Magigiammu Tam i Meyannung ta Dios ta Profetana Ira
Tagga, nangiyawa i Dios ta profetana ira tu importante ira nga mensahe para ta totolay. Mammuattam kari taw ira nga mensahe nu kunnasi tam malawa i bendision na Dios? Wan. Innattam i magigiammu tam ta tallu nga matalo nga profeta.
ABRAHAM
Ari nga mangireruma i Dios anna ikayana nga bendisionan i ngamin nga totolay.
Nipromesa na Dios kani profeta Abraham: “Siguradu nga mabendisionan i ngamin nga familia ta davvun gukabammu.”—Genesis 12:3.
Anni i magigiammu tam? Iddeddukan ittam tu mapia na Dios anna ikayana nga bendisionan i ngamin nga familia—lallaki, babbay, anna abbarabbing—nga mattuppal nisa.
MOISES
Minangngikallo i Dios anna bendisionanna danuri mappursigi nga makilala yayya.
Niddan na Makapangngua-sa-ngamin si profeta Moises tu pakapangngua nga mammilagro. Ngem nipakimallo lagapa ni Moises: “Ipakannammum niakan i dala-dalammu, tapenu mammammu taka anna kana-kanayukka nga magayayya niakan.” (Exodo 33:13) Sinabbag na Dios i kiddaw ni Moises yayya nga mas minaru i pakannammuna anna mas nalippawana i dala-dalan anna i kualidad ira na Dios. Angngariganna, nagigiammu ni Moises nga i Namaratu ay “Dios nga minangngikallo anna minangngikabbi.”—Exodo 34:6, 7.
Anni i magigiammu tam? Ikaya na Dios nga bendisionan ittam ngamin—lallaki, babbay, anna abbarabbing—nu mappursigi ittam nga mas mammammu yayya. Nipakannammuna ta Masanto nga Tura nu kunnasi i paddayaw nisa anna karagatanna nga iyawa i fabor anna bendisionna ta nittam.
JESUS
Sigga-allo nga inuru ni Jesus i ngamin nga klase na taki
Malawa tam i mannanayun ira nga bendision na Dios nu gigiammuattam i meyannung kani Jesus, i kiningnguana, anna i nitudduna.
Aru i magigiammu tam ta Uvovug na Dios meyannung ta pattolay anna tuttuddu ni Jesus. Niddan na Dios si Jesus tu pakapangngua nga mammilagro gitta na panguru ta vuling, ta bangngag, anna ta pilay. Namaginnolay paga lagu yayya. Nipasingan gafu ni Jesus i bendision ira nga iyawa noka na Dios ta totolay. Kinagina nu kunnasi tam nga malawa danatun nga bendision: “Yaw i inango nga adde ta ngangangay: i pakannammu da tu sikaw i tattadday nga kurug nga Dios, anna i pakannammu da gapa kani Jesu-Cristo nga zinog mu.”—Juan 17:3.
Minangngikabbi, minaggiddu, anna masippo si Jesus. Minaranni nisa i lallaki, babbay, abbing, anna mannakam, anna napaguyu ira ta kinagina nga: “Maggigiammu kamu niakan ta masippo anna minappakalinno ngà. Ta kunnuri, maleran nu i hustu nga pagibannag.” (Mateo 11:29) Ari tu marake i pinattratu ni Jesus ta babbay kagitta na kukukuan na karuan ta tiempona. Masippo anna marespeto si Jesus anna niddanna tu dignidad i babbay ira.
Anni i magigiammu tam? Iddeddukan tu mapia ni Jesus i totolay anna makakkasta yayya nga ehemplo nu kunnasi tam tratuan i kataggi-tadday.
ARI TU SI JESUS I DIOS
Ituddu na Masanto nga Tura nga “tattadday laman i Dios” anna si Jesu-Cristo ay mensaheru na Dios. (1 Corinto 8:6) Manawag nga kinagi ni Jesus nga mas atannang nisa i Dios anna zinogna yayya ta davvun.—Juan 11:41, 42; 14:28. *
^ par. 17 Tapenu magigiammum paga i meyannung kani Jesu-Cristo, innan i kapitulo 4 anna 5 na libru nga Anni i Ituddu na Biblia Nittam? nga available online ta www.pr418.com/ibg.