MASKI nu narresulta ta liwa anna patay na ngamin nga totolay i ari pattuppal na ollu nga magana tam nga da Adan anni Eva, ari lagapa nga nanguli i gakkag na Dios para ta totolay. Ta interu Biblia, mamippiga nga nipasiguradu na Dios nga ari nanguli i gakkagna.

• “I matunung ira ay irensiad-da i davvun, anna maddian ira taw tu mannanayun.”​—Salmo 37:29.

• “Sillunganna i patay tu mannanayun, anna funatan na Soberano nga Yafu Jehova i lulua ta ngamin nga muka.”​—Isaias 25:8.

• “I patay i urian nga mapatulu.”​—1 Corinto 15:26.

• “Awan ngana noka tu matay, onu maraddam, onu tumangi-tangi, onu magattam ta taki.”​—Nepakannammu 21:4.

Kunnasi nga “sillungan [na Dios] i patay” tapenu “mapatulu” yatun? Manawag i kagian na Biblia nga “i matunung ira ay irensiad-da i davvun, anna maddian ira taw tu mannanayun.” Ngem kagianna gapa nga “awan tu matunung nga tolay ta davvun nga kanayun nga magangngua tu mapia.” (Eclesiastes 7:20) Kayàna kari kagian nga ari ngana tuttulan na Dios i estandartena tapenu makapattolay tu mannanayun i imperfekto nga totolay? Ari vuluvuga! Imposible yatun megafu ta “ari vuluvuga nga malladdug i Dios.” (Tito 1:2) Anni gafu i kuan na Dios tapenu matuppal i makakkasta nga gakkagna para ta totolay?

Nangiyawa si Jehova nga Dios tu makakkasta nga probision tapenu mapalubbangan i totolay ta patay​—gukaban na pappaga tu tavvu. I tavvu ay i kaparehu nga balor na tadday nga gannug nga mepaga nga danios perwisiu onu tapenu meyawa i hustisia. Megafu ta minakkaliwa anna nasentensian nga matay i ngamin nga totolay, kunnaw i kagian na Biblia: “Ari nga matavvu na tolay i baggi na laggapa; arian na nga mapagan ta Dios i inango na, ta i paga na inango na tolay ay kuruga mangina. Ari vuluvuga makalanno i en-na nga pappaga.”​—Salmo 49:7, 8.

Nu matay i imperfekto nga tolay, mapaganna laman i liwi-liwana; arianna nga matavvu i mismu nga baggina, ni tu mapaganna i liwi-liwa na maski sinni. (Roma 6:7) Kawagattam i tolay nga perfekto anna awan tu liwana tapenu iyawana i inangona para ta liwi-liwa tam, ari nga para ta liwi-liwana.​—Hebreo 10:1-4.

Kunnatun mismu i kingngua na Dios. Zinogna ta davvun nga naggafu ta langi i Anana nga si Jesus tapenu meyana tu perfekto nga tolay anna awan tu liwana. (1 Pedro 2:22) Kinagi ni Jesus nga minay yayya tapenu “iyawa na i inango na tapenu matavvu i aru nga totolay.” (Marcos 10:45) Natay yayya tapenu mapawan i patay anna mapeggattam tu mannanayun nga inango.​—Juan 3:16.

Mattolay ittam sangawe ta ketuppalan na profesiya ta Biblia nga “ziga-riga” nga mamakurug nga egga ittam ngana ta “pangurianan ira nga aggaw” naw nga marake nga sistema na ganna-gannug. (2 Timoteo 3:1) Mangultimu i pangurianan ira  nga aggaw ta “aggaw na pamanunnu anna kakastigo na totolay nga awan tu agganassing da ta Dios.” (2 Pedro 3:3, 7) Ngem mepaliag ta kadaral i totolay nga mangiddu ta Dios anna mabendisionan ira tu “katolayan nga awan tu adde na.”​—Mateo 25:46.

Minillion i egga tiansana nga mattolay tu mannanayun sonu mapaginnolay ira. Namaginnolay si Jesus tagga ta nappasiar yayya ta siudad na Nain. Natay i tattadday nga ana na balu anna “ziminatu i allo” ni Jesus yari tu pinaginnolena yayya. (Lucas 7:11-15) Kinagi gapa ni apostol Pablo: “Egga pagiddanamà ta Dios . . . nga egga noka i paginnolay parehu na matunung anna ari matunung.” Yaw nga kurug nga iddanama ay mangipasingan ta daka-dakal nga pangaya na Dios ta totolay.​—Kingngua 24:15, NW.

Binillion i posible nga mattolay tu mannanayun. Kagian na Biblia: “I matunung ira ay irensiad-da i davvun, anna maddian ira taw tu mannanayun.” (Salmo 37:29) Tatun nga tiempo, magayayya anna mapasikan ira nga maekspiriensa i nitura ni apostol Pablo 2,000 dagun ngana i nappasa: “Patay, sitaw ngana i dian na pamatulu mu? Sitaw ngana i dian na zitam nga mamapatay?” (1 Corinto 15:55) Napawan ngana i ari mammaffu nga kalaban!