Kinagi na Dios kani Adan: “Siguradu nga matay ka ta aggaw nga kumakka [ta vunga na kayu].” (Genesis 2:17) Ari ngana nga mawag yatun nga bilin nu mallakay anna matay mabba si Adan. Ammu ni Adan nga ari yayya matay nu arianna kiminan ta vunga na kayu.

Ari tu mawag nga kuman da Adan anni Eva ta vunga na kayu tapenu mattolay ira​—aru i kayu nga mavvunga ta hardin. (Genesis 2:9) Nepasingan nakuan na ollu nga magatawa i pattuppalda ta nangiyawa nira tu inango nu ariadda kiminan ta vunga na kayu. Nepasingadda gapa nakuan nga mangurug ira ta kepangngattan na Dios nga mangigiya nira.

Tapenu malippawa tam nu ngatta natay da Adan anni Eva, mawag nga usitakkattam i tadday nga eksena nga nakafekto nittam ngamin. Nangusa si Satanas nga Diablo tu iraw tapenu kagian i makadaral nga kinaladdug. Kagian na Biblia: “I serpiente i pinakamemmugug ta ngamin nga simaron nga ayam ta tana nga kingngua ni Jehova nga Dios. Yari tu kinagina ta babay: ‘Kurug kari nga kinagi na Dios nga ari kamu kuman ta vunga na kada kayu ta hardin?’”​—Genesis 3:1.

Simibbag si Eva: “Awayyami nga kuman ta vunga na kayu ira ta hardin. Ngem kinagi na Dios meyannung ta vunga na kayu nga egga ta tangnga na hardin: ‘Ari kamu kuman tatun anna ariannu siggeran; ta matay kamu nu kanannu yatun.’” Simibbag i iraw: “Siguradu nga ari kamu matay. Ta ammu na Dios nga ta mismu nga aggaw nga kumakkamu tatun, mavukatan i matanu anna mabbalikkamu tu kagitta na Dios nga makannammu ta mapia anna marake.” Kakkagian gafu ni Satanas nga laddug si Jehova anna egga iyeyetuna nga makasta nga gannug kada Adan anni Eva.​—Genesis 3:2-5.

Nangurug si Eva tatun. Ininnanna i vunga na kayu. Makakkasta nga innan anna maka-engganyo! Nanga yayya anna kinnanna yatun. Kagian na Biblia: “Iniddanna gapa i atawana turi ta kavuluna ngana yayya anna kiminan gapa.”​—Genesis 3:6.

Siguradu nga narraddam i Dios ta pakasinganna ta iddeddukanna nga ána nga sadya nga ari nattuppal nisa! Anni i kingnguana? Kinagi ni Jehova kani Adan: “Manoli ka ta davvun, ta yatun i naggafuammu. Megafu ta gavu ka ay ta gavu i panoliammu.” (Genesis 3:17-19) Megafu tatun, “nattolay si Adan tu 930 nga dagun, anna natay yayya.” (Genesis 5:5) Ari nga minay ta langi si Adan onu ta tanakuan nga lugar. Ari yayya nattolay  nigena nga naparatu ta gavu. Turi ta natay yayya, nawawanna i inangona anna nanoli yayya ta gavu. Awan ngana yayya. Kaddaraddam yatun!

Megafu ta sadya nga ari pattuppal da Adan anni Eva, nawawadda i kinaperfekto anna i mannanayun nga inango. Nanguli i paddia-paddiadda; nabbalin ira nga imperfekto anna minakkaliwa. Ngem ari laman tu ira i afektadu ta ariadda pattuppal. Nepasada gapa i kina-imperfekto ta ngamin nga ánada. Kagian na Roma 5:12: “Megafu ta tadday nga tolay [si Adan], egga ta utun na davvun i pattagaruli, ay i katagarulian na i nangirattal ta patay. Ay nawwara i patay ta ngamin nga totolay megafu ta nattagaruli ngamin i totolay.”

Niyarig na Biblia i liwa anna patay ta “tela nga nakavungun ta ngamin nga totolay anna [ta] kallag nga manerra ta ngamin nga nasion.” (Isaias 25:7) Vungunan naw nga tela i totolay kagitta na kappatay nga lumay nga awan tu makatammang. Wan, ‘matay i ngamin nga totolay gafu kani Adan.’ (1 Corinto 15:22) Kagitta na pakkiavu ni apostol Pablo: “Sinni i makapalubbang niakan toye nga baggi nga matay?” Egga kari makawayya?​—Roma 7:24.