Wan, egga marake ira nga anghel. Naggafuadda? Daddamman nga pinaratu na Dios i anghel ira nga egga lallagureda. Ari nabayag kabalin nga naparatu i ollu nga lalaki anna babay, da Adan anni Eva, inabuso na tadday nga perfekto nga espiritu nga pinaratu i lallagurena anna niyorolluna i rebelyon ta davvun. Navviktoria yaya ta pangisipo kani Adan anni Eva ta parrebelde ta Dios. (Genesis 3:1-7; Nepakannammu 12:9) Ari nakagi ta Biblia i ngagan onu ranggo ta langi naw nga espiritu nga pinaratu nigena narrebelde. Ngem kabalinna narrebelde, mepangngo nga nagalan yaya ta Biblia nga Satanas, kebalinanna nga “Kumokkontra,” anna Diablo, kebalinanna nga “Mamaraparake.”​—Mateo 4:8-11.

Kaddaddam, ari nagimmang tatun i parrebelde ta Dios. Ta tiempo ni Noe, egga ira anghel nga “pinanawad-da i gagangay nga lugar da” ta nelangitan nga familia na Dios. Minulug ira ta davvun anna nabbaggi tu tolay tapenu mangngua tu marake anna imoral, nga ari mekunnay ta gakkag na nikaparatuda.​—Judas 6; Genesis 6:1-4; 1 Pedro 3:19, 20, NW.

Anni nesimmu tatun ira nga marake nga anghel? Turi ta nangirattal i Dios tu delubio ta interu mundo tapenu pakarenuan i davvun, pinanawadda i baggida bilang tolay anna nattoli ira ta langi. Ngem ari pinamavulunan na Dios i marake ira nga anghel nga manoli ta “natullo” nga posisiodda. Nifukuna lallagu ira ta espiritual nga “karibbattan,” nga magalan tu Tartaro. (Judas 6; 2 Pedro 2:4, NW) Nappakontrol danaw nga demonio kani Satanas nga Diablo, i “prinsipe na demonio ira,” nga “awayya na nga pabbalinan i baggi na tu kagitta na anghel na nawag!”​—Mateo 12:24; 2 Corinto 11:14.

Ituttuddu na Biblia nga nepataddag i Mesianiko nga Pappatulan na Dios, tadday nga nelangitan nga gobiernu, turi 1914. * Tumunug tatun nga makapabbaw nga nesimmu i pamatavvar ta langi kani Satanas tuange ta demoniona ira anna pangitabbo nira ta utun na davvun. I napakaru nga kinarake anna grabe nga imoralidad ta davvun ay ebidensia na minangngibalo anna makadaral nga influwensiada.​—Nepakannammu 12:9-12.

Ngem pakurugan na umara-aru nga imoralidad anna grabe nga kinavayolente nga aranni ngana i pattuppalan na marake nga pammagureda. Ari mabbayag, mapawan danaw nga minangngabuso nga espiritu ira nga pinaratu. Kabalin na 1,000 dagun nga pammaguray na Pappatulan na Dios ta paraiso nga davvun, egga ababba anna ultimo nga tiansa danaw nga marake nga espiritu nga tentan i totolay. Tapus, permanente ngana ira nga madaral.​—Mateo 25:41; Nepakannammu 20:1-3, 7-10.