Tadday nga fugag na Liggu, nabbisita si Kenneth anni Filomena nga taga-Curaçao ta magatawa nga Bible study-da.

“Ta paddattalmi,” kunni Kenneth, “agga-serra i balay anna awan i takeda. Ngem gittana egga namaguyu niakan nga tawagan i telefono na atawa nga babay.”

Sinabbag na babay i tawag anna kinagina nga egga ta trabahu i atawana. Ngem turi nammuanna nga egga da Kenneth anni Filomena, vinukatanna i puerta anna pinatallung ira.

Insigida nga nahalatada nga siminangi yaya. Turi ta pinegafuanan ni Kenneth i Bible study gukaban na pakimallo, tumangi mana i babay. Yari tu masippo nga niyavu ni Kenneth anni Filomena nu anni problemana.

Kinagi na babay nga pinlanona nga mappakamatay tatun nga fugag, anna mattutura yaya tu suicide letter ta atawana turi nattawag si Kenneth. Kinagina nira nga egga depresionna, yari tu nangikagi ira sa tu makapabannay nga mensahe ta Biblia. Yatun nga pamagaram i nangipaliag sa.

“Nappabalo kami kani Jehova ta inusana kami tapenu uffunan yaw nga problemadu nga babay,” kunni Kenneth, “anna mas ngana ta pinaguyuna kami​—posible nga gukaban na anghel onu na masanto nga espirituna—​tapenu mattawag!” *

Fustu kari si Kenneth anni Filomena ta pakkagida nga nagguyu i Dios, posible nga gukaban na anghel onu na masanto nga espirituna, onu aktibo nga fuersa? Onu nekanna laman i pattawag ni Kenneth?

Ariattam masiguradu yatun. Ngem i ammu tam, usu-usan na Dios i anghelna ira tapenu uffunan ta espiritual i totolay. Angngariganna, kagian na Biblia nga inusa na Dios i anghel tapenu igiya i Cristiano nga evanghelisador nga si Felipe nga uffunan i Etiope nga ofisial nga magala-aleg tu pangigiya ta espiritual.​—Kingngua 8:26-31.

Ituttuddu na nadduruma nga relihion i pangurug ta makapangngua nga espiritu ira nga pinaratu, nga i karuan ay kagiadda nga masippo nga pinaratu nga mangngua ta uray na Dios onu masserbi bilang anghel de la guardia. Aru i mangurug ta kegga na anghel ira anna egga kanu importante nga efekto nira danatun nga espiritu. Ngem aru gapa i ari vuluvuga mangurug ta kegga na anghel ira.

Kurug kari i anghel ira? Nu wan, naggafuadda? Anni i kinakurug meyannung ta anghel ira? Mafektadda kari i pattolem? Innattam i ebidensia.