ARU anna nadduruma i pagimamma meyannung ta inango anna patay. Kagian na karuan nga kabalin na patay, mattolay lagapa ira ta tanakuan nga forma onu lugar. Segun ta tanakuan, meyana ira uli tapenu mattolay mana. Ngem ta karuan, i patay i ultimo na ngamin.

Awayyana tu egga sarilim nga pangurug taw nga topiko, depende ta zinakallammu onu kulturam. Megafu ta nadduruma i opinion nu anni i mesimmu ta patay, egga kari i mapattalakkan anna kurug nga tabbag taw nga mariga nga pakkiavu?

Ta aru nga siglo, ituttuddu na lider ira na relihion i doktrina na imortalidad na kararua na tolay. Mangurug i miembro ira na maggi ngamin nga darakal nga relihion—Cristiano, Hindu, Judio, Muslim, anna tanakuan paga—nga imortal i kararua, nga sigga-matolay lagapa nu matay i baggi anna umay ta mundo na espiritu. Mangurug gapa i Budista ira nga gukaban na mamikkaru nga keyana uli, madde na fuersa, onu mental nga enerhia, ta unag na tolay mismu i perfekto nga pagayaya nga magalan tu Nirvana.

Megafu ta kunnatun ira nga tuttuddu, aru ta totolay ta interu mundo i mangurug nga i patay i dalan tapenu makangay ta tanakuan nga mundo. Yari tu para ta aru, importante nga parte na siklo na pattolay i patay, anna yatun ay gittana parte na uray na Dios. Ngem anni i kagian na Biblia tatun? Bibbigan i tumunug nga artikulo. Baka masorpresa ka ta tabbag.