Talaga kari makapattalo ittam nga matuppal i ngamin nga promesa na Dios? Kumbinsidu si Jesus tatun, anna nangurug ta tuttudduna danuri nagginna sa. Innan i ilustrasion nga kinagina ta Sermon ta Vukig nga nakarekord ta Mateo 5:18: “Ta kakurugan na kagiak-ku nikamu: adde ta ketuppal na langi anna davvun, awan tu mapawan nga maski kabadditan nga parte na Dob adde tu ari nga maparulo ngamin.”

I kabadditan nga letra ta Hebreo nga alfabeto ay י (yod), nga ollu nga letra na Tetragrammaton, i sagradu nga ngagan na Dios nga Jehova. * Fuera paga ta mismu uvovug anna letra ira na Dob na Dios, tagibaloran na eskriba anna Fariseo ira i kada kurri onu “parte” na letra.

Kinagi ni Jesus nga mas posible tu mappasa i langi anna davvun anne ta ari maparulo i kabadditan nga detalye na Dob. Ngem siniguradu nittam na Katurakan nga mannanayun adde noka i literal nga langa-langi anna davvun. (Salmo 78:69) Ipasingan naw gafu nga matuppal maski i kabadditan nga detalye na Dob.

Interesadu kari si Jehova nga Dios ta baddi ira nga detalye? Wan. Ikonsidera yaw: Nebilin ta Israelita ira tagga nga ariadda kattuan i maski anni nga tulang na kordero na Paskua. (Exodo 12:46) Baddi yatun nga detalye. Ammuda kari nu ngatta ariadda puede kattuan i maski anni nga tulang? Posible nga ari. Ngem ammu ni Jehova nga Dios nga profesiya ta Mesias yaw nga detalye ta awan noka tu makattu nga tulanna sonu matay yaya ta estaka.—Salmo 34:20; Juan 19:31-33, 36.

Anni i magigiammu tam ta kinagi ni Jesus? Makapattalo ittam gapa nga matuppal i ngamin nga promesa ni Jehova nga Dios, adde ta ultimo nga detalye. Anni sikanna nga pamasiguradu ta kabadditan nga letra na Hebreo!