Ikavurungan Ittam na Minaggiddu nga Namaratu
1. PANNAWAGAN NA NAMARATU I BILAG
Imposible i pattolay ta mundo nu awan tu bilag. Mangiyawa i bilag tu enerhia tapenu maddon, mallappaw, anna mavvunga i fun na kayu ira. Gafu ta bilag, makasussu tu danum ta davvun i gamu ira na kayu anna umay yatun ta donna ira anna mallawan gabbalaman tu water vapor.
2. MAPPA-URANG I NAMARATU
Niyawa na Dios i urang tapenu mavvunga i mulu-mula ira ta davvun tapenu egga i kanattam. Mappa-urang i Dios anna pavvunganna i mulu-mula tam, iddanna ittam tu kanan, anna pannuanna i giffutuattam tu pagayayya.
3. IYAWA NA NAMARATU I KANATTAM ANNA I PASSINNUTTAM
Mavurung i aru nga yama nu kunnasida meyawa i kawagan nga makan anna sinnun na familiada. Kunnaw i kagian na Katurakan: “Innan nu i mammanu ira. Ari ira nga mabbini onu maggatag tu ipappad-da ta abayaw. Nu kunnuri paga, tolayan ira na Yama nu ta langi! Ari kari nga mas mangina kamu anne ta mammanu ira?”—Mateo 6:25, 26.
“Innan nu i nepattalovu na lappaw ira ta tana-tana! . . . Kagiak-ku nikamu: maski paga gari si Patul Solomon ta kariku na, ay ari nga nassinnun tu kagitta na kasta na tadday toye ta lappaw ira. Nu sinnunan paga na Dios tu makasta i kaddo ta tana-tana, . . . ari kari nga mas paga i paninnun na Dios nikamu?”—Mateo 6:28-30.
Nu meyawa na Dios i kanan anna passinnuttam, siguradu nga meyawana gapa i karuan paga nga kawagattam. Nu kukukuattam i uray na Dios, bendisionanna i lallappo tam nga mammula tapenu egga i makattam onu duffunanna ittam nga makaleg tu trabahu tapenu magatang tam i pakawagattam ira.—Mateo 6:32, 33.
Talaga aru i rasottam nga ayatan i Dios nu gigiammuattam i bilag, urang, mammanu, anna i lappaw. Iyesplika na tumunug nga artikulo nu kunnasi nga makiyuvovug i Dios ta totolay.