TURI Marso 26, 1937, dua nga lalaki i nababbannag nga nangimaneho tu ginavu nga takay ta Sydney, Australia. Tanga-ragun ngana i nappasa turi ta pinanawadda yaw nga siudad anna nakapabbiahe ngana ira ta maturu nga 19,300 km ta unu-unag anna tuppu-tuppag nga lugar natun nga kontinente. Ari tu minaddiskubre onu minappasiar yaw nga lallaki. Si Arthur Willis anni Bill Newlands, ay dua laman ta malappo nga papayunir nga determinadu nga mangilayyagayya ta mapia nga dumug na Pappatulan na Dios ta alawa nga disierto na Australia.

Adde ta ultimo na dekada 1920, nallayyagayya i baddi nga grupo na Estudiante ira na Biblia * ta Australia ta pallevu na ili anna siudad ira nga aranni ta bebay. Ta sentrona yaw nga nasion, maddian i totolay ta aggarayyu anna balabaddi i populasionna nga ili-ili. Mamaga-maga yatun anna maturu nga gaddua na kadakal na United States. Maski paga kunnatun, siguradu yaw nga wawwaragi nga mamakurug i tagatuttul ira ni Jesus meyannung sa “ta ngamin nga tuppu-tuppag na davvun,” kasali ngana i ararayyu nga disierto na Australia. (King. 1:8) Ngem kunnasida nga metuppal yatun nga dakal nga annungan? Gukaban na nalannalanno nga pattaloda nga bendisionan ni Jehova i appursigida, determinadu ira nga kuan i mawayyada.

Turi 1929, namadday i kongregasion ira na Queensland anna Western Australia tu aru nga de-motor nga takay tapenu egga meyusada ta pabbiahe. Imaneho yatun ira nga takay na masisikan nga payunir nga makeyattam ta mariga ira nga situasion anna makawayya nga mammekaniko nu madaral i takeda. Aru taw nga papayunir i mabbisita ta aru nga lugar nga ari paga nalayyagayyan.

Mangusa i papayunir nga awan tu takeda tu bisikleta nga mappange ta disierto. Angngariganna, turi 1932, lima-vulan nga nabbisikleta si Bennett Brickell nga magedad tu 23 mamegafu ta Rockhampton, Queensland, nga minay mallayyagayya ta pinaka-sigiran natun nga estado. Aru i madammo nga nikargana ta bisikleta, nelavu ngana i ulò, sinnun, makan, anna aru nga libru. Turi ta nadaral i goma na bisikletana, nattulu-tuloy lagapa yaya anna nattaló nga igiya ni Jehova. Nitubbana i bisikleta tu distansia nga 320 km mappange ta lugar ira nga egga  ngana dati i natay megafu ta pangalda. Ta nappasa nga 30 nga dagun, ginatu nga rivu nga kilometro i nabiahe ni Brother Brickell ta interu nga Australia gukaban na bisikleta, motor, anna takay. Vinukatanna i pallayyagayya ta Aborigine ira anna nanguffun nga nangipataddag tu bagu ira nga kongregasion, yatutta nabbalin yaya tu prominente anna respetadu ta ngamin nga parte na disierto.

I Australia i tadday ta pinakabaddi nga populasion ta interu mundo, anna maggararayyu i maddian tatun nga lugar. Yatutta mappursigi i totolay ni Jehova nga magaleg tu indibidual ira maski ta ararayyu nga parte na kontinente.

Nangipasingan tu kunnatun nga appursigi i papayunir nga da Stuart Keltie anna William Torrington. Turi 1933, biniaheda i Simpson Desert, alalawa nga bakulug na daga, tapenu mallayyagayya ta siudad na Alice Springs ta pinakasentro na kontinente. Turi nadaral i kotseda tapus mawag nga ibattadda yatun, nattulu-tuloy lagapa si Brother Keltie—nga kayu i artifisial nga takkina—ta pabbiahena nga mallayyagayya, ngem kamelyo ngana i nattakayanna! Navvunga i appursigi na papayunir turi nakilalada i makakkua ta hotel ta William Creek, arayyu nga istasion na tren. Ari nabbayag, inaksepta na makakkua ta hotel nga si Charles Bernhardt i kinakurug, nilakuna i hotelna, anna nappayunir nga magitetadday ta unag na 15 dagun ta karuan nga mamagamaga anna karayyuan nga parte na Australia.

Mawag i sikan na nono anna appursigi na ollu ira nga payunir tapenu maattammadda i aru nga problema nga meparubang nira. Ta paggangay da Arthur Willis anna Bill Newlands nga nakagi ta introduksion nga mallayyagayya ta disierto na Australia, dua nga liguan nga narigatan ira nga nabbiahe tu 32 km megafu ta masikisikan nga uran, nga namabbalin ta disierto tu alle-bebay nga kafuyokan. Nu karuan, megafu ta patu na bilag, maguggang ira nga mangitubba ta takeda tapenu makali ta dakal ira nga vuttul na daga, ta kabatuan nga lugu-lugar anna ta zinaga nga weg. Megafu ta kanayun nga madaral i takeda, lumakag onu aru nga aggaw nga mabbisikleta ira ta karannian nga siudad tapus piga ligguan labbi nga innaggadda i metali nga piesa. Maski kunnatun kariga i maekspiriensada, nattalupaddian lagapa ira nga positibo. Pinakoli ni Arthur Willis i nikagi na magazina nga The Golden Age: “Awan tu kuruga mariga onu arayyu nga dalan para ta saksina ira.”

Nipakanawag na nabayag ngana nga payunir nga si Charles Harris nga mas naddukko yaya kani Jehova megafu ta kesinna anna pisikal nga ziga-riga ta disierto. Kunna paga: “Gitta na pabbiahe, mas makasta i pattolay nu baddi laman i makka nga bagahe. Nu sigga-paran si Jesus nga makkatrug ta lawan nu kawagan, magayaya tam gapa nga kuan yatun nu mekiddaw ta asayment tam.” Yatun i kingngua na aru nga payunir. Megafu ta appursigida, nakadde i mapia nga dumug ta tuppu-tuppag na kontinente, noffunan i ari mabilang nga indibidual tapenu metaddaggadda i Pappatulan na Dios.