Nu ari tu naggafu ta Dios i pazziga-riga, anni i makagafu ta pabbisin na magaru, nepallo nga ziga, brutal nga gerra, grabe nga taki, anna kalamidad ira? Nipakannammu na Uvovug na Dios, i Biblia, i tallu nga primeru nga rason ta pazziga-riga na totolay:

1. Pakka-makasarili, Pakkakkam, Anna Lussaw. “Dinominan na tolay i kasittolena ta pakadannalanna.” (Eclesiastes 8:9) Maruddu nga mazziga i totolay megafu ta biktima ira na imperfekto, makasarili, onu marake nga totolay.

2. Tiempo Anna Ari-menanaman nga Mesimmu. Mazziga i totolay “megafu ta i tiempo anna ari-menanaman nga mesimmu ay duttal nira.” (Eclesiastes 9:11) Kayàna kagian, nekanna nga egga ira ta nikesimmuan na trahedia, onu ari ira nagimmugug onu nakkamali ira.

3. I Marake nga Mammaguray ta Mundo. Manawag nga kinagi na Biblia i primeru nga mamazziga ta totolay. Kunna: “I mundo ay egga ta pammaguray na Demonio.” (1 Juan 5:19) Yatun nga “Demonio” ay si Satanas nga Diablo, tadday nga makapangngua nga espiritu nga dati nga anghel na Dios ngem “arian na vuluvuga nga anugutan i kurug.” (Juan 8:44) Nevulu i tanakuan ira nga anghel kani Satanas ta parrebelde ta Dios tapenu tuttulan i makasarili nga karagatadda, yatun tu pinabbalidda i baggida tu demonio. (Genesis 6:1-5) Namegafu ta pinarrebeldeda, masikan anna kitaddake i influwensia ni Satanas anna na demoniona ira ta mundo. Netallugaring yaw ta tiempo tam. Sangawe, nepallo i poray na Diablo anna ‘tabaganna i tanga-ravvunan,’ nga narresulta ta ‘pakallallo nga davvun.’ (Nepakannammu 12:9, 12) Talaga brutal nga mammaguray si Satanas. Kakayàna nu mazziga i totolay. Si Satanas i mamazziga ta totolay, ari tu Dios.

PANNONOPAN: I awan tu futuna anna awan tu konsensiana laman nga demonio i mamazziga ta inosente nga totolay. Ngem kagian na Biblia: “I Dios ay aya.” (1 Juan 4:8) Megafu ta minaggiddu yayya, “imposible para ta kurug nga Dios nga magangngua tu kinamarake, para ta Makapangngua-ta-ngamin nga magangngua tu ari fustu!”​—Job 34:10.

Ngem natural laman nga manono mu, ‘Adde sonu anni nga ipamavulun na Makapangngua-ta-ngamin nga Dios i kitaddake nga pammaguray ni Satanas?’ Gitta na nammuattam, ikalussaw na Dios i kinarake anna mamaddaddam sa i pazziga tam. Ipagaram paga na Uvovugna: “Ipammakatalo nu sa ngamin i kavurungan nu ta yaya i manangngal nikamu.” (1 Pedro 5:7) Ayatan ittam na Dios anna egga pakapangnguana nga alsan i ziga-riga anna kawan tu hustisia, gitta na iyesplika na tumunug nga artikulo. *