Kunnasi Ka Makapattolay ta Bagu nga Mundo?

I-PLAY

Nammuattam ta nappasa ira nga artikulo nga aranni ngana nga panuppalan na Dios i marake nga totolay anna i ngamin nga problema. Siguradu ittam nga matuppal yaw megafu ta nipromesa na Uvovug na Dios, i Biblia:

“Mapawan i mundo.”—1 JUAN 2:17.

Makasiguradu ittam nga egga danuri mapaliag megafu ta kinagi gabbalaman natun nga teksto:

“I mamarulo ta uray na Dios ay mattolay adde noka.”

Nu kunnari gafu, mawag nga kuattam i uray na Dios tapenu mepaliag ittam. Tapenu mammuattam i uray na Dios, mawag tu makilala tam labbi yayya.

MAPALIAG KA TA PANUPPALAN GUKABAN NA “PAKANNAMMU” TA DIOS

Kinagi ni Jesus: “Yaw i inango nga adde ta ngangangay: i pakannammu da tu sikaw i tattadday nga kurug nga Dios.” (Juan 17:3) I “pakannammu” ta Dios i kawagattam tapenu mepaliag ta panuppalan anna mattolay tu mannanayun. Ari na kayà kagian nga basta kurugattam nga egga i Dios onu ammu tam i pilippiga meyannung nisa. Mawag tu makikkofuttam nisa. Tapenu maddukko ittam ta kokkofuttam, mawag tu iddattam ira tu tiempo. Kunnatun gapa i kuattam tapenu maddukko ittam ta Dios. Ammuan i nabalor ira nga kinakurug ta Biblia tapenu mabbalin ittam tu kofun na Dios anna maddukko ittam nisa.

Kinakurug ira nga Magigiammu Tam ta Biblia

Magigiammu tam nga ikaya na Dios nga mattolay ittam ta Paraiso.

Pinaratu na Dios i ollu nga totolay, si Adan dua ni Eva, anna pinaddian na ira ta makakkasta nga hardin na Eden. Perfekto ira anna niyawa na Dios i ngamin nga pakawagadda tapenu magayayya ira nga mattolay. Awayya da nakuan nga mattolay tu mannanayun. Nu nattalupaddian ira nga kofun na Dios, ari ira vuluvuga matay. Ngem pinili da nga ari nga mattuppal ta simple nga bilin na Dios.

Magigiammu tam nu ngatta mazziga-riga ittam.

Ta ari nga pattuppal ta Dios na ollu nga tolay nga si Adan, nawawan na i oportunidad nga mattolay tu mannanayun anna na ngamin nga totolay. Kagian na Biblia: “Megafu ta tadday nga tolay, egga ta utun na davvun i pattagaruli, ay i katagarulian na i nangirattal ta patay. Ay nawwara i patay ta ngamin nga totolay.” (Roma 5:12) Nu kunnasi nga posible nga marensia na tolay i defekto na magana na, narensia gapa na ngamin nga ána ni Adan i kina-imperfekto na. Megafu tatun, mabbako, mallakay, anna matay ittam.

Magigiammu tam i kiningngua na Dios para nittam.

Kagian na Biblia: “Kuruga iddukan na Dios i mundo. Yatun tu zinog na i tattadday nga Ana na, tapenu ngamin i mangurug sa ay ari nga matay nu ari matolay ira adde ta ngangangay.” (Juan 3:16) Zinog na Dios si Jesus ta davvun tapenu iyawa na i inango na para nittam. Megafu tatun nga aya na Dios, nakagi na 86-anios nga taga-India nga si Prabhakar: “Yaw i mangipasingan nga iddeddukan nà ni Jehova. a I aya na i nangiyawa nio tu iddanama nga mattolay tu mannanayun.”

Magigiammu tam nu kunnasi tam ipasingan i appresasiottam ta kiningngua na Dios para nittam.

Kagian na Biblia nga “nu parulattat-tam i bili-bilin na Dios,” mepasingattam i appresasiottam ta kiningngua na para nittam. (1 Juan 2:3) Naaya nga nituddu ni Jehova nga Dios i mawag nga kuattam tapenu magayayya ittam ta pattolay sangawe. (Isaias 48:17, 18, footnote) Ari nga kayà na Dios nga mazziga-riga ittam. Nipromesa na nga nu tuttulattam i bilin na, magayayya ittam nga mattolay sangawe anna awayya tam gapa nga mattolay tu mannanayun.

KADAGGAW NGA BIBBIGAN I UVOVUG NA DIOS, I BIBLIA

Mapaliag ka ta panuppalan na mundo nu ipakimallo mu i uffun na Dios anna kuammu i urena

Mawag nga kanayuttam kuman tapenu matolay. Ngem kinagi ni Jesus: “Ari laman tu pan i pakkatolay na tolay, ngem mawag na ngamin i uvovug nga maggafu ta Dios.”—Mateo 4:4.

Sangawe, malegattam ta Biblia i uvovug ira ni Jehova. Ta paggigiammum tatun nga sagradu nga libru, mammuammu i kiningngua na Dios, i maddaggun nga kukukuan na, anna i kuan na ta mappange.

IPAKIMALLO I UFFUN NA DIOS

Anni i kuammu nu ikaya mu gapa nga tuttulan i Dios ngem awayya na nga marigatakka nga iyemmang i gannug ira nga kondenan na? Nu kunna i situasiommu, makaduffun nu ammammum tu mapia i Dios.

Ammuattam i nesimmu ta tadday nga babay nga agalattam tu Sakura nga imoral i pattolena. Turi ta naggigiammu yayya tu Biblia, nagigiammu na i bilin na Dios nga ‘ibita i maggannug.’ (1 Corinto 6:18) Nakkiddaw si Sakura ta Dios tu sikan tapenu meyemmang na i marake nga kukukuan na. Ngem kawagan na lagapa nga labanan i tentasion ira. Kinagi na: “Nu makanono ngà tu imoral ira nga gannug, ivuvvu ku i ngamin kani Jehova ta pakimallo megafu ta ammù nga ariakku malabanan yaw nu so laman. Megafu ta pakimallo, naddukko ngà kani Jehova.” Kagitta ni Sakura, minillion nga totolay i maggiggigiammu tapenu mammammu da i Dios. Iiddan na ira tu sikan tapenu mawayya da nga manguli anna makapattolay ira tu makapagayayya ta Dios.—Filipos 4:13, NW.

Nu ammammum tu mapia i Dios, ammammu naka gapa tu mapia bilang nabalor nga kofun na. (Galacia 4:9; Salmo 25:14) Nu kunna, awayyam gapa i mepaliag tapenu makapattolay ka ta bagu nga mundo. Ngem kunnasi kari i bagu nga mundo? Ipakanawag na tumunug nga artikulo.

a Jehova i ngagan na Dios nga nepakannammu ta Biblia.

PASSIFUSIFUTAN