“Naggafu ta langi ngamin i mapia anna awan tu pakkurangan na nga regalu. Wan, naggafu ta Yama nga namaro ta ngamin nga manawag nga egga ta langi.” (Santiago 1:17) Tukuyan natun nga teksto i kinavuka-palag na nelangitan nga Yama tam, si Jehova nga Dios. Ngem ta napakaru nga regalu na Dios ta totolay, egga i tadday nga kadakallan ta ngamin. Anni yatun? Kunnaw i popular nga kinagi ni Jesus nga nerekord ta Juan 3:16: “Kuruga iddukan na Dios i mundo. Yatun tu zinog na i tattadday nga Ana na, tapenu ngamin i mangurug sa ay ari nga matay nu ari matolay ira adde ta ngangangay.”

I tattadday nga Ana na Dios i kurug nga kadakallan nga regalu nga awayya tam malawà, ta gukaban natun ay mapalubbangan ittam ta pakka-aripan ta liwa, pallakay onu pabbako, anna patay. (Salmo 51:5; Juan 8:34) Maski anni kuattam, ariattam mawayya nga mapalubbangan i baggi tam tatun nga pakka-aripan. Ngem megafu ta dakal nga aya na Dios, niyawana i kawagan tapenu mapalubbangan ittam. Ta pangiyawana bilang tavvu ta tattadday nga Anana, si Jesu-Cristo, niddan ni Jehova nga Dios i minattuppal nga totolay tu iddanama nga mattolay tu mannanayun. Ngem anni kari i tavvu? Ngatta kawagan yatun? Anna kunnasi ittam mabenefisiowan tatun?

I tavvu ay i balor nga mapagan tapenu masaka onu matubus i tadday nga gannug onu tapenu mapalubbangan ta pakka-aripan. Iyesplika na Biblia nga naparatu i ollu nga magana tam, da Adan anni Eva, nga awan tu liwada, anna mattolay ira tu mannanayun ta paraiso nga davvun kavulu i gaka-gaka nga maggafu nira. (Genesis 1:26-28) Kaddaddam, nawawadda ngamin danatun megafu ta pinilida nga ari mattuppal ta Dios​—yari tu nabbalin ira nga minakkaliwa. Anni resultana? Kagian na Biblia: “Megafu ta tadday nga tolay, egga ta utun na davvun i pattagaruli, ay i katagarulian na i nangirattal ta patay. Ay nawwara i patay ta ngamin nga totolay megafu ta nattagaruli ngamin i totolay.” (Roma 5:12) Imbes nga perfekto nga inango nakuan i mepasa ni Adan ta gaka-gakana, nepasana i tagaruli onu liwa anna i resulta natun nga patay.

Tapenu matavvu i tadday, mawag tu mapagan i kaparehu na nawawan. Turi ta sadya nga ari nattuppal si Adan ta Dios, nakaliwa yaya, yari tu nawawan i perfekto nga inango na tolay—inango ni Adan. Segun ta Biblia, yatun i rason nu ngatta naaripan ta liwa anna patay i gaka-gaka ni Adan. Kawagan gafu i pangiyawa ta perfekto gapa nga inango na tolay​—inango ni Jesus—​nga mesakrifisio tapenu mabbalin tu posible nga mapalubbangan ta pakka-aripan. (Roma 5:19; Efeso 1:7) Megafu ta meddu nga pinagan na Dios yaw nga tavvu, posible nga malawà na totolay i nawawan da Adan anni Eva​—mannanayun nga pattolay ta paraiso nga davvun.​—Nepakannammu 21:3-5.

Megafu ta metuppalna ira, siguradu nga i regalu na Dios nga tavvu, nga mamabbalin tu posible ta mannanayun nga inango, i kadakallan nga regalu ta ngamin. Tapenu maappresia nu ngatta “awan tu pakkurangan na nga regalu” yaw, innattam nu kunnasi nga sossobra paga nga malannappan naw i gannug ira nga makoffun tapenu mabbalin tu mabalor i regalu ira, gittana neyesplika ta nappasa nga artikulo.

Sakto ta kakayà tam. Normal laman nittam nga kakayà tam i mattolay tu mannanayun. (Eclesiastes 3:11) Ariattam meyawa yatun nga pakkaraga tam, ngem nabbalin tu posible megafu ta tavvu. Kagian na Biblia: “Ta i balo na pattagaruli ay patay; ngem i ari kapaga-pagan nga regalu na  Dios ay i ngangangay nga pattolay gafu ta niketadday tam kani Cristo Jesus nga Yafu tam.”​—Roma 6:23.

Meyawana i kawagattam. Ari nga meyawa na totolay i tavvu. Nipakanawag na Biblia: “I paga na inango na tolay ay kuruga mangina. Ari vuluvuga makalanno i en-na nga pappaga.” (Salmo 49:8) Yari tu talaga mawag tam i uffun na Dios tapenu mapalubbangan ta pakka-aripan ta liwa anna patay. Ngem “gafu kani Cristo Jesus nga namalubbang nittam” gukaban na tavvu, niyawa na Dios nu anni i kawagan.​—Roma 3:23, 24.

Eksakto i tiempo na nikeyawana. Kagian na Biblia nittam: “Minattagaruli ittam pagalaman turi ta natay si Cristo para nittam!” (Roma 5:8) Neyawa yaw ta tiempo nga “minattagaruli ittam pagalaman,” ipasiguradu gafu na tavvu i konag na aya na Dios nittam maski nu minakkaliwa ittam. Anna aru paga i iddanamattam megafu taw, maski nu mawag tam attamman i resulta ira na liwa.

Makasta anna ari makasarili i motibona. Kinagi na Biblia nu ngatta niyawa na Dios i Anana bilang tavvu: “Nipasingan na Dios i pangaya na nittam ta pamaddob na ta tattadday nga Ana na toye ta utun na davvun tapenu mattolay ittam megafu sa. Ay yaw i aya: ari tu megafu ta inaya tam i Dios, nu ari yaya i nangaya nittam.”​—1 Juan 4:9, 10.

Kunnasim mepasingan i appresasiommu ta kadakallan nga regalu ta ngamin? Nonopan i kinagi ni Jesus ta Juan 3:16 nga danuri laman “mangurug” sa i mapaliag. Segun ta Biblia, i pangurug ay “i pammakatalo ta gannug ira nga iddanamat-tam.” (Hebreo 11:1) Importante i fustu nga pakannammu tapenu mapeggan tu kunnatun nga pammakatalo. Yari tu ipagarammi nga ammuammu si Jehova nga Dios, i Nangiyawa taw nga “awan tu pakkurangan na nga regalu,” anna ammuammu nu anni i kuammu tapenu malawà i mannanayun nga inango nga nabbalin tu posible para nikaw megafu ta sakrifisio nga tavvu ni Jesus.

Mammuammu ngamin danaw nu gigiammuammu i nebase-Biblia nga informasion nga available online ta www.pr418.com/ibg. Magayaya i Saksi ira ni Jehova nga uffunakka. Durante nga gigiammuammu anna mabenefisiowakka taw nga kadakallan nga regalu, siguradu kami nga makagim gapa: “Mabbala-balo ngà ta Dios, ta paliaran nà gafu kani Jesu-Cristo nga Yafu tam!”​—Roma 7:25.