medayaw. “Ta ariammà pagurayan ta Attanamman. Ariammu ipamavulun nga masingan na matalo nikaw i avvu. . . . Egga i mannanayun nga pagayayya ta ziwanan nga limam.”​—Salmo 16:10, 11, NW.

Ta interu historia na tolay, si Jesu-Cristo laman i nikesimmuan na detalye ira meyannung ta kapianan nga Mammaguray. Kakuruganna, kinagi na anghel ta yena ni Jesus nga si Maria: “I Yafu Dios ay pabbalinan na yaya noka tu patul nga kagitta ni David nga ginafuan na . . . anna awan tu panuppalan na pammagurayan na.”​—Lucas 1:31-33.

Ari vuluvuga nammaguray si Jesus ta davvun. Lallagu, bilang Patul na Pappatulan na Dios ta langi, pammagurayanna i totolay ta davvun. Ngatta yayya i kapianan nga Mammaguray? Innattam i kingngua ni Jesus ta keggana ta davvun.

•   Nikavurungan ni Jesus i totolay. Zinuffunan ni Jesus i lallaki, babbay, abbarabbing, anna mannakam maski anni i kultura onu estadoda. (Mateo 9:36; Marcos 10:16) Ta nakimemallo i mallepproso nga kunna: “Awayya mà nga pammapian nu yatun i urem,” nikallo yayya ni Jesus anna pinammapiana.​—Marcos 1:40-42.

• Sinudduan ittam ni Jesus nu kunnasi mapagayayya i Dios. Kinagina: “Arian na nga awayya tu maggiddan i pangaya ta Dios anna pangaya ta kuartu.” Kinagina paga nga tratuattam i kasittoletam ta ikaya tam nga pattratuda nittam. Nipasinganna gapa nga interesadu i Dios ari laman ta kukukuattam, nu ari maski ta nononopattam anna mataga-tageno tam. Tapenu mapagayayya tam gafu i Dios, mawag tu kontrolattam i egga ta kononaggattam. (Mateo 5:28; 6:24; 7:12) Nipasigo gapa ni Jesus nga tapenu mabbalittam tu kurug nga magayayya, mawag tu gigiammuattam i ikiddaw nittam na Dios anna kuattam yatun.​—Lucas 11:28.

• Nituddu ni Jesus i kebalinan na aya. Dakal i efekto na kinagi anna kiningngua ira ni Jesus anna natukkal i futu na totolay. “Nappabbaw i totolay megafu ta nattuddu [si Jesus] nga sigga-pakawayya.” (Mateo 7:28, 29) Sinudduanna ira: “Ayatan nu i mangontra nikamu.” Nipakimallona paga lagu danuri namatay nisa: “Ama, pakomam-mu ira ta ariad-da nga ammu i kuad-da!”​—Mateo 5:44; Lucas 23:34.

Si Jesus i pinakakualipikadu nga mammaguray ta mundo. Minangnguffun anna masippo yayya. Ngem kanni yayya mamegafu nga mammaguray?