Ngatta ikaya tam nga mattolay tu mannanayun? Kagian na Biblia nga nipay na Dios nittam yatun nga pakkaraga. (Eclesiastes 3:11) Kagianna paga nga “i Dios ay aya.” (1 Juan 4:8) Ayatan ittam na Dios anna arianna iyawa nittam i pakkaraga nga mattolay tu mannanayun nu imposible mabba yatun nga mesimmu.

Awan tu maya nga matay nittam. I kurug, kagian na Biblia nga “kalaban” i patay. (1 Corinto 15:26, NW) Mabi nga matay i karuan, apaddu gapa i inango na tanakuan. Ngem magga matay ittam ngamin. Maganassing i aru nu nonopadda nga matay ira. Mapawan paga kari i patay? Talaga kari nga posible yatun?

Ammum kari nga ari vuluvuga nga ginakkag na Dios nga matay i tolay? Pakurugan na libru ta Biblia nga Genesis nga ginakkag na Dios nga mattolay ittam tu mannanayun ta davvun. Pinaro ni Jehova nga Dios i davvun nga kumpleto ta pakawagan na tolay tapenu magayayya ira. Pinaratuna gapa i ollu nga tolay, si Adan. Nipayna yayya ta paraiso ta hardin na Eden. Kabalinna, “nasingan na Dios nga makakkasta i ngamin nga kiningnguana.”​—Genesis 1:26, 31.

Pinaratu na Dios si Adan nga perfekto. (Deuteronomio 32:4) Perfekto gapa i nono anna baggi  maski ni Eva nga atawana. Kinagi ni Jehova ta nira: “Maggaka kamu anna umaru kamu, pannuannu i davvun anna imagurayannu, anna pappasakupannu i manango na bebay anna i makkakagag ira nga pinaratu ta langi anna i kada sigga-matolay nga pinaratu nga magguyu-guyu ta davvun.”​—Genesis 1:28.

Kawagan i tiempo tapenu mapannu i davvun tu gaka-gakada. Mawag tu magana si Eva, anna magana gapa i ánana ira adde ta mapannu i interu mundo kagitta na ginakkag na Dios. (Isaias 45:18) Ipromesa kari gapa yatun ni Jehova kada Adan anni Eva nu mattolay laman ira adde ta masingadda i dua onu tallu nga henerasion?

Nonopan gapa i nebilin nira nga imagurayadda i aya-ayam. Nadog si Adan nga ngagananna i ayam ira. Kawagan i tiempo tatun. (Genesis 2:19) Ngem tapenu mappasakup i ayam ira nisa, mawag nga ammuanna i meyannung nira anna gigiammuanna nu kunnasi ira nga tangngallan. Mas apiddu nga tiempo i kawagan tatun.

Ipasingan gafu na bilin na Dios nga pannuan i davvun anna imagurayan i aya-ayam nga nadisenio nga mattolay tu apaddu i ollu nga magatawa. I kurug, nattolay si Adan tu apapaddu.

Mabibbig ta Biblia nga mas apaddu i inango na totolay tagga anne sangawe. Kagianna: “Nattolay si Adan tu 930 nga dagun.” Egga paga kinagina nga annam nga lallaki nga nattolay ta maturu 900 nga dagun! I ngagadda ay Set, Enos, Kenan, Jared, Matusalem, anna Noe. Nattolay ira nige na Delubio ta tiempo ni Noe​—600 ngana i dagun ni Noe turi ta naddelubio. (Genesis 5:5-27; 7:6; 9:29) Ngatta posible i kunnatun nga kapiddu na pattolay?

Nattolay ira aranni ta tiempo nga perfekto paga da Adan anni Eva. Posible nga yatun i makagafu nu ngatta apaddu i inangoda. Ngem ngatta konektadu i kinaperfekto ta pattolay tu apaddu? Anna kunnasi nga mapawan i patay? Tapenu matabbag danatun, ammuattam labbi nu ngatta mallakay onu mabbako anna matay ittam.