Nauli Kari i Netura nga Uvovug na Dios?
Nononopan na karuan nga totolay nu nauli i netura nga Uvovug na Dios. Kinagi ni profeta Isaias nga “mattalupaddian tu mannanayun” i uvovug na Dios. (Isaias 40:8) Ngatta makasiguradu ittam nga nemmuguran tu mapia i uvovug ira na Dios?
Mawayya na Dios nga pattalupaddianan anna immuguran i Uvovugna tapenu ari nga mauli. Ta ollu nga tiempo, nu makopia i masanto nga tura, bilangan na taga-kopia ira i kada letra tapenu masiguraduda nga awan tu neyammung, nauli, onu nalsa tatun. Ngem imperfekto i totolay, yayya nga nakkamali gapa tu baddi i karuan nga taga-kopia.
NGATTA MAKASIGURADU ITTAM NGA I ORIHINAL NGA MENSAHE NA DIOS I EGGA TA MASANTO NGA TURA SANGAWE?
Rinivu i kopia na dana nga manuskrito ira na Masanto nga Tura. Nu egga i baddi nga neruman na tadday nga kopia, mekumpara yatun ta tanakuan paga ira nga kopia tapenu masingan i posible nga ugo tatun.—Tapenu aru paga i magigiammum, innan i artikulo nga “Nabago Ba o Sinadyang Baguhin ang Bibliya?” ta jw.org/tl.
Tadday nga angngarigan i antigu ira nga dokumento nga magalan tu Dead Sea Scroll nga nadiskubre na bedouin ira ta kueba ira nga aranni ta Dead Sea tagga ta 1947. Masingan taw nga antigu ira nga tura, nga maturu dua rivu dagun ngana i kabayagna, i karuan nga parte na Masanto nga Tura. Nikumpara na eksperto ira danaw nga antigu nga manuskrito ta Masanto nga Tura nga egga nittam sangawe. Anni i nadiskubreda?
Nadiskubreda nga parehu lagapa ta orihinal nga netura ira i Uvovug na Dios nga egga nittam sangawe. * Pakurugan na dana ira nga manuskrito nga i orihinal nga mensahe na Dios i mabibbig tam ta Masanto nga Tura. Makasiguradu ittam nga inimmuguran tu mapia na Dios i mayan na Masanto nga Turana para ta nittam sangawe.
Makapattalo ittam gafu nga fustu i mabibbig tam ta Uvovug na Dios. Megafu tatun, innattam ngana gapa i magigiammu tam meyannung ta Dios ta profetana ira.
^ par. 7 The Complete Dead Sea Scrolls in English, ni Geza Vermes, pahina 16.