Bendision ira Para ta Mattuppal ta Dios
Kinagi ni profeta Moises nga nu tuppalattam i bili-bilin na Dios, bendisionanna ittam. (Deuteronomio 10:13; 11:27) Mattuppal ittam ta Dios, ari tu gafu ta maganassing ittam ta parusana. Paguyuan ittam na makakkasta ira nga kualidad na Dios nga mattuppal ta nisa gafu ta ayatattam yayya anna manaki tam nga makangngua tu gannug nga makataki nisa. “Nu ayatat-tam i Dios, parulattat-tam gapa i bili-bilin na.”—1 Juan 5:3.
Ngatta bendision i pattuppal tam ta Dios? Innattam i dua nga rason.
1. MABBALITTAM TU MA-UTO NU MATTUPPAL ITTAM TA DIOS
“Sakan si Jehova nga Dios mu, i manuttuddu nikaw tapenu mabenefisiowakka, i mangigiggiya nikaw ta dalan nga mawag tu lakarammu.”—ISAIAS 48:17.
Ammammu anna igigiya ittam ni Jehova nga Dios, i Namaratu nittam. Nu kayà tam nga makangngua tu makasta ira nga desision base ta tuttudduna, mawag nga gigiammuattam ta Masanto nga Tura i ipakua na Dios nittam anna mawag tu kuattam yatun.
2. MABBALITTAM TU MAGAYAYYA NU MATTUPPAL ITTAM
“Magayayya danuri maggigginna ta uvovug na Dios anna mattuttuppal tatun!”—LUCAS 11:28, NW.
Sangawe, minillion nga mattuttuppal ta Uvovug na Dios i kurug nga magayayya. Angngariganna, tadday nga lalaki nga taga-Spain i mabi nga mappatu i uluna anna marake i pattratuna ta totolay—maski ta atawana. Tadday nga aggaw, nabibbigna i nitura ni profeta Moises meyannung ta malumamo nga si Jose, i ana ni Jacob. Nelaku si Jose, nabbalin tu aripan, anna nefuku yayya maski nu awan tu liwana. Ngem malumamo, memammo, anna minammakoma lagapa yayya. (Genesis, kapitulo 37-45) Kinagi na lalaki nga taga-Spain: “Gafu ta ehemplo ni Jose, nabbalin ngà tu malumamo, masippo, anna mafugaddakku ngana i baggì. Sangawe, magayayya ngà ngana.”
Aru paga i magigiammu tam ta Masanto nga Tura nu kunnasi tam nakuan nga tratuan i tanakuan. Innattam yatun ta tumunug nga artikulo.