MAKKIAVU I MABBIBBIG IRA . . .
Para Kari ta Cristiano ira i Krismas?
Kurugan na minillion nga totolay ta interu mundo nga i tradision na Krismas ay selebrasion na aggaw na nikeyana, onu birthday, ni Jesu-Cristo. Ngem nanono mu ngana kari nu nasselebra tu Krismas i ollu-siglo ira nga Cristiano, danuri madukko ira kani Jesus? Anna ammum kari i kagian na Biblia meyannung ta birthday? Makoffun i tabbag taw ira nga pakkiavu tapenu mammuan nu para ta Cristiano ira i Krismas.
Ollu, awan tu nakagi ta Biblia nga neselebra i birthday ni Jesus onu i maski sinni nga matalo nga maddayarayaw ta Dios. Dua laman i nakagi ta Katurakan nga nasselebra tu birthday-da. Awan nira i maddayarayaw kani Jehova, i Dios ta Biblia, anna egga marake nga nesimmu durante ta selebrasion na birthday-da. (Genesis 40:20; Marcos 6:21) Segun ta Encyclopædia Britannica, kinontra na ollu ira nga Cristiano i “pagano nga kostumbre na passelebra tu birthday.”
Anni i petsa na nikeyana ni Jesus?
Awan tu nakagi ta Biblia nu kanni eksakto nga neyana si Jesus. “I aggaw na nikeyana ni Cristo ay ari mannammuan ta B[agu] nga P[akkasinabban] onu, kakuruganna, ta maski anni nga referensia,” segun ta Cyclopedia ni McClintock anna Strong. Nu kayà gafu ni Jesus nga iselebra na tagatuttulna ira i birthday-na, siniguraduna nakuan nga ammuda i petsa na nikeyanana.
Mekadua, awan tu nerekord ta Biblia nga nasselebra tu Krismas si Jesus onu i maski tadday ta disipulosna. Segun ta New Catholic Encyclopedia, i passelebra tu Krismas ay ollu nga nakagi “ta Chronograph ni Philocalus, tadday nga Romano nga almanac nga i referensiana ay napadday turi 336 [C.E.].” Manawag nga yatun ay ta kabalin nga makumpleto i Biblia anna piga siglo kabalin nga nattolay si Jesus ta davvun. Yari tu nakagi ni McClintock anna Strong nga “i passelebra tu Krismas ay ari nga nibilin na Dios, onu naggafu ta B[agu] nga P[akkasinabban].” *
Anni nga okasion i nibilin ni Jesus nga iselebra na disipulosna ira?
Bilang Mapia nga Mestru, nangiyawa si Jesus tu manawag ira nga instruksion meyannung ta ikayana nga kuan na tagatuttulna ira, anna nerekord danaw ta Biblia. Ngem ari tu kasali taw i passelebra tu Krismas. Nu kunnasi nga manaki na mestru nga sossobran na estudiantena ira i instruksion nga niyawana nira, manaki gapa ni Jesus nga i tagatuttulna ira ay ‘sobradda i gannug ira nga netura’ ta Masanto nga Katurakan.—1 Corinto 4:6, NW.
Ngem egga tadday nga importante nga okasion nga kuruga familiar i ollu ira nga Cristiano—i passelebra, onu Memorial, na patay ni Jesus. Kinagi mismu ni Jesus ta disipulosna ira nu kannida iselebra yaw nga okasion anna nipasinganna nira nu kunnasi kuan yaw. Nerekord ta Biblia danaw nga espesipiko nga instruksion, kunne na gapa i mismu nga petsa na patena.—Lucas 22:19; 1 Corinto 11:25.
Gittana nammuattam, passelebra tu birthday i Krismas, anna ari sinuttul na ollu ira nga Cristiano yatun nga pagano nga kostumbre. Fuera paga tatun, awan tu nakagi ta Biblia nga nasselebra tu Krismas si Jesus onu i maski sinni. Segun taw ira nga kinakurug, minillion nga Cristiano ta interu mundo i mangurug nga i Krismas ay ari tu para nira.
^ par. 6 Para ta mas aru nga informasion meyannung ta naggafuan na aru nga tradision ta Krismas, innan i artikulo nga “Tanong ng mga Mambabasa . . . Ano ang Katotohanan Tungkol sa Pasko?” ta Ang Bantayan, Disiembre 1, 2014, available online ta www.pr418.com/tl.
Baka Kaya Mu Gapa i
GAGANGAY IRA NGA PAKKIAVU
Ngatta Ari Masselebra tu Krismas i Saksi ira ni Jehova?
Aru lagapa i masselebra tu Krismas maski nu ammuda ngana lagu i naggafuan natun. Ammuan nu ngatta ari yatun iselebra na Saksi ira ni Jehova.
GAGANGAY IRA NGA PAKKIAVU
Ngatta Ari Masselebra tu Birthday i Saksi ira ni Jehova?
Innan i appa nga detalye meyannung ta birthday nga mangipasingan nu ngatta manaki na Dios yaw.
MEMORIAL
Daddamman i Patay ni Jesus
Membita ka nga makipaggarammammung nikami taw nga importante nga okasion. Mammuammu nu kunnasi ka nga mabenefisiowan ta pattolay anna patay ni Jesus.
