Ipasingan na Biblia nga egga ira tiempo nga pinrotektan na anghel ira i kurug ira nga maddayarayaw tapenu matuppal i uray na Dios. (Salmo 34:7) Angngariganna:

• Turi ta zinaral ni Jehova i marake ira nga siudad na Sodoma anna Gomora, inuffunan na anghel ira i matunung nga si Lot anna familiana tapenu makapanaw.​—Genesis 19:1, 15-26.

• Turi ta nasentensian nga matay ta umafa-afi nga fugong i tallu nga kabataan nga Hebreo ta Babilonia gari, i Dios ay “naddog ta anghelna anna nangurag ta aripanna ira.”​—Daniel 3:19-28.

• Turi ta tanga-gabi nga naddian ta kueba na maporay ira nga leon i matunung nga si Daniel, kinagina nga napaliag yaya megafu ta ‘zinog na Dios i anghelna anna sinerran i simu na leon ira.’​—Daniel 6:16, 22.

Egga ira tiempo nga nanguffun i mensahero ira nga anghel na Dios nu kawagan ta aktibidad na ollu nga kongregasion Cristiano tapenu matuppal i gakkag ni Jehova. Angngariganna:

• Vinukatan na anghel i puerta ira na affukutan anna kinagianan i nefuku ira nga apostol nga ituloy i pallayyagayya ta templo.​—Kingngua 5:17-21.

• Nibilin na anghel ta evanghelisador nga si Felipe nga umay ta disierto nga dalan nga maggafu ta Jerusalem nga mappange ta Gaza anna layyagayyan i tadday nga Etiope nga naggafu naddayaw ta Jerusalem.​—Kingngua 8:26-33.

• Turi ta tiempo nga nitulu na Dios nga mabbalin tu Cristiano i ari Judio ira, nappasingan i anghel ta Romano nga ofisial na suddalu ira nga si Cornelio gukaban na sirmata anna nibilinna sa nga ipagal si apostol Pedro ta balena.​—Kingngua 10:3-5.

• Turi ta nefuku si apostol Pedro, nappasingan i anghel sa anna nilawanna yaya ta affukutan.​—Kingngua 12:1-11.

Awan tu ebidensia nga usu-usan na Dios ta maddaggun i anghel ira tapenu milagro nga uffunan i totolay nga kagitta na nakagi ta Biblia. Ngem meyannung ta tiempo tam, kinagi ni Jesus:  “Melayya-gayya noka ta tanga-ravvunan yaw nga Mapia nga Dumug na Pammaguray na Dios tapenu kannammuan na ngamin nga sinolay. Ta kabalin naw, duttal ngana i panuppalan.” (Mateo 24:14) Ammum kari nga kukukuan na disipulos ni Cristo yaw nga trabahu ta pangirollu na anghel ira?

Mabibbig ta libru na Nepakannammu nga malallappo nga ufu-uffunan na anghel ira i totolay ta interu mundo tapenu mammuan i meyannung kani Jehova nga Dios anna i gakkagna para ta totolay. Nitura ni apostol Juan: “Nasingak-ku i tadday mangana nga anghel nga kumaga-kagag ta tangnga ta utun. Egga sa i mannanayun nga evanghelio nga ilammuyag na ta ngamin nga totolay ta utun na davvun: totolay na madduma-ruma i rasa, tribu, paguvovug, anna nasion. Nikukkulle na nga kinagi, ‘Maganassing kamu ta Dios anna iyawa nu sa i pammakakua! Ta zimittal ngana i oras na pamanunnu na ta sinolay. Daya-rayawan nu yaya nga namaro ta langi, davvun, bebay, tuange ta ngamin nga paggafuan na dana-danum!’” (Nepakannammu 14:6, 7) Ipasingan na aru nga moderno nga ekspiriensa nga sussuportan na anghel ira i interu mundo nga pallayyagayya. Kakuruganna, nu egga maski tadday nga minakkaliwa nga mabbabawi anna manoli kani Jehova, ‘magayaya i anghel ira na Dios.’​—Lucas 15:10.

Anni mesimmu sonu nabalin ngana i pallayyagayya? Suportan na anghel nga “suddalu ira ta langi” si Jesu-Cristo, i Patul na ngamin nga patul, ta pakiggerra ta “dakal nga Aggaw na Dios nga Makapangngua sa Ngamin” ta Armagedon. (Nepakannammu 16:14-16; 19:14-16) I makapangngua ira nga anghel i mangituppal ta sentensia na Dios sonu si Jesus ay ‘mangastigo turi ta ari nga magginna ta Mapia nga Dumug nga meyannung ta Yafu tam nga Jesus.’​—2 Tesalonica 1:7, 8.

Yari tu makasiguradu ka nga personal nga interesadu nikaw i anghel ira. Kuruga ikavurungadda i pammakapianan danuri makkaraga nga masserbi ta Dios, anna kanayun ira usu-usan ni Jehova tapenu pasikannan anna protektan i matalo ira nga aripanna ta davvun.​—Hebreo 1:14.

Egga gafu i importante nga pappili nga kuan na kada tadday nittam. Magginna anna mattuppal ittam kari ta makasta nga balita nga melayyagayya ta interu mundo? Magayaya i Saksi ira ni Jehova ta lugarnu nga moffunakka tapenu mabenefisiowan ta meddu nga panguffun na makapangngua ira nga anghel na Dios.▪