I empatia ay “i abilidad nga tagenappan i panageno onu ekspiriensa na tadday gukaban na pannono nga sikaw i egga ta situasionna.” Kinagi na mental-health expert nga si Dr. Rick Hanson nga “neyana ittam nga egga abilidadna nga maki-empatia.”

PANNONOPAN: Ngatta egga abilidad tam nga maki-empatia, nga awan ta tanakuan nga pinaratu? Niyesplika na Biblia nga pinaratu na Dios i tolay ta imahena. (Genesis 1:26) Kayàna kagian, mepasingattam i personalidad anna kualidad na Dios. Nu manguffun ta tanakuan i minangngikavurung nga totolay, paparigadda i empatia na minangngikallo nga Namaratu nira, si Jehova nga Dios.​—Proverbio 14:31.

Egga empatia nittam na Dios anna manakina nga marigatattam. Meyannung ta ili na Israel gari nga nepallo nga naaripan ta Ehipto anna 40 nga dagun nga nazziga ta katanapan, kinagi na Biblia: “Ta ngamin nga ziga-rigada ay namazziga nisa.” (Isaias 63:9) Ari laman nga ammu na Dios i ziga-rigada. Matagenona yatun. “Ammù i taka-taki nga idaga-ragidda,” kunna. (Exodo 3:7) “Ta sinni laman nga manukkal nikamu ay manukkal ta vukal na matà,” kinagi na Dios. (Zacarias 2:8) Nu takitadda ittam, matakitan gapa yayya.

Ipasiguradu nittam na Biblia nga maski vuru-vurungan ittam na konsensia tam anna matageno tam nga ariattam mepangngo ta empatia na Dios, “mas makawayya i Dios anne ta konsensia tam anna ammu na ngamin.” (1 Juan 3:19, 20) Mas kilala ittam na Dios anne ta baggi tam. Ammuna i ngamin nga situasion, appana-panono, anna panageno tam. Egga empatiana nittam.

 Ipasiguradu nittam na Biblia

• “Magagal ka, anna tubbag si Jehova; mappoffukka, ay kagianna, ‘Egga ngà taw!’”​—ISAIAS 58:9.

• “‘Ta ammù tu mapia i appana-panono nga nononopakku ta nikamu,’ kagian ni Jehova, ‘appana-panono ta imammo, ari tu kalamidad, tapenu mangiyawa nikamu tu mappange anna iddanama. Anna agaladdà anna umay kamu anna makimallo kamu niakan, ay ginnattakamu.’”​—JEREMIAS 29:11, 12.

• “I lista na luluà ira ay pinappannam-mu. Ari kari tu ta librum danaw ay nitura mu?”​—SALMO 56:8.

Makoffun kari ta pangarubattam ta problema i pakannammu nga egga empatia nittam na Dios? Ikonsidera i ekspiriensa ni Maria:

“Kabalikku maekspiriensa i nepallo nga daddam turi ta natay i 18-anios nga ana ku megafu ta dua-ragun nga pakillabanna ta cancer, natageno ku nga mariga anna awan tu hustisia na pattolay. Nakaporay ngà kani Jehova ta awan tu kingnguana anna arianna yayya pinammapia!

“Nappasa i annam nga ragun, tadday nga meddu anna minangngikallo nga kofun ta kongregasion i nagginna durante nga istoriakku i mataga-tageno ku nga kannà iddukan ni Jehova. Kabalin na pagginnana niakan ta piga oras, kinagina i teksto nga nakatukkal niakan. Yari i 1 Juan 3:19, 20, nga kunna: ‘Mas makawayya i Dios anne ta konsensia tam anna ammu na ngamin.’ Niyesplikana nga malippawa ni Jehova i pazziga-riga tam.

“Maski nu kunna, marigatan ngà nga alsan i taki na nono ku! Binibbig ku i Salmo 94:19, nga kunna: ‘Nu aru i kavuru-vurungan na nono ku, i pamanna-bannem i mangiyawa ta pagayaya ku.’ Gittana netura para niakan yatun nga teksto! Nabanna-bannayan ngà gabbalaman nga ipakiyuvovug kani Jehova i problemà, ta ammù tu ginnan anna matindianna.”

Makapabannay mammuan nga matindian anna makipattageno nittam i Dios! Ngem ngatta gafu napakaru i pazziga-riga? Panentensia kari yaw na Dios megafu ta marake nga kukukuattam? Egga kari kuan na Dios tapenu alsan i ngamin nga pazziga-riga? Matabbag danaw ta tumunug ira nga artikulo.