Neyana ngà ta tadday nga ili ta Saxony, ta dati nga German Democratic Republic (GDR). Masaya anna meddu i familià, anna sinudduannà na magana ku tu makasta ira nga prinsipio ta pattolay. Komunista nga estado i GDR, yari tu ari importante i relihion ta aru nga totolay ta Saxony. Para niakan, awan tu Dios. Dua nga ideyolohia i nanginfluwensia ta ollu nga 18 dagun na pattolè: ateismo anna Komunismo.

Ngatta nakayatakku i Komunismo? Kayà ku gare i ideya nga pantay-pantay i ngamin. Mangurug ngà paga nga mawag tu patas i pabbirillay ta ngamin nga pakkukua tapenu awan ngana tu sobra rikuna anna sobra zigana. Yari tu okupadu ngà ta organisasion na kabataan ira nga Komunista. Turi 14 ngà, aru i nosà nga tiempo ta environmental project nga par-recycle tu papel. Dakal i pappabalo na ili na Aue ta pappursigì yari tu niddaddà tu award. Maski nu abbing ngà paga, nakilalà i karuan ta sikat nga pulitiko ta GDR. Para niakan, fustu ira i goal ku anna makasta i mappange ku.

Gavva nga nanguli i situasion. Nadabba i Berlin Wall turi 1989 kunne na gapa i grupo na Komunista ta Eastern Europe. Natturunug i kakkadda-kaddag nga nesimmu. Nadiskubrè nga gagangay laman i kawan na hustisia ta GDR. Angngariganna, alinno i paningadda ta ari ira nassuporta ta Komunismo. Ngatta egga kunna? Ari kari nga pantay-pantay i ngamin nga totolay segun ta pangurugmi nga Komunista? Ilusion laman kari i Komunismo? Grabe vuru-vurukku.

Inulì i prayoridad ku ira anna naffokus ngà ta musika anna painting. Megafu ta naggigiammu ngà ta music school​—tapenu metuloy ku ta unibersidad—​kayà ku mabbalin tu musikeru anna pintor. Kinattamakku ngana i makasta ira nga prinsipio ta pattolay nga nagigiammù ta kabbikku. Mas importante ngana i pappaga-pagayaya, gitta na paki-date ta nadduruma nga babay. Ngem ari nalsa na musika, painting, anna awan tu prinsipiona nga pattolay i vuru-vurukku. Masingan lagapa ta painting ku ira i sobra nga assikku. Anni tamma mesimmu ta mappange? Anna anni i gakkag na pattolay?

Turi nammuakku i tabbag ira nga alalegakku, nasorpresa ngà. Tadday nga gabi ta eskuela, nevulu ngà ta grupo na estudiante  ira nga mabbirida meyannung ta mappange. Tadday si Mandy * ta estudiante anna Saksi ni Jehova yaya. Tatun nga gabi, makasta tabaranna niakan. Kinagina: “Andreas, nu kayà mu i tabbag ta pakkiavu mu ira meyannung ta pattolay anna ta mappange, gigiammuammu i Biblia.”

Naddesision ngà nga alegan ta Biblia i tabbag ira maski nu ari ngà talaga kumbinsidu. Nipabibbig niakan ni Mandy i Daniel kapitulo 2, anna nakaddag ngà ta nabibbig ku. Neyilustra taw nga profesiya i matturunug nga makapangngua ira nga nasion ta mundo, gobiernu ira nga dakal i influwensiada adde ta kaggawattam. Nipasingan paga niakan ni Mandy i karuan nga profesiya ta Biblia meyannung ta mappange. Naleg ku gabbalaman i tabbag ira ta pakkiavu ku! Ngem sinni i nattura tatun ira nga profesiya, anna sinni i makekagi ta eksakto nga mesimmu ta mappange? Baka gapa kurug nga egga Dios.

Niyammammunà ni Mandy kani Horst anni Angelika, magatawa nga Saksi nga nanguffun niakan nga mas malippawa i Uvovug na Dios. Insigidà nasingan nga i Saksi ira ni Jehova laman i relihion nga mangusu-usa anna mangituddu ta personal nga ngagan na Dios, si Jehova. (Salmo 83:18, NW; Mateo 6:9) Nammuakku nga nangiyawa si Jehova nga Dios tu iddanama nga makapattolay tu mannanayun ta paraiso nga davvun. Kagian na Salmo 37:9: “I mammakatalo ira ta YAFU ay davvun i irensiad-da.” Nagustuakku yaw megafu ta vuka yaw ta ngamin nga makkaraga nga mattolay segun ta estandarte na Dios nga egga ta Biblia.

Ngem narigatan ngà nga ulian i pattolè segun ta estandarte na Biblia. Minappakatannang ngà megafu ta malalaki ngà ta musika anna painting, yari tu ginigiammù labbi i mappakalinno. Ari tu mabi niakan nga panawan i mababa ta moral nga istilo na pattolay. Dakal i appabalo ku ta pasensia, allo, anna pangalippawa ni Jehova turi ira ta mappuppursigi nga iyaplika i ituttuddu na Biblia!

Komunismo anna ateismo i naka-influwensia niakan ta ollu nga 18 dagun na pattolè. Kabalin natun, Biblia ngana i mangulu-uli ta pattolè. Napawan na nagigiammù i vuru-vurukku meyannung ta mappange anna napeggan tu gakkag i pattolè. Nabawtisowan ngà turi 1993 bilang Saksi ni Jehova, tapus turi 2000, nagatawa kami ni Tabitha, tadday nga matalikarag nga Saksi. Kuammi i adde na mawayyami nga manguffun ta tanakuan nga malippawa i Biblia. Kaparehù gapa nga na-influwensian na Komunismo anna ateismo i aru ta nakilalami. Talaga magayaya ngà nu ipasingakku nira nu kunnasi mammammu si Jehova.

Naganassing i magana ku turi ta namegafu ngà makikavulu ta Saksi ira ni Jehova. Turi kua, nasingadda gabbalaman i makasta nga efekto niakan na pakikavulu ku ta Saksi ira. Magayaya ngà ta mabbibbibbig ngana ira tu Biblia anna magatende ta study na Saksi ira ni Jehova.

Makasta i pagatawami ni Tabitha ta tuttuttulammi i tabarang ira ta Biblia para ta magatawa. Angngariganna, matuyag i pagatawami megafu ta panuttul ta tabarang meyannung ta kinamatalo ta atawa.​—Hebreo 13:4.

Ari ngà ngana maganassing anna mavurung ta mappange. Matageno ku nga parte ngà na interu mundo nga familia​—memammo anna mattaradday. Pantay-pantay i tratumi ta kataggi-tadday. Yatun i karagatakku anna i kakayà ku nga metuppal tagga paga.