Niregalu na Dios ta totolay i pakawayya nga makiyuvovug nisa anna ikagi i mataga-tagenoda gukaban na pakimallo. Nipakimallo ni profeta David: “Ta tabbagam-mu i dasa-dasal mi ira. Ngamin i totolay ay aranniad-daka.” (Salmo 65:2) Ngem kunnasi ittam makimallo tapenu ginnan na Dios yatun anna bendisionanna ittam?

Ta pakimallo mu, makagim ta Dios i ngamin nga mayan na futum—i kurug nga mataga-tageno mu. (Salmo 62:8) Kakayà na Makapangngua-sa-ngamin i napafutuan nga pakimallo.

Aru i titulo onu pagagalda ta Dios, ngem tattadday laman i ngaganna. “Sakan si Jehova. Yatun i ngagakku.” (Isaias 42:8) Mabibbig i ngagan nga Jehova tu mami-7,000 ta Masanto nga Tura. Inusa na aru nga profeta i ngagan na Dios ta pakimalloda nisa. Kinagi ni Abraham: “Fabor bi Jehova, . . . pagurayammà nga maguvovug [nikaw].” (Genesis 18:30) Usattam gapa nakuan i ngagan na Dios nga Jehova nu makimallo ittam.

Malippawa na Dios i appana-panono anna mataga-tageno tam maski anni i lengguahe tam. Ipasiguradu na Uvovugna: “I Dios ay arian na nga padduma-ruman i pangikakua na ta totolay. Ta alawatan na i sinni laman nga matunung anna minakkimoray sa, maski nu anni nga rasa i naggafuan na.”​—Kingngua 10:34, 35.

Ngem tapenu bendisionan ittam na Dios, ari laman tu makimallo i kuattam. Ta tumunug ira nga artikulo, ammuattam i mawag nga kuattam.