Nipakannammu na Namaratu i Makakkasta ira nga Promesana
Namegafu paga ta nikeparatu na totolay, makikkiyuvovug ngana nira i Namaratu gukaban na anghel anna profeta ira. Pinilina gapa nga ipetura i mensahe anna i promesana ira. Afektan naw ira nga promesa na Dios i mappange mu. Pakalegammu gafu sangawe ta promesa ira na Dios?
Mabibbig ta Masanto nga Tura i mensahe na Dios ta nittam. (2 Timoteo 3:16) Kunnasi nga nipatura na Dios ta profeta ira i mensahena? (2 Pedro 1:21) Nipay na Dios i appana-panonona ta ginnonopan na nattura ira. Megitta yatun ta tadday nga boss nga nappatura ta sekretariona. I boss lagapa i autor na tura. Kagitta natun, maski nu nipatura na Dios ta totolay i mensahena, yayya lagapa i kurug nga Autor na Masanto nga Tura.
MABIBBIG I UVOVUG NA DIOS TA ARU NGA LENGGUAHE
Kuruga importante i mensahe na Dios yayya nga ikayana nga mabibbig anna malippawa yatun na ngamin nga totolay. Sangawe, mabibbig na “totolay na madduma-ruma i rasa, tribu, paguvovug, anna nasion” i “mannanayun nga evanghelio.” (Nepakannammu 14:6) Gafu ta bendision na Dios, mabibbig i kumpleto onu i karuan nga parte na Masanto nga Tura ta maturu 3,000 nga lengguahe. Mas aru yatun anne ta maski anni nga libru ta interu nga mundo.