Pinaratu na Dios i baggi tam nga egga makapabbaw nga abilidadna nga mammapia. Nu nabigaran, nagasgas, onu natubbo i baggi, “mamegafu i komplikadu nga proseso nga nadisenio tapenu pammapian i dakal anna baddi nga bigag.” (Johns Hopkins Medicine) Insigida pagimmangan na baggi i paddaga, palawanna i kalla-kallo, pammapianna i bigag, anna paladdanna i tissue.

PANNONOPAN: Nu dinisenio na Namaratu i baggi tam nga pammapian i literal nga bigag, ari kari nga makapattalo ittam gapa ta promesana nga uffunanna ittam ta emosional ira nga taki? “Pammapianna i nabigaran i futuna,” nitura na salmista. “Babbagganna i bigi-bigagda.” (Salmo 147:3, NW) Ngem nu mazziga-riga ka ta emosional megafu ta nappasa onu maddaggun nga ekspiriensam, kunnasim masiguradu nga babbaggan ni Jehova i bigi-bigag mu​—sangawe anna ta mappange?

Nipromesa na Dios: “Ari ka nga maganassing, ta egga ngà nikaw. Ari ka nga mavurung, ta sakan i Dios mu. Patuyaggattaka, wan, uffunattaka.” (Isaias 41:10) Nu ammu na tolay nga ikavurungan yayya ni Jehova, memammo i nono anna masikan yayya nga mangarubang ta nadduruma nga problema. Tinukoy yaw ni apostol Pablo nga “i imammo [na Dios] nga ari malippawa na tolay.” Kunna paga: “I ari nga maguku-gukug nga pakapangngua ay maggafu ta Dios.”​—Filipos 4:4-7, 9; 2 Corinto 4:7.

Uffunan ittam na Biblia nga mapeggan tu pangurug ta promesa ira ni Jehova ta mappange na totolay. Angngariganna, kagian nittam na Nepakannammu 21:4, 5 nu anni kuanna anna ngatta makapattalo ittam sa nga kuanna yatun:

• “Funatan na ngamin i lulua” na totolay. Alsan ni Jehova i ngamin nga pazziga-riga anna pakavurungattam, maski i problema ira nga awan tu kwentana para ta tanakuan.

• “Agga-itubang ta trono” ta langi, usan na Makapangngua-ta-ngamin nga Patul i pakapangngua anna autoridadna tapenu pagimmangan i ziga-riga anna uffunan ittam.

• Ipasiguradu ni Jehova nga “kurug” anna “awan tu paddudam-mu” ta promesana ira. Inusa na Dios i ngagan anna reputasionna nga garantiya ta pattuppal ta promesana ira.

“‘Funatan na ngamin i lulua da nga manuru, anna awan ngana noka tu matay, onu maraddam, onu tumangi-tangi, onu magattam ta taki. Ta napawan ngana ngamin i dana nga ganna-gannug.’ Ay kinagi nuri na agga-itubang ta trono, ‘Talibaguak-ku sangoye ngamin i ganna-gannug!’ Kinagi na gapa niakan, ‘Itura mu yaw ta kurug danaw nga uvovug anna awan tu paddudam-mu nira.’”​—Nepakannammu 21:4, 5.

Ipasingan na pisikal nga uniberso anna na Biblia i personalidad na nelangitan nga Yama tam. Manawag nga ipasingan na pamaratu nga ammuattam i Dios anna mabbalin tu madukko nga Kofunna. Kagian gapa mismu na Biblia: “Umaranni kamu ta Dios, ay umaranni yaya nikamu.” (Santiago 4:8) Kagian na Kingngua 17:27: “Ari tu arayyu yaya ta kataggi-tadday nittam.”

Durante nga mammammum i Dios, mas makumbinsi ka nga “yaya i manangngal nikamu.” (1 Pedro 5:7) Anni ira i praktikal nga benefisio na kunnatun nga pattalo kani Jehova?

Ikonsidera i nesimmu kani Toru nga taga-Japan. Pinadakal yayya na yenana nga Cristiano, ngem nesali yayya ta vayolente nga mundo na yakuza. Kunna, “Para niakan, ikalussonà na Dios, anna panentensia niakan i kapatay na kakavulu ku, lalu ngana danuri madukko niakan.” Inamin ni Toru nga megafu ta kananassing nga grupo anna ugalida, nabbalin tu “awan tu konsensia anna panagenona.” Kinagina meyannung ta ambisionna, “Ikayà ku matay insigida kabalikku napatay i tadday nga mas popular niakan tapenu yatun i meraddammadda niakan.”

 Ngem turi ta nab-Bible study si Toru anna i atawana, si Hannah, daka-dakal i kingngua ni Toru nga panguli ta pattolay anna pagimammana. “Nasingakku i pangulina,” kunni Hannah. Makagi ngana ni Toru: “Egga i Dios nga talaga mangikavurung ta kada tadday nittam. Manakina nga matay i maski sinni, anna pakomanna danuri mabbabawi ta liwi-liwada. Ginnanna i kattam makagi ta tanakuan anna i ariadda matindian. Aranni ngana alsan ni Jehova i ngamin nga problema, ziga-riga, anna daga-raging. Maski sangawe, uffunanna ittam ta tiempo nga ariattam ekspektan. Ikavurungan anna kuraganna ittam nu makafi ittam.”​—Salmo 136:23.

Gittana ekspiriensa ni Toru, mangiyawa tu siguradu nga iddanama ta mappange anna manguffun nittam nga mattolay tu makasta sangawe i pakannammu nga mawayya na Dios​—anna arannina ngana​—alsan i ngamin nga trahedia anna funatan i lulua. Wan, maski ta mundo nga napannu tu ziga, mabenefisiowakka ta meddu nga pangikavurung na Dios.