Tadday laman ittam nga familia gafu ta naggafu ittam ta ollu nga tolay nga si Adan. Makka-aya-aya anna irespeto nakuan na makkakafamilia i kataggi-tadday, ngem ari tu kunnatun i mesissimmu ta maddaggun. Ari tu kunnaw i kayà na minaggiddu nga Dios tam.

“Ayatammu i kasittolem nga kunna baggim.”​—LEVITICO 19:18.

“Ayatan nu i mangontra nikamu.”​—MATEO 5:44.

Kunnaw i kagian na Uvovug na Dios meyannung ta aya ta 1 Corinto 13:4-7:

“I aya ay pappasensia anna pagallo.”

Pannonoppammu: Anni i matageno mu nu pasa-pasensian anna ikallo naka na tanakuan anna ari ira mapporay nu makkamali ka?

I aya ay “ari tu pamassa-passil.”

Pannonoppammu: Anni i matageno mu nu kanayukka nga passuspechan onu passilan na tanakuan?

I aya ay “ari tu pakkaraga ta pammakapian laggapa na baggi.”

Pannonoppammu: Anni i matageno mu nu irespeto na tanakuan i pagimamma mu anna ariadda kanayun nga ipilit i opiniodda?

I aya ay “ari tu . . . pamappan tu taki na nono.”

Pannonoppammu: Kakayà nga pakoman na Dios i tolay nga nakaliwa ngem nabbabawi gabbalaman. “Ari tu kanayun i pamaliwa na; ari yaya nga malussaw adde noka.” (Salmo 103:9) Magayayya ittam nu pakoman ittam na natakitattam. Mawag gafu gapa nga pakomattam i nakataki ta nittam.​—Salmo 86:5.

I aya ay “ari tu pappagayaya ta marakay.”

Pannonoppammu: Matakitan ittam nu magayayya i totolay ta marake nga mesissimmu nittam. Ariattam gafu gapa magayayya ta marake nga mesissimmu ta tanakuan maski nu marake i pinattratuda ta nittam.

Tapenu bendisionan ittam na Dios, mawag tu kunnaw i pangaya tam ta totolay maski nu sinni paga ira. Makua tam gapa yaw nu duffunattam i makawag.