BILANG mabbing nga minagganassing ta Dios, iddanaman na yamà nga si Arthur i mabbalin tu ministro na Methodist. Ngem, nanguli i planona turi ta binibbigna i literatura na Estudiante ira na Biblia anna namegafu nakikavulu nira. Nabawtisowan yaya turi 1914 ta edad nga 17. Grabe ngana i World War I tatun nga tiempo, yatutta nagalan yaya nga masserbi ta militar. Megafu ta manakina nga manammi tu armas, nasentensian yaya nga mefuku tu mafulu vulan ta Kingston ta Ontario, Canada. Ta pallawan na yamà, nattallung yaya ta ngamin-tiempo nga ministerio bilang colporteur (payunir).

Turi 1926, inatawa ni Arthur Guest si Hazel Wilkinson, nga nammuan na yenana i kinakurug turi 1908. Neyananà turi Abril 24, 1931, mekadua ta appa nga mawwaragi. Nakasentro i pattolay na familiami ta paddayaw kani Jehova, anna megafu ta monag nga respeto na Yamà ta Biblia napeggakkami tu appresasion ta Uvovug na Dios ta interu pattolemi. Regular kami nga mallayyagayya bilang familia.—King. 20:20.

Nabbatta i World War II turi 1939, anna negamma ta tumunug nga dagun i aktibidad na Saksi ira ni Jehova ta Canada. Egga i nasionalistiko ira nga seremonia ta publiko ira nga eskuela, nelavu ngana i passaludo ta bandera anna pakkansion tu national anthem. Napapanaw kami na manang ku nga si Dorothy ta klase tatun ira nga tiempo. Nakaddagannà turi ta mittan nga aggaw nipasiranannà na mestrà gukaban na pangagal niakan tu tarku. Kabalin na klase, binubbugdà na kaklasè ira adde ta matomba ngà. Megafu tatun, nassikan i determinasiokku nga ‘kurugan i Dios anne ta tolay.’—King. 5:29.

Turi ta Hulio 1942 ta edad 11, nabawtisowannà ta  tangki na danum ta tadday nga koman. Nagenjoy ngà ta passerbì bilang vacation pioneer (auxiliary pioneer ngana ta maddaggun) ta kada bakasion ta klase. Egga i dagun nga nevulu ngà ta tallu nga brother nga mallayyagayya ta mattrosu ira nga maddian ta sigiran nga parte na Ontario, nga awan tu makatteritoria.

Nabbalinnà tu regular payunir turi Mayo 1, 1949. Megafu ta maddaggun i konstruksion ta panga nga ofisina, nembitannà nga manguffun anna mabbalin tu miembro na familia na Canada Bethel turi Disiembre 1. Neyasaynnà ta pagimprentan anna nagigiammù nga usan i flatbed press. Panggabi ngà tu piga ligguan, nga magimprenta tu tract nga meyannung ta pameppersigi nga maekspiriensa na Saksi ira ni Jehova ta Canada.

Durante nga mattrabahu ngà ta Service Department, ininterviù i papayunir nga mabbisita ta panga nga ofisina nga mappange nga masserbi ta Quebec, nu sitaw grabe i pangokkontra. Tadday ta bisita si Mary Zazula nga taga-Edmonton, Alberta. Megafu ta ariadda niyemmang na kakana nga si Joe i mab-Bible study, pinapanaw ira na maganada ta baleda, nga deboto nga Orthodox. Nabawtisowan ira dua turi Hunio 1951, anna kabalin na annam nga vulan, namegafu kami ngana nga mappayunir. Ta interviu, nagustuakku i espiritualidad ni Mary. Kinagì ta baggì, ‘Basta awan tu marake nga mesimmu, gittana yaw ngana i babay nga atawakkù.’ Nakkasal kami kabalin na siam nga vulan—turi Enero 30, 1954. Nappasa i tanga-ligguan, nagalan kami nga massanay para ta panangngal ta sirkito, tapus ta tumunug nga dua dagun, nasserbi kami ta sirkito ta sigiran na Ontario.

Durante nga alistu i papprogreso na pallayyagayya, egga ira i nagalan nga mammisionero. Nanonomi nga nu maattammammi i alle-yelo nga winter ta Canada anna i kallussaw ira nga lamù nu summer, mawayyami nga lampasan i mariga ira nga sirkumstansia ta maski anni nga asaymentmi. Naggradua kami ta meka-27 nga klase na Gilead School turi Hulio 1956, tapus ta Nobiembre, egga kami ngana ta asaymentmi—Brazil.

