“Dian na Dios?”
“KANAYUKKU IYAVU: DIAN NA DIOS?”—Pope Benedict XVI, ta pabbisitana ta dati nga kampu nga affukutan ta Auschwitz, Poland.
NU EGGA TRAHEDIA, MANONO MU KARI, ‘DIAN NA DIOS?’ ONU NU EGGA MARAKE NGA NESIMMU TA PATTOLEM, NIYAVU MU NGANA KARI NU IKAVURUNGAN NAKA MISMU NA DIOS?
Posible nga parehu kamu na natageno ni Sheila nga taga-Estados Unidos. Relihioso i familiana, ngem kunna: “Ta kabbikku, kakayà ku ngana mammammu i Dios megafu ta yayya i Namaratu nittam. Ngem kakku vuluvuga naddukko nisa. Abbo ku nu iinnannà laman ta arayyu. Ariakku ninono nga ikalussonà na Dios, ngem kakku gapa mangurug nga iddukannà.” Ngatta nadduda si Sheila? Niyesplikana: “Matturunug i trahedia ta familià, gittana pinagurayakkami na Dios.”
Kagitta ni Sheila, awayyana nga siguradu ka nga egga i Makapangngua nga Dios. Ngem nononopammu nu talaga ikavurungan naka. Kunnatun gapa i nanono na matunung nga si Job nga mangurug ta pakapangngua anna sirib na Namaratu. (Job 2:3; 9:4) Kabalin ni Job nga nappasa ta natturunug nga trahedia—nga gittana awan ngana tu iddanama—niyavuna ta Dios: “Ngatta itagum i muka mu anna ikwentamà nga kalabammu?”—Job 13:24.
Anni i kagian na Biblia? Dios kari i makalliwa ta trahedia ira? Egga kari pamakurug nga ikavurungan na Dios i ngamin nga totolay anna i kada tadday nittam? Talaga kari mammuattam nu masinganna, matindianna, egga empatiana nittam, onu uffunanna ittam ta problema tam ira?
Ta tumunug ira nga artikulo, ikonsidera tam i ituddu nittam na pamaratu meyannung ta pangikavurung nittam na Dios. (Roma 1:20) Gigiammuattam gapa i kagian na Biblia meyannung ta pangikavurung na Dios. Nu mas ‘amma-ammum yayya’ gukaban na pamaratu anna Uvovugna, mas masiguradum nga ‘yayya i manangngal nikaw.’—1 Juan 2:3; 1 Pedro 5:7.
