Ari nga mabi i pagaleg tu mekonsidera nga mepangngo nga regalu para ta tadday nga tolay. I makalawà laman i makekagi ta balor na regalu. Awayyana nga i pinakamakasta para ta tadday ay ari nga i pinakamakasta para ta tanakuan.

Angngariganna, para ta tinedyer, posible nga i pinakabagu nga elektroniko nga gadget i kapianan nga meregalu sa. Ngem ta tadday nga adulto, baka mas kayàna i makalawà tu regalu nga egga sentimental value-na, gittana gannug nga namana paga ta lolo onu lola. Ta karuan nga kultura, parehu nga kuartu i mas piliadda nga iregalu ta mabbing anna adulto, tapenu magatadda nu anni ikayada.

Maski nu mariga, aru nga minangngikavurung nga tolay i magala-aleg lagapa tu kakastan nga regalu para ta espesial nga tolay nira. Ari tu kanayun nga posible i pagaleg ta kunnatun nga regalu, ngem awayya tam makaleg nu sigga-nono ittam ta makoffun ira nga gannug. Ikonsidera tam i appa nga makoffun tapenu mapagayaya i makalawà tu regalu.

I kakayà na meddan tu regalu. Kinagi na tadday nga lalaki nga taga-Belfast, Northern Ireland nga i bisikleta nga pangkarera nga nalawàna turi 10 onu 11 dagunna i pinakamakasta nga neregalu sa. Ngatta? “Megafu ta kakayà ku talaga yaw,” kunna. Ipasingan na kinagina nga appresian na tadday i regalu nu kakayàna yatun. Nonopammu gafu i kakayà na tolay nga regaluammu. Ammuan nu anni i tagibaloranna, megafu ta dakal i influwensia natun ta kakayàna. Angngariganna, maruddu nga tagibaloran na lolo anna lola i tiempo kavulu i familia. Kakayàda nga masingan kanayun i ána anna áfuda nu posible. Awayyana nga mas maappresiada i bakasion na familia kavulu ira anne ta maski anni nga regalu nira.

I pagginna tu mapia i sekreto tapenu mammuan i kakayà na tadday. Ipagaram na Biblia nittam: “Mawag tu sigga-parak-kamu nga magginna, memmugug ta paguvovug.” (Santiago 1:19) Ta kadaggaw nga pakiyuvovug mu ta kokkofun onu parientes mu, magginna ka tu mapia tapenu mammuan i kayà anna manakida. Nu kunnatun, mammuammu i regalu nga magustuadda.

I kawagan na meddan tu regalu. Tagibaloran na meddan tu regalu maski i pinakasimple nga regalu  nu sakto yatun ta kawaganna. Ngem kunnasim mammuan i kawagan na tadday?

Awayyana nga i pinakamabi ay iyavu ta tolay nu anni i kawaganna​—onu, nu anni i kayàna. Ngem para ta aru nga minarregalu, mapakarianan naw i pagayaya na pangiyawa, ta mas kayàda nga masorpresa i iddadda tu regalu. Fuera paga tatun, maski nu ikakkagi gapa na karuan i kayà onu manakida, maruddu nga ariadda kagian i kawagadda ira.

Yari tu magobserba anna ammuan i situasion na tadday. Mabbing kari yaya, manakam, single, natawan, gungay ta atawa, balu, egga trabahuna, onu retiradu? Pannonopan gafu nu anni ira nga regalu i makeyawa ta kawagan na tadday.

Tapenu mammuan i kawagan ira na regaluammu, makkiavu ta tanakuan nga neparubang gapa ta parehu nga situasion. Awayyada makagi nikaw i kawagan ira nga ari ammu na tanakuan. Nu kunnatun, meyawa mu i regalu nga kawagan nga ari manono na tanakuan.

Tiempo na pangiyawa. Kagian na Biblia: “I uvovug nga nekagi ta mepangngo nga tiempo​—anni mabba kastana yatun!” (Proverbio 15:23) Ipasingan naw nga teksto nga dakal i makua na tiempo na paguvovug tam. Kunnatun gapa ta kukukuattam. Nu kunnasi nga makapagayaya ta magginna i uvovug nga nekagi ta mepangngo nga tiempo, makapagayaya gapa ta tadday i regalu nga neyawa sa ta fustu nga tiempo onu ta mepangngo nga okasion.

Mekasal i tadday nga kofun. Maggradua ta eskuela i tadday nga kabataan. Aranni ngana makka-baby i tadday nga magatawa. Yaw i karuan nga situasion nga puede marregalu. Para ta karuan, makasta i pangilista ta kunnatun ira nga espesial nga okasion nga mesimmu ta dagun. Nu kunna, meplanoda i regalu nga pinakamakasta para ta kada okasion. *

Siempre, ari laman tu ta espesial ira nga okasion ka makaparregalu. Maekspiriensa i pagayaya na pangiyawa maski anni nga tiempo. Ngem mawag i pagimmugug. Angngariganna, nu regaluan na tadday nga lalaki i tadday nga babay nga ari tu manawag i rason ta parregaluna, posible nga nonopan na babay nga egga romantiko nga interesna sa. Ngem nu ari tu yatun i fustu nga intension na lalaki, posible nga marresulta yatun ta ari pakkarantindian. Yari tu mawag nga ikonsidera i tadday paga nga importante nga gannug​—i motibo na marregalu.

I motibo na marregalu. Gittana ipasingan na nakagi nga angngarigan, makasta nga ikonsidera nu mamis-interpret na maregaluan i motibo na marregalu. Makasta gapa nga ammuan na marregalu i mismu nga motibona. Maski nu nonopan na aru nga marregalu nga makasta gapa i motiboda ta parregalu, aru ta marregalu ta espesipiko nga okasion ta dagun i mapilitan laman nga kuan yatun. Ekspektan gapa na karuan nga meddan ira tu espesial nga pattratu onu egga katalina nu marregalu ira.

Anni i kuammu tapenu masiguradum nga makasta i motibom ta parregalu? Kagian na Biblia: “Kuan nu nga sigga-aya ngamin i ikalangan nu.” (1 Corinto 16:14) Nu nebase ta kurug nga aya anna pangikavurung ta regaluammu i motibom ta pangiyawa, dakal i posibilidad nga magayaya i mangalawà ta regalum anna maekspiriensam i mas dakal nga pagayaya ta pangiyawa. Mapagayaya mu paga i nelangitan nga Yama tam nu napafutuan i pangiyawa mu. Kinomendan ni apostol Pablo i Cristiano ira gari ta Corinto ta magayaya nga panguffudda ta kapangngurugda ta Judea. “Ayatan na Dios i sigga-pagayaya nga mangiyawa,” kunni Pablo nira.​—2 Corinto 9:7.

Makoffun i gannug ira nga nekonsidera tam tapenu makapagayaya i parregalum ta tanakuan. Dakal i papel danaw nga gannug anna i karuan paga ta unnug na Dios para ta totolay tapenu malawà i kadakallan nga regalu ta ngamin. Bibbigammu i tumunug nga artikulo tapenu mammuammu yaw nga makapabbaw nga regalu.