Ta paddattalmi ta panga nga ofisina ta Brazil, neyammammu kami ta lengguahe nga Portuguese. Kabalimmi naggigiammu tu simple ira nga paddios anna makkabesa tu tadday minuto nga presentasion ta magazina, nembitakkami nga mevulu nga mallayyagayya. Nu egga interes na makabbalay, netuddu nga mabbibbig kami tu teksto ira nu kunnasi i pattolay ta Pappatulan na Dios. Ta ollu nga aggomi ta ministerio, nagginna tu mapia i tadday nga babay, yatutta binibbigku i Nepakannammu 21:3, 4—tapus gavva ngà ngana laman nga natomba! Ari paga nga nakibagay i baggì ta sobra nga patu na tiempo anna yatun i kanayun nga problemà.

 Siudad na Campos i asaymentmi ta pammisioneromi, nu sitaw egga ngana i 15 nga kongregasion. Turi ta paddattalmi, egga laman i tattadday nga grupo ta siudad kunne na gapa i balay na misionero nga egga appa nga sister nga maddian: Esther Tracy, Ramona Bauer, Luiza Schwarz, anna si Lorraine Brookes (Wallen ngana). Manguffunnà ta pabbabbal anna magikkayu para ta pallutu. Mittan nga gabi na Lunes kabalin na Paggigiammu tu Watchtower, egga ariammi ekspektan nga bisita. Nagidda ta sofa i atawà tapenu magibannag durante nga pagistoriammi i nesimmu tatun nga aggaw. Turi ta limikka yaya, egga limittuag nga iraw nga nakakaddagammi tapus pinatè yatun!

Kabalin na tanga-ragun nga paggigiammu tu Portuguese, natunno ngà bilang manangngal ta sirkito. Simple laman i pattolemi ta babario—awan tu kuryente, magidda kami ta dapang, anna mabbiahe kami gukaban na kabayu anna kalesa. Turi ta pappangemi nga layyagayyan i tadday nga ili nga egga ta vuku-vukig nga awan tu makatteritoria, nattakay kami ta tren anna narrenta kami tu kuarto ta tadday nga boarding house. Nangipatulug i panga nga ofisina nikami tu 800 nga magazinas nga mosa ta ministerio. Makatotoli kami ta post office tapenu apan i kinarton nga magazina nga iyangemi ta paddianammi.

Ta 1962, egga i nakua nga Kingdom Ministry School ta interu Brazil para ta brother anna sister ira nga misionero. Ta unag na annam nga vulan, neyasaynnà nga mabbiahe ta madduruma nga eskuela—ngem ariakku kavulu si Mary. Sakan i nattuddu ta klase ira ta Manaus, Belém, Fortaleza, Recife, anna Salvador. Nangorganisa ngà tu tadday nga kombension distrito ta tadday nga sikat nga teatro (opera house) ta Manaus. Megafu ta masikan nga uran, nadapingan i menum nga danum anna awan tu disente nga mosami nga lugar para ta cafeteria na kombension. (Tatun ira nga tiempo, egga ira i meprepara nga makan ta kombension ira.) Nakiyuvovug ngà ta militar, tapus tadday nga masippo nga ofisial i nangiyunnug nga mangiyawa tu menum nga danum para ta nagatende ira ta kombension anna naddog tu suddalu ira nga mamataddag tu tolda ira para ta kusina anna cafeteria.

Turi ta awannà, nallayyagayya si Mary ta tadday nga distrito na komersio nga maguvovug tu Portuguese. Puru kuartù laman i agga-nono na totolay tatun. Awan tu nakayuvovugna tu maski sinni meyannung ta Biblia, yatutta kinagina ta karuan nga Bethelite, “Ariakku vuluvuga kayà i maddian ta Portugal.” Nasorpresa kami! Ari nabbayag, nakalawa kami tu tura nga makkagi nga masserbi kami ta Portugal. Tatun nga tiempo, megamma i pallayyagayya, ngem inakseptami i asayment maski nu nakaddag ta ollu si Mary.

Zimittal kami ta Lisbon, Portugal turi Agosto na 1964. I wawwaragi tam i puntiria na pameppersigi na sikreto nga pulis na Portugal (PIDE). Megafu tatun, mapia nu awan tu manafun anna ibitami i makiyuvovug ta Saksi ira tatun. Naddiakkami ta boarding house durante nga innaggammi i legal nga papeles nga mangipamavulun nga maddian tatun. Kabalimmi nalà i visami, narrenta kami tu apartment. Nakontakmi gabbalaman i panga nga ofisina turi Enero 1965. Talaga makapagayaya nga aggaw turi ta naka-atende kami tu ollu nga study ta unag na lima vulan!

Nammuammi nga marronda i pulis ira kada aggaw ta babalay na wawwaragi. Megafu ta neserra i Kingdom Hall ira, ta babalay makua i study ira ta kongregasion. Ginatu nga Saksi ira i neyangay ta istasion na pulis tapenu ammuan anna mapakkiavutan. Namaltratu i wawwaragi tapenu fuersan ira nga kagian i ngagan danuri mangiyorollu ira ta study. Yatutta, neyugalian na wawwaragi nga agalan i kataggi-tadday ta ngagadda mismu, gittana José onu Paulo, imbes tu ta apelyiduda. Kunnatun ngana gapa kingnguami.

Pangiyawa tu espiritual nga makan ta wawwaragi i pinaka-importante. Si Mary i mangi-stencil tu artikulo ira na Watchtower anna tanakuan paga nga literatura tapenu makangngua tu kopia ira nga mimeograph.

Turi ta Hunio 1966, egga i maddaggun nga kaso ta korte ta Lisbon. Nekaso i interu Feijó Congregation nga egga 49 nga miembrona ta pagatende tu ilegal nga paggarammammung ta balay. Nipreparà ira para tatun nga kaso anna pakkuestion gukaban na pattaddagku bilang abugadu na nangidemanda. Ammumi nga maffu kami, ngem nalippawami nga marresulta yatun tu dakal nga pamakurug. Magutu nga inusa na abugadumi i kinagi ni Gamaliel ta ollu siglo. (King. 5:33-39) Nagadde ta media yaw nga balita, anna nefuku i 49 nga wawwaragi tu 45 nga aggaw adde ta lima-gaddua nga vulan. Magayaya kami kagian nga inaksepta na magutu nga abugadumi i pab-Bible study anna magata-atende yaya tu study nige na patena.

Natunno ngà bilang branch overseer turi Disiembre 1966 anna aru nga tiempo i usakku para ta legal nga ganna-gannug. Egga ngana i rekord na Saksi ira ni Jehova ta kepangngattadda nga makapaddayaw nga awan tu mangigamma. (Fil. 1:7) Legal nga naksepta gabbalaman yatun turi Disiembre 18, 1974. Binisita na taga-hedkuarter nga da Nathan Knorr anna Frederick Franz i Portugal, tapenu makitappagayaya ta importante nga miting ta Oporto anna Lisbon nga 46,870 i bilang na nagatende.

Pinalawa ni Jehova i dalan para ta isla ira nga maguvovug tu Portuguese, nelagum ngana i Azores,  Cape Verde, Madeira, anna São Tomé and Príncipe. Narresulta yatun tu pakawagan tu dakal nga pasilidad para ta panga nga ofisina nga netuppal turi 1988. Ta Abril 23, tatun nga dagun, niyorollu ni Brother Milton Henschel i paddedika ta bagu ira nga pasilidad ta arubang na 45,522 nga magaya-ayaya nga maggigginna. Kappagayaya innan i 20 nga brother anna sister ira nga nasserbi bilang misionero ta Portugal tatun nga programa.

Ta pappasa na daga-ragun, dakal i pinakkasta na pattolemi megafu ta pakikavulu ta wawwaragi. Importante nga leksion i nagigiammù ta panguffun kani Brother Theodore Jaracz ta zone visit-na. Neparubang ta serioso nga situasion i panga nga ofisina nga bisitanna, anna kingngua ngana na Branch Committee i adde na mawayyada. Tapenu mapakalma ira, kinagina: “Tiempo ngana na masanto nga espiritu nga mattrabahu.” Piga dekada i nappasa turi ta pabbisitami ta Brooklyn, nakavulumi na atawà nga si Mary tu tanga-gabi da Brother Franz anna i karuan paga. Turi ta nekiddaw kani Brother Franz nu anni i makagina meyannung ta aru nga dagun nga passerbi kani Jehova, kunna; “I rekomendasiokku ay: Mattalupaddian ta masingan nga organisasion ni Jehova maski egga i problema onu awan. Yatun laman i tattadday nga magaggangngua ta trabahu nga nibilin ni Jesus ta disipulosna—i pallayyagayya ta mapia nga dumug na Pappatulan na Dios!”

Kurug nga pagayaya i naekspiriensami na atawà ta pangngua tatun. Tagibalorammi ira i nesimmu ta zone visit tatun ira nga panga nga ofisina. Nangiyawa tu oportunidad yaw ira nga pabbisita tapenu appresian i matalo nga passerbi na mabbing anna manakam ira anna mapagaram ira nga mattulu-tuloy ta espesial nga pribilehioda nga masserbi kani Jehova.

Nappasa ngana i daga-ragun, anna maturu ngana tu 80 i dagummi. Marigi-rigatan ngana si Mary ta taka-takina. (2 Cor. 12:9) Nasserbi tu pamasikan ta pangurug anna pamatuyag ta determinasiommi nga mammakatalo tatun ira nga kapurueba. Nu daddammammi i pattolemi, makagimi nga naekspiriensami i ari mepangngo nga allo ni Jehova ta napakaru nga ganna-gannug. *