Nonopan i tadday ta posible nga kadukkattan nga relasion na tolay​—yari i ziping (identical twins). Espesial i kinadukkoda. I karuan, “matindiadda i mismu kakkagian na tadday maski ari iyesplika,” kunni Nancy Segal, direktor na Twin Studies Center nga egga gapa kazipingna. Tadday nga babay i nakkagi meyannung nira na kazipingna: “Basta kilalami tu mapia i kataggi-tadday.”

Ngatta matindiadda tu mapia i kataggi-tadday? Kagian na paggigiammu ira nga maski nu makafekto gapa i pallevu anna pamadakal na magana, i parehu nga genes na ziping ira i pinakarason.

PANNONOPAN: Siguradu nga mas ammu na Namaratu i kada tadday nittam anne ta maski sinni. Kinagi na salmista nga si David: “Ta san na yenà ay finorma mà ngana. Ammum i nepabbalin na tulu-tulang ku, turi ta nemmuguran ngà nga naparatu, . . . Ari ngà paga neyana ay nasingam-mà ngana; ta librum ay egga ngana nga nakalista.” (Salmo 139:13, 15, 16) I Dios laman i makannammu anna makalippawa ta genes tam ira anna ta ngamin nga nesimmu ta pattoletam nga naka-influwensia ta personalidad tam. I espesial nga pakannammu nittam na Dios anna ta genes tam i mangipasiguradu nga kurug tu matindianna ittam tu mapia.

Nipakimallo ni David: “Inusito mà ta mapia, O AFU, ay ammum i kononaggak-ku! Ammum ngamin i kukukuak-ku; ammum ngamin i egga ta nono ku, maski nu egga ka ta ararayyu. Nage na uvovug ku nga mallawan, dana ammum ngana i ek-ku nga kagian.” (Salmo 139:1, 2, 4) Ammu paga ni Jehova i panageno tam anna “ammuna i ngamin nga pakkaraga na appana-panono.” (1 Cronicas 28:9; 1 Samuel 16:6, 7) Anni ipasingan danaw nga bersikulo meyannung ta Dios?

Maski ariattam mekagi i ngamin nga nononopan anna mataga-tageno tam nu makimallo tam, obserban na Namaratu ari laman nu anni i kukukuattam ngem matindianna paga nu ngatta kukukuattam yatun. Matindianna paga i mapia nga kayà tam kuan, maski nu fugaddan ittam na limitasiottam ira nga kuan i napafutuan nga karagatattam. Megafu ta nipay na Dios i aya ta giffutuattam, sigga-paran yayya​—kakayàna paga lagu​—nga obserban anna intindian i mapia nga nononopan anna motibo tam ira.​—1 Juan 4:7-10.

 Ipasiguradu nittam na Biblia

• “Ta tangngallan na Yafu i matunung ira, anna tangngagan na i pakimallo da.”​—1 PEDRO 3:12.

• Nipromesa na Dios: “Ituddù nikaw i mepangngo nga lakaram-mu, tudduan anna tabarangngat-taka.”​—SALMO 32:8.

Makoffun kari ta pangarubattam ta problema i pakannammu nga matindian na Dios i situasion anna panageno tam? Ikonsidera i nesimmu kani Anna, nga taga-Nigeria. “Nadduda ngà nu egga paga serbi na pattolè megafu ta mariga nga situasiokku,” kunna. “Balu ngà anna tattangngawakku i ana ku nga babay nga nehospital megafu ta hydrocephalus (sossobra nga likido ta uto), turi ta nammuan nga egga breast cancer ku anna mawag ku mappa-opera, chemotherapy, anna radiotherapy. Kitazziga nga makkagiddang kami nga nehospital na mataki nga ana ku.”

Anni nakoffun kani Anna nga makapagattam? “Ninono ku i teksto ira kagitta na Filipos 4:6, 7, nga kunna ‘iyawa na Dios nikamu i imammo na nga ari malippawa na tolay. Yaw i manangngal ta nono anna giffutuan nu.’ Kada manono ku yaw nga teksto, maddukko ngà kani Jehova, ta ammù nga mas matindiannà anne ta baggì. Pinagaramnà gapa na meddu nga wawwaragi ta kongregasion.

“Problemà lapa i gawa-gawayyakku, ngem nakkasta i situasiommi na ana ku. Ta uffun ni Jehova, nagigiammumi nga ari mannegatibo nu egga ira kapurueba. Nipasiguradu na Santiago 5:11: ‘“Mapalag ira,” kut-tam ta nakapagattam ira. Naginna nu i nipappasensia ni Job, ay ammu nu tu niyawa na Yafu i mawag na ira ta pangurianan. Ta i Yafu ay minaggallallo anna minaggiddeddu.’” Natindian tu mapia ni Jehova i situasion ni Job, yatun tu masiguradu tam gapa nga matindianna i mariga ira nga situasiottam.