Niyavu na tadday nga brother nga nappakamatay i anana nga lalaki: ‘Dana ngana kari nga ammu na Dios nga marubammi na atawà i pappakamatay na anami? Nasingan ngana kari na Dios nga maattammammi yatun?’ Egga kari i manawag nga rason tapenu kurugan nga maniobran ni Jehova i mesimmu ira ta pattoletam ta kunnatun ira nga espesipiko nga gannug?

Nu gigiammuattam paga i nitura ni Pablo ta 1 Corinto 10:13, madde tam yaw nga konklusion: “Awan tu rason segun ta Katurakan tapenu kurugan nga dati labbi tantian ni Jehova i mawayya tam attamman tapus base tatun nga pattantia, pilianna i kapurueba nga meparubang nittam. Ikonsidera tam i appa nga rason nu ngatta yatun i konklusiottam.

Ollu, niregaluan ni Jehova i totolay tu lallaguray. Kayàna nga sittam mismu i mappili tu klase na pattoletam. (Deut. 30:19, 20; Jos. 24:15) Nu kayà tam i matunung nga pattolay, mappegiya ittam kani Jehova. (Prov. 16:9) Ngem nu mali i piliattam, arubangattam i resultana yatun. (Gal. 6:7) Nu si Jehova i mappili nu anni i duttal nga kapurueba nittam, ari kari nga gittana alsanna nittam i regalu nga lallaguray?

Mekadua, arianna ittam ilisi ni Jehova ta “tiempo anna ari-menanaman nga mesimmu.” (Ecl. 9:11) Mesimmu i kaddaraddam ira nga aksidente—awayyana nga egga ira makapataki nga resultana—megafu ta nekanna nga egga ira ta nekesimmuan na trahedia. Nikagi ni Jesus i trahedia meyannung ta 18 nga totolay nga natay turi ta nazzilan ira ta nikadabba na torre, anna kinagina nga ari tu megafu ta uray na Dios i nikapateda. (Luc. 13:1-5) Rasonable kari nga nonopan tu dati ngana nga ammuan na Dios nu sinni i matolay anna sinni i matay megafu ta aksidente?

Mekatallu, nelagum i kada tadday ta isyu na kinamatalo. Daddamman nga kinuestion ni Satanas i kinamatalo na ngamin nga masserbi kani Jehova, nga kagianna nga ariadda mattalupaddian nga matalo kani Jehova nu meparubang ira ta kapurueba. (Job 1:9-11; 2:4; Nep. 12:10) Nu fugaddan ni Jehova nga arubangattam i karuan nga ziga-riga megafu ta nonopanna nga ariattam maattamman yatun, ari kari  tu massuporta yatun ta akusasion ni Satanas nga masserbi tam ta Dios megafu laman ta personal nga interes?

Meka-appa, ari kawagan nga dati nga ammuan ni Jehova ngamin nga mesimmu nittam. I ideya nga ammu ngana na Dios nu anni i meparubang nittam nga kapurueba ay kayàna kagian nga mawag tu ammuanna ngamin i meyannung ta mappange. Ngem ari nga suportan na Katurakan yatun nga pagimamma. Siguradu nga mawayya na Dios nga mammuan i mappange. (Isa. 46:10) Ngem kagian na Biblia nga pilianna laman i ammuanna nu meyannung ta mesimmu ta mappange. (Gen. 18:20, 21; 22:12) Yatutta, balanse laman yaya ta pakapangnguana nga ammuan i mappange anna ta parrespetona ta lallaguretam. Ari kari tu yatun i ekspektattam ta Dios nga mattagibalor ta lallaguretam anna kanayun nga perfekto i pangipasinganna ta pakapangnguana?—Deut. 32:4; 2 Cor. 3:17.

Kunnasi tam gafu alippawatan yaw nga uvovug ni Pablo: “I Dios . . . arian na nga ipamavulun tu duttal nikamu i tentasion nga arian nu awayya nga affutan”? Nikagi tatun ni Pablo nu anni i kuan ni Jehova ari nga nige, nu ari, ta mismu nga tiempo na kapurueba. * Nipasiguradu na uvovug ni Pablo nga maski anni i kapurueba nga luttuag ta pattoletam, pasikannan ittam ni Jehova nu mattalo tam sa. (Sal. 55:22) Nebase ta dua nga importante nga kinakurug yatun nga makapabannay nga kinagi ni Pablo.

Ollu, “negagangay tu duttal ta tolay” i problema ira nga arubangattam. Yatutta normal laman i problema ira nga maekspiriensa tam. Ari tu massobra ta mawayya tam nga attamman yatun ira nga problema—basta mattalo ittam ta Dios. (1 Ped. 5:8, 9) Ta konteksto na 1 Corinto 10:13, tukuyan ni Pablo i kapurueba ira nga neparubang ta Israel ta katanapan. (1 Cor. 10:6-11) Awan tatun ira nga problema i ari maattamman na totolay onu lampas ta maattamman na matalo ira nga Israelita. Nami-appa nga kinagi ni Pablo nga “karuan nira” ay ari nattuppal. Kaddaraddam ta egga i karuan nga Israelita nga kingnguada i mali nga pakkaragada megafu ta ariadda nattalo kani Jehova.

Mekadua, “pammakatalakkan i Dios.” Ipasingan na pakilallang na Dios ta totolena nga iyawana i matalo nga ayana turi ira ta “mangaya sa anna manuppal ta bilinna ira.” (Deut. 7:9) Yatun nga rekord ipasinganna gapa nga kanayun nga tuppalan na Dios i promesana ira. (Jos. 23:14) Ta nappasa ira nga rekord na kinamatalona, makapattalo danuri mangaya anna mattuppal sa nga tuppalanna yaw nga dua nga promesana meyannung ta meparubang nira: (1) Arianna nga ipamavulun tu magadde i kapurueba ta imposible nga maattamman, anna (2) ‘ililli na ittam ta kataga ta tentasion.’

Kunnasi nga melilli ni Jehova danuri mattalo sa nu meparubang ta problema? Siempre, nu talaga urena, awayyana nga alsan i kapurueba. Ngem nonopan i uvovug ni Pablo: “Iddan nakamu na Dios ta sikan nu nga magattam tapenu melilli kamu ta kataga ta tentasion.” Ngem, ta aru nga situasion, “melilli” na ittam gukaban na pangiyawa tu mawag tam tapenu makapagattam ta kapurueba ira. Ikonsidera tam nu kunnasi nga kuan ni Jehova yatun:

• ‘Banna-bannayanna ittam ta ngamin nga ziga-riga.’ (2 Cor. 1:3, 4) Banna-bannayan ni Jehova i nono, futu, anna emosiottam gukaban na Biblia, masanto nga espirituna, anna espiritual nga makan nga iyawa na mekatalo nga doroban.—Mat. 24:45; Juan 14:16, Roma 15:4.

• Megiyana ittam gukaban na masanto nga espiritu. (Juan 14:26) Nu meparubang ittam ta kapurueba, uffunan ittam na masanto nga espiritu nga meraddamman i prinsipio anna rekord ira na Biblia tapenu malippawa i masirib nga desision.

• Awayyana nga usan i anghel ira para nittam.—Heb. 1:14.

• Awayyana ittam uffunan gukaban na kakkagian anna kukukuan na kapangngurug tam nga ‘manguffun’ onu mamasikan nittam.—Col. 4:11.

Anni gafu i makagi tam meyannung ta kayà kagian ni Pablo nga nakarekord ta 1 Corinto 10:13? Ari nga pilian ni Jehova i kapurueba nga meparubang nittam. Ngem nu meparubang ta kapurueba, yaw i masiguradu tam: Nu talaga buu i pattalo tam kani Jehova, arianna vuluvuga ipamavulun i kapurueba nga lampas na makaya na tolay nga attamman; kanayunna ittam nga ililli tapenu maattammattam yatun. Talaga makapabannay yatun!