ARI tu kunnaw i ikaya na Dios nga pattoletam. Napannu nakuan i davvun tu totolay nga mappasakup ta Namaratu, mappagiya nisa, anna mangipasingan ta makakkasta ira nga kualidadna. Ikaya na Dios nga magayayya ira nga makkaravulu ta pamadakal ta familiada, paddiskubre tu bagu ira nga gannug, anna ta pagangngua ta davvun tu paraiso.

• “Pagimmangan na i gerra ira ta tanga-ravvunan.”​—Salmo 46:9.

• “Yaw ngana i tiempo nga em-mu panaral ta totolay nga namarattal toye ta utun na davvun ta panara-daral!”​—Nepakannammu 11:18.

• “Awan noka tu maski sinni nga mangikagi: ‘Mataki ngà.’”​—Isaias 33:24.

• “I trabahu na limi-lima na napilì ira ay pagayayyatadda tu mapia.”​—Isaias 65:22.

Kunnasi nga matuppal danaw nga profesiya? Sinullo na Dios i Anana nga si Jesus bilang Patul ta perfekto nga gobiernu nga mammaguray ta langi nga sakupna i davvun. Magalan yaw ta Biblia nga Pappatulan na Dios. (Daniel 2:44) Kagian na Biblia meyannung kani Jesus: “I Yafu Dios ay pabbalinan na yaya noka tu patul.”​—Lucas 1:32, 33.

Ta kegga ni Jesus ta davvun, aru nga milagro i kingnguana tapenu ipasingan nga makkasta i pattolay sonu mammaguray ngana yayya nga Patul.

• Pinammapiana i ngamin nga taki. Ipasingan naw nga alsanna i pakkafian ira na baggi na totolay.​—Mateo 9:35.

• Pinakkalmana i bebay. Ipasingan naw nga protektanna i totolay gukaban na pangontrol ta natural ira nga fuersa.​—Marcos 4:36-39.

• Pinakanna i rinivu. Ipasingan naw nga iyawana i pakawagan na totolay.​—Marcos 6:41-44.

• Pinabbalinna i danum tu binarayang ta tadday nga boda. Pakurugan naw nga kuanna tu makapagayayya i pattolay.​—Juan 2:7-11.

Kunnasim nga malawa i pattolay nga ikaya na Dios para ta mangaya ira nisa? Egga i mawag nga kuammu. Kagian na Biblia nga mawag tu maleg mu “i dalan nga mappange ta inango, ay pilippiga i makaleg tatun.”​—Mateo 7:14, NW.

Anni i dalan mappange ta inango? Kinagi na Dios: “Sakan, si Jehova nga Dios mu, i manuttuddu nikaw tapenu mabenefisiowakka, i mangigiggiya nikaw ta dalan nga mawag tu lakarammu.” (Isaias 48:17) Nu tuttulammu yaw nga tabarang, makkasta i pattolem.

 Kinagi ni Jesus: “Sakan i dalan, i kurug, anna inango.” (Juan 14:6) Nu kuattam i bilin ira ni Jesus anna parigattam i ehemplona, maddukko ittam ta Dios anna makkasta i pattoletam.

Kunnasim malegan i dalan mappange ta inango? Napakaru i relihion, ngem inabisowan ittam ni Jesus: “Ari tu ngamin i makkagi niakan, ‘Afu, Afu,’ ay makatallung [ta] Pappatulan ta langi, nu ari danuri laman i mangngua ta uray na Yamà ta langi.” (Mateo 7:21) Kinagina paga: “Kannammuan nu ira megafu ta kukukuad-da.” (Mateo 7:16) Maduffunakka na Biblia nga mammuan i kurug nga relihion.​—Juan 17:17.

Kunnasim matuttulan i dalan mappange ta inango? Mawag nga mammammum i nangiyawa tu inango nittam: Sinni yayya? Anni i ngaganna? Anni ira i kualidadna? Anni i kukukuanna para nittam? Anni i ikayana nga kuattam? *

Ari laman tu basta mattrabahu, kuman, maggayang, anna makkafamilia i ikaya na Dios para ta totolay. Awayya tam nga makilala i Namaratu anna mabbalin tu kofunna. Mepasingattam i pangaya tam nisa gukaban na pagangngua tam ta urayna. Kinagi ni Jesus: “Yaw i inango nga adde ta ngangangay: i pakannammu da tu sikaw i tattadday nga kurug nga Dios.”​—Juan 17:3.

Nu nammuattam ngana i ikaya na Dios nga kuattam, awayyana nga egga ira i mawag tu uliattam. Kagitta na mariga ngem i kurug, makkasta i pattoletam nu igafu tam i pallakag ta dalan mappange ta inango. Tapenu mammuammu i tabbag ta pakkiavu ira meyannung ta Dios, mangiyofer i Saksi ira ni Jehova tu libre nga paggigiammu tu Biblia ta oras anna lugar nga puede ka. Makontak nakami ta website mi nga www.pr418.com.