Itabarang na Biblia: “Iyarayyu nu i attolay nu ta pangaya ta kuartu, anna makkontento kamu ta anni laman nga egga nikamu.”​—Hebreo 13:5.

Sangawe, aru i kakkagian na totolay nga mawag kanu nga egga nittam. Ngem kagian na Biblia nga awayya tam ‘makontentu ta anni laman nga egga nittam.’ Kunnasi?

Lillitan i “pangaya ta kuartu.” Megafu ta “pangaya ta kuartu,” isakrifisio na totolay i gawa-gawayyan, familia, kokkofun, moral, maski i dignidadda. (1 Timoteo 6:10) Awan tu sesserbi natun! Magga mabba “ari vuluvuga makontentu” i tolay nga minangngaya ta kinariku.​—Eclesiastes 5:10.

Mas importante i totolay anne ta gannug ira. Egga gapa i serbi na material ira nga gannug. Ngem ari mawayya na gannug ira nga ayatan onu appresian ittam; tolay laman i makangngua tatun. Makoffun i “kurug nga kofun” tapenu mabbalittam tu kontentu.​—Proverbio 17:17.

Itabarang na Biblia: “I magayayya nga futu ay makasta nga uru.”​—Proverbio 17:22.

Kagitta na “makasta nga uru,” maattammattam i taki tam nu magayayya ittam. Ngem kunnasi ittam nga magayayya maski mataki ittam?

Mappabalo. Nu agga-nono tam i problema tam ira, “kanayun nga marake i aggaw” tam. (Proverbio 15:15) Imbes tu kunna, kagian na Biblia nga “mabbala-balo [ittam] gapa nga kanayun.” (Colosas 3:15) Ipappabalo tam maski i simple ira nga gannug. I makasta nga pallammag na bilag, i malannaw nga paddag, anna i pakiggalo na iddeddukattam​—mamagayayya nittam danatun.

Duffunan i tanakuan. Maski nu marake i gawa-gawayyattam, “mas dakal i pagayaya ta pangiyawa anne ta pangalawa.” (Kingngua 20:35) Nu mappabalo nittam i totolay megafu ta neduffuttam nira, magayayya ittam anna makattamattam i problema tam ira. Makkasta i pattoletam nu duffunattam i tanakuan nga makkasta gapa i pattoleda.

Itabarang na Biblia: “Pilian i kapianan [“mas importante,” NW] ta ngamin.”​—Filipos 1:10.

Posible nga mappeligro i relasion na magatawa nu baddi laman i tiempoda ta kataggi-tadday. Makasta gafu nu iprayoridad na magatawa i relasiodda​—tadday yaw ta pinaka-importante ta pattoleda.

Makkavulu nga kuan i ganna-gannug. Imbes nga magitetadday, makkavulu kamu nakuan ta pagangngua tu ganna-gannug. “Mas makasta i dua anne ta tadday,” kagian na Biblia. (Eclesiastes 4:9) Awayyanu nga makkavulu nga mallutu, magehersisio, marrelaks, onu maddibersion.

Ipasingan nga ayatammu i atawam. Ipagaram na Biblia ta magatawa nga ayatan anna irespetoda i kataggi-tadday. (Efeso 5:28, 33) Siguradu nga mamalladda ta pagatawa i pakiggalo, paggakko, onu maski i pangiyawa tu simple nga regalu. Siempre, i seksual nga relasion nakuan ay para laman ta magatawa.​—Hebreo 13:4.