Importante nga tiempo i ollu nga oras ta keyana na baby. Ngatta? Megafu ta makoffun tu mapia ta paddakal na ána i pakiddukko na yena ira ta keyayana nga baby-da taw nga kritikal nga tiempo. *

Anni i mamaguyu ta yena nga tangngallan tu mapia i keyayana nga baby-na? Niyesplika ni Profesor Jeannette Crenshaw ta The Journal of Perinatal Education nga i aru nga hormone nga oxytocin i “mamaddukko ta yena ta anana sonu matammi, masingan, anna pasusuanna i baby-na.” I tanakuan paga nga hormone nga luttuag taw nga tiempo i “manguffun ta yena nga iyawa i pakawagan na baby-na” anna yaw i mamalladda ta relasionna ta baby-na. Ngatta nabalor yatun?

Dinisenio ni Jehova nga Dios, * i Namaratu nittam, i madukko nga relasion na yena anna baby. Megafu ta pangiyana anna panangngal na yena ni Patul David sa, zinayawna i Dios. Nipakimallona: “Namegafu ta nikeyana ku, sikaw ngana i dian na iddanamà. Kanayun nga sikaw laman i Dios ku namegafu ta pangiyana niakan na yenà.”​—Salmo 22:9, 10.

PANNONOPAN: Nu pinaratu na Dios i kunnatun kakomplikadu nga sistema tapenu masiguradu nga tangngawan anna iyawa na yena i pakawagan na baby-na, ari kari nga lohikal gapa nga tangngallan ittam na Dios ta “ána na ittam”?​—Kingngua 17:29.

Si Jesu-Cristo, nga mas makammu ta Namaratu anne ta maski sinni, ay nattuddu: “Ari kari nga awan tu kwenta na mammanu na balay? Nu kunnuri paga, ni tadday nira i matay nga ari tu uray [“ammu,” NW] na Dios. Nu meyannung nikamu, maski paga i vu nu ay nabilang ngamin. Yatun tu ari kamu nga maganassing, ta mas mangina kamu anne paga ta aru nga mammanu!”​—Mateo 10:29-31.

Megafu ta piga laman nittam i magobserba ta kada baddi nga mammanu nga masingattam, masifutattam kari nu tadday nira i matay? Masingan na nelangitan nga Yama tam i kada tadday nira! Mas nabalor ta nisa i tadday nga tolay anne ta mammanu​—maski aru paga nga mammanu. Manawag gafu i leksion: ‘Ari ka nga maganassing’ nga ari ka masingan na Dios. I kurug, talaga interesadu yayya nikaw!

 Ipasiguradu nittam na Biblia

• “I mata ira ni Jehova ay egga ta maski sitaw, iinnanna i marake anna i mapia.”​—PROVERBIO 15:3.

• “Tangngallan na YAFU i matunung ira, anna tangngagan na i dagi-raging da.”​—SALMO 34:15.

• “Magayaya anna mappalupagia ngà ngana, megafu ta aya mu nga awan tu pangulian na. Ngamin i ziga-riga ku ay masingam-mu, anna ammum gapa i avvuru-vurung ku.”​—SALMO 31:7.

Egga kari efektona ta pattoletam nu ammu tam nga interesadu nittam i Dios anna sigga-aya nga iinnanna ittam? Siguradu nga egga, kagitta na kinagi ni Hannah, * nga taga-England:

“Mamikkaru nga inabbo ku nga ariannà iddukan ni Jehova anna ari nga matattabbag i pakimallo ku ira. Ninono ku nga megafu yatun ta kawan tu pangurug ku. Abbo ku nga parusa yaw onu balewala ngà ta awan tu kwentà. Abbo ku nga awan tu pakialam na Dios.”

Ngem ari ngana paddudan ni Hannah i pangikavurung anna aya ni Jehova. Ngatta nanguli i pagimammana? “Sisinu yatun,” kunna. “Manono ku i tadday nga palappa ta Biblia aru dagun ngana i nappasa meyannung ta sakrifisio nga tavvu ni Jesus. Dakal i efekto natun anna yatun i nangipasiguradu niakan ta aya ni Jehova. Nu matabbag i pakimallo ku, maruddu nga makatangi ngà ta matageno ku nga iddunà ni Jehova. Ta paggigiammù tu Biblia anna ta pagatendè ta study ira, mas nammammù si Jehova, i personalidadna, anna i panagenona nittam. Masingakku ngana tu mapia i uffun anna aya ni Jehova ta nittam ngamin anna i napafutuan nga panangngalna ta kada tadday nittam.”

Makapagaram i kinagi ni Hannah. Ngem kunnasim masiguradu nga matindian anna meraddamman na Dios i panageno mu? Tabbagan yaw na tumunug nga artikulo.