IMAJINAMMU nga maggigiraw ka tu pelikula meyannung ta sikat nga tolay, awayyana nga popular nga musikeru nga kakayà mu. Namegafu yatun ta nesimmu ira ta kabbinna, ta paggigiammuna tu musika, anna i kanayun nga pagensayuna. Nagirom gapa i concert-na ira ta nadduruma nga nasion, anna i passikatna ta interu mundo. Ngem ta ultimu na pelikula, nabbako yayya adde ta natay.

Yaw nga pelikula ay kurug nga istoria na tadday nga tolay nga natay ngana. Maski nu istoria paga yatun na tadday nga musikeru, sientista, atleta, onu tanakuan paga nga popular nga tolay, magga parehu lagapa i ending-na. Awayyana nga aru i netuppalda, ngem nonopammu i makuada paga nakuan nu ariadda nallakay onu nabbako anna natay.

Maski kaddaraddam, yaw talaga i mesimmu ta nittam ngamin. (Eclesiastes 9:5) Mallakay onu mabbako anna matay ittam maski anni i kuattam. Onu awayyana nga gavva ittam matay megafu ta taki onu aksidente. Kagitta na nakagi ta Biblia, gitta tam i lumay nga “luttuag ta manganannuan, ngem siddaraga nga mapawan.”​—Santiago 4:14.

Megafu ta matay ittam gammabba, kunnaw i agga-nono na karuan: “Kuman anna uminum ittam ta matay ittam nonumma.” (1 Corinto 15:32) Ngem kunnatun i kukukuadda megafu ta ammuda nga matay gammabba ira anna awan tu iddanamadda ta mappange. Ngem magga duttal i tiempo​—jebi nu mariga i situasion—​nga meyavu mu, ‘Kunnaw ngana laman kari i pattolay?’ Pakalegammu ta tabbag?

Aru i magiddanama nga malegan na sientista ira i tabbag. Nakadiskubre i sientista anna doktor ira tu ganna-gannug nga posible nga mamapiddu ta inango tam. Mappursigi paga lagu i karuan nga sientista tapenu papidduan paga i inango tam. Anni laman i resulta naw, iyavu tam lagapa: Ngatta mallakay onu mabbako anna matay ittam? Posible kari nga mapawan i patay? Ivuru-vura na tumunug ira nga artikulo danaw nga topiko anna matabbag i pakkiavu nga, Kunnaw ngana laman kari i pattolay